2 Jon 1
1
Mot
1Waraga man oa ki bot ladit. Bot dako ma giyero ki litinone ma amaro i ada, pe an keken ento kadi wa jo ducu ma giŋeyo lok me ada, 2pi lok ada ma bedo i cwinywa, dok bene bibedo kwedwa nakanaka:
3Gum ki kica ki kuc ma a ki bot Lubaŋa Won, ki bot Yecu Kricito ma Wode bibedo kwedwa i ada ki mar.
Lok ada ki mar
4Cwinya yom twatwal me noŋo ni litinoni mogo gilubo lok me ada i kit ma yam Lubaŋa Won ocikowa kwede. 5#Jon 13.34; 15.12, 17 Kombeddi doŋ alegi in dako, pe macalo dok atye ka coyo boti cik manyen ento pi en ma yam watye kwede con ca nia wa i acakki, ni wan myero wamarre kekenwa. 6Man aye mar, ni myero walub cik pa Lubaŋa; man aye cikke, macalo iwinyo nia i acakki, ni myero wabed ki mar. 7Pien lubwol dano mapol gitye guket woko i lobo, jo ma pe tuco ni Yecu Kricito obino kun tye ki kom dano; kodi dano-nu labwol dano, dok bene lakwor pa Kricito. 8Wunenne kenwu wek gin ma doŋ wutyeko tic pire pe orweny woko ki botwu, wek wunoŋ mucarawu ducu. 9Ŋat mo ma pe moko i pwony pa Kricito, ento kato mere akata anyim, dano macalo meno pe tye ki Lubaŋa; ŋat ma moko i kom pwony pa Kricito tye ki gin aryo ducu, Won ki Wod. 10Ka ŋat mo obino botwu ma pe okelo pwony man, pe wujole i ot, pe wumote bene; 11pien ŋat ma omote noŋo oribbe kwede i ticce marac.
Lok me agikki
12Kadi bed atye ki lok mapol ma myero aco pire botwu, atamo ni myero pe ati ki karatac ki vino, ento atye ki gen me bino ka nenowu, ci doŋ abilok kwedwu waŋ ki waŋ wek yomcwinywa ocobbe maber.
13Litino pa lameru ma giyero gumoti.
Currently Selected:
2 Jon 1: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.
