Jo Epeco 4

Wubed acel i Cwiny Maleŋ

1Pi meno, an ma abedo lamabuc pi Rwot alegowu ni wulub kit kwo ma myero, ma rwatte ki lwoŋo ma yam gilwoŋowu iye. 2#Kol 3.12, 13 Wuwor jo mukene, wubed mwol, dok wubed jo ma ciro gin ducu ma balo cwiny dano, kun ŋat acel acel diyo cwinye i kom lawote ki mar. 3Wuket tek me gwoko ribbe ma Cwiny Maleŋ omiyowu wek wubed acel i twec me kuc. 4Kom tye acel, Cwiny Maleŋ bene tye acel, kit macalo gen bene tye acel ma Lubana olwoŋowu iye. 5Rwot tye acel, niye acel, batija acel, 6Lubaŋa bene tye acel ma en aye Won dano ducu. En loyo jami ducu, tiyo i gin ducu, dok bene tye i gin ducu.

7Ŋat acel acel i kinwa olimo mot me kica, ma oporre ki mot ma Kricito omiye. 8#Jab 68.18 En mumiyo yam giwaco ni,

“Ka ceŋ oito malo,

otero opii mapol ma en oyako i lweny,

ci omiyo mot bene bot dano.”

9“Oito malo” te lokke aŋo? Te lokke ni olor piny bene i lobo ka matut. 10Ŋat mulor piny en acel-lu bene aye oito malo ka mabor i ŋe polo ducu, wek epoŋ jami ducu woko liweŋ. 11Mot ma en omiyo gin en: omiyo jo mogo me bedo lukwena, jo mukene me bedo lutit lok pa Lubaŋa, jo mukene gubed lutit lok me kwena maber, jo mukene lukwat ki lupwony. 12Ticgi obedo me yubo jo pa Lubaŋa i ticgi me konyo dano, dok me doŋo kom Kricito, 13nio waŋ ma wan ducu wadoko acel i niyewa ki i ŋeyo Wod pa Lubaŋa, nio ka wadoko dano mucwiny, ma wadoŋo warom ki Kricito, ma en aye jami ducu opoŋ iye. 14Pi meno pe dok myero wabedu calo litino ma giweko yamo me pwony mapatpat wirogi dwokogi tuŋŋi ki tuŋŋi; ryeko pa dano, ki lok ma giporo me goba, pe dok bimiyo wacabbe acaba. 15Ma ka meno, myero walok lok ada ki mar, wek wamedde, wadoŋu malo i kit yo ducu nio bot Kricito, ma en aye lawiwa. 16#Kol 2.19 En aye wic, dul kom ducu guribbe woko i kome, dok gukubbe kacel i waŋ mwot ducu ma tye iye. Ka dul acel acel tye ka tiyo ticce kakare, miyo kom doŋo maber i mar.

Kwo manyen i Kricito

17En mumiyo awaco lok man botwu kun acikowu i Rwot ni, pe myero pud dok wubed i kit ma Lurok gibedo kwede, i tamgi ma konnye pe. 18Tamgi doŋ onyobbe woko, pe doŋ gitwero niaŋ gin mo, kwo ma Lubaŋa miyo nen gin ma welo ki tuŋ botgi, pi kwiya piny ma obino botgi pi cwinygi ma odoko nwaŋ. 19Gin pe doŋ giparo gin mo, oweko doŋ gumine kengi i tim me tarwaŋ, dok bene giwor matek i timo lwak tim caro caro mapol. 20Ento lok kom Kricito yam pe gipwonyowu kit meno, 21ka kono nene wuwinyo lok i kome ada, dok gipwonyowu, wun jo ma lubo en, ki lok ada ma tye i Yecu. 22#Kol 3.9 Kit kwowu macon ma yam wubedo kwede ca, kombeddi myero doŋ wuwek obedi; kit kwo maca doŋ oballe woko pi miti maraco ma obwolowu. 23Wuwek Lubaŋa doŋ oroc tam me cwinywu odok manyen, 24#Kol 3.10; Acak 1.26 ka doŋ wuruk kit pa dano manyen ma giketo i cal pa Lubaŋa kikome i ada me kit ma atir ki maleŋ.

25 # Jek 8.16 Pi meno, wuwek goba obedi; dano acel acel myero olok lok ada bot dano lawote, pien wan watye macalo dul kom luwotwa. 26#Jab 4.4 Ka kiniga omakowu, pe wupot i bal; ceŋ pe myero opoti ma noŋo pud wujul wutye ki kiniga i cwinywu, 27dok bene pe wumi kare ki Catan. 28Dano ma yam bedo ka kwalo jami pa jo mukene myero doŋ owek kwo obedi; myero en ocak tiyo tic maber ki ciŋe, wek onoŋ gin ma myero opok ki jo ma megi pe. 29Lok mo marac myero pe okatti ki i dogwu; wulok lok mabeco keken ma doŋo tam pa dano i yo ma mitte, wek jo ma winyo lokwu gunoŋ kony ki iye. 30Pe wumi Cwiny pa Lubaŋa okum, en Cwiny ma gimiyowu me bedo lanen ma gimwono woko doŋ i komwu pi kuro nino ma gibikokowu iye. 31Wuwek doŋ keccwiny ducu, ki waŋ-ic ki kiniga, da i wi dano mukene, yet, kacel ki raccwiny ducu. 32#Kol 3.13 Wubed jo ma lukica ki cwiny maber; dano acel acel myero otim ber bot lawote. Wutim kica i kinwu kekenwu ki luwotwu i kom balwu, macalo Lubaŋa otimowu kica i Kricito.

Currently Selected:

Jo Epeco 4: Aco85

Highlight

Copy