Tic Pa Lukwena 28

Paulo i cul nam ma gilwoŋo Molta

1Ka doŋ watyeko larre, ci waniaŋ ni cula meno gilwoŋo Molta. 2Wegi lobo meno gutimowa tim me kica ma pe nen atata; gumoko mac, gujolowa ducu, pien onoŋ kot ocako cwer ki koyo bene onoŋo ŋic. 3Paulo ogwaro rido yen, obolo i mac, ci twol lacocodo omwomme woko pi lyeto ka orine i ciŋe. 4Ka wegi lobo-nu guneno twol mulyerre ki i bade, gucako lok kekengi ni, “Ada, laco man lanek. Kadi ka olarre ki i nam, laŋolkop atir pe ye ni obed kwo.” 5Ento Paulo oyeŋo bade obolo kwede twol i mac ma pe otime gin mo marac. 6Gukuro kun gitamo ni bade bikwot woko nyo bipoto piny ci to woko cut; ento ka doŋ gukuro pi kare malac ci guneno ni gin mo marac pe otimme i kome, guloko tamgi, gucako waco ni ebedo lubaŋa mo.

7Ladit ma loyo cula meno, laco ma nyiŋe Publio, onoŋo tye ki pottine cok ki kunnu, ci ojolowa, ogwokowa pi nino adek. 8Won Publio onoŋo two kun obedo ka winyo lyeto, cado bene. Paulo olime, olego pire kun keto ciŋe i kome, ci ocaŋe. 9Ka man otimme, lutwo mukene ducu ma i cula-nu gubino bote ci gucaŋ. 10Gumiyowa mot mapol; ka doki i kare ma wacako wot guketo jami ma mitte pi konyowa i mel.

Paulo oo i Roma

11I ŋe dwe adek wamedo wotwa i mel mo mua ki i Alegijanderia ma tye ki cal Rudi i nyime, ma odikke i cula meno pi kare me koyo. 12Wakwaŋ wao i Cirakuca, wadikke kunnu nino adek. 13Waa ki kunnu, warabo piny nio i Regio. Ka nino okato acel, yamo ma a tuŋ acuc okodo, orwone wao i Puteoli. 14Wanoŋo utmego kunnu, ci gulwoŋowa, wabedo botgi nino abiro, ci wao i Roma. 15Ka utmego ma i Roma guwinyo piwa, gubino wa i Cuk pa Appio, ki i kabedo ma gilwoŋo Ot Welo Adek pi jolowa. Ka Paulo onenogi, opwoyo Lubaŋa ci cwinye odoko tek. 16Ka doŋ wao i Roma, giye ni Paulo obed i ode kene ki askari ma gwoke.

Paulo otito lok pa Lubaŋa i Roma

17Ka nino okato adek, olwoŋo ludito pa Lujudaya ma gibedo kunnu. Ka gucokke bote, owaco botgi ni, “Utmego, kadi bed pe atimo gin mo marac i kom rokwa nyo i kom kit pa kwarowa, ento gimaka, i Jerucalem gitweya, gimiya i ciŋ Luroma. 18Ka Luroma gutyeko ŋiyo lokka, gumito ni gigonya woko, pien onoŋo pe tye tyen kop mo ma romo neka. 19#Tic 25.11 Ento ka Lujudaya gucerre iye, meno omiyo abolo pi Cecar, pien yo mukene doŋ onoŋo pe, kadi bed pe atye ki adot mo ma apido ki rokka. 20Meno aye gin mumiyo amito ni anenwu ci alok kwedwu, pien gitweya ki nyor man pi gin ma gen pa jo Icrael ocuŋ iye.” 21Gugamo ni, “Pe walimo waraga ma oa ki i Jerucalem ma loko komi, pe tye ŋat mo i kin omegiwa mua kunnu ma okelo lok mo i komi, nyo ma oloko lok mo marac i komi. 22Ento wamito waniaŋ tammi ki boti, pien waŋeyo ni i kabedo ducu giloko lok marac i kom dul man ma icwako-ni.”

23Guciko nino ci gubino bote i ot ma en bedo iye, mapol makato tyen mukwoŋo ca, ci oyeko lok ducu kikore cakke odiko nio wa otyeno kun tito lok kom ker pa Lubaŋa atyer ci otemo ywayo tamgi wek guye Yecu ki lok ma okwanyo ki i cik pa Moses ki i buk pa lunebi. 24Jo mukene guye lok ma otitoni ento jo mukene gukwero ye. 25Ci gucako ket woko ma kingi opokke woko kumeno ka doŋ Paulo oloko lok acel ni, “Cwiny Maleŋ yam oloko kakare bot kwarowu ki i dog lanebi Icaya ni,

26 # Ic 6.9, 10 ‘Cit iwac ki rok man ni,

Winyone mere wubiwinyo,

ento pe wubiniaŋ te lokke;

nenone wubineno,

ento pe wubiŋeyo gin ma tye.

27Pien jo me rok man cwinygi odoko nwaŋ,

itgi bene odiŋ woko,

dok gumiyo waŋgi woko

wek pe ginen ki waŋgi,

pe bene giwiny ki itgi,

pe bene giniaŋ iye ki cwinygi,

pe gilokke gidwog bota acaŋgi.’

28Myero doŋ wuŋe ni, larre man ma Lubaŋa omiyo doŋ gicwalo woko bot Lurok; gin gibiwinyo.” [29Ka owaco lok meno, Lujudaya guket woko kun gitye ka pyem matek i kingi kekengi.]

30Paulo obedo kunnu pi mwaka aryo kun kwo ki limme kene ci jolo lwak jo ducu ma bino bote. 31Obedo ka tito lok me ker pa Lubaŋa, pwonyo bene lok kom Rwot Yecu Kricito atyer ma pe gijuko.

Currently Selected:

Tic Pa Lukwena 28: Aco85

Highlight

Copy