LAW MA NIR-NIRAMNA 31
31
1Yoboyna vi mulla Lemwel,
dita ta sulum hatam hiɗi na'ta.
2Nan ma daŋ mige goora vanu?
Nan ma daŋ mige goor ma nan vuɗaŋŋa.
Nan ma daŋ mige goora van ma nan minaŋŋa?
3Vul donota vaŋ goy tam boynɗi,
hin hagata vaŋu hay ɓam nisi sa ba muliyan goynɗi.
4Humaŋu Lemwel,
may ŋaa'a kay ci dolaynɗi,
may naa'a kay muliyana kay ci dolaynɗi,
may ŋaa'a kay gurona vi muliyana kay ci dolay ma galakŋɗi,
5kuɗ ta ala hay li ma nisi ci dolaynawa yisi jok vun-ma-gatna,
nisi ɗawn ma ɓulak hagata vi sa maŋayna.
6Vulgi dolay ma galakŋa mi sum sa ka mit goyo,
vulgi vinna mi nisi sa yorta ka hay diksiya;
7hinsi ci'e kay yisi ma jok hawta visiya,
kay humsi ma gisi kay zumalda visi loɗi.
8Mal vunaŋ goyo, kay gut sum sa vunsi dugunna,
kay gut kuɗ sum sa noyay goyna.
9Mal vunaŋ goyo, kaaŋ kitata hay hagata va'a,
gutaŋ kuɗ sa hawna hiɗi sa maŋayna.
Cata ta tek ŋolda
10Sa ma fi cata ta ŋaata ɗawni mi gige?
Kay cata ŋaata na' suw faray ma kisna.#31:10 Suw faray ma kisna Lebo suw kermena ma ti gurjut ŋolo.
11Jufa'a ŋalda valam tuni ka'a,
sle ma tina may kiɗa goy ka'ɗi.
12Na' lum tam jufa' mi sle ma ŋaana,
may mi sle ma joonɗi,
kayni hay buura vi irita va' kafe.
13Na' cilim tilisna hiɗi gudoŋŋa,
na' li lop hiɗi dika' firiya.
14Na'a ki lumda ta filiwna nala,
funa va'a na' maramay goy gine pa.
15Na' fok kulo hay ŋarpita pa,
vul tina mi ziyna va'a,
vul lopna mi boy sa sunda va'a.
16Na'a var kay sinena, fum kaw;
kuɗ vuɗna vi lopna va'a,
na' pi gulda-guldana.
17Na' jun fura' hiɗi dono'o,
na' vul donot mi ɓa'a.
18Na' wi ala sle ma na' lumna kira' ŋaa'a,
fitilla va'a may tew goy henjetɗi.
19Na' tun ɓa' kay va ma duɓar barawna,
cita-ɓa'a ka perwet gu ma kuɗumna may.
20Na' meɗ ɓa' goyo kay vul mi sa hawna,
na' meɗ ɓa' goyo kay vul mi sa maŋayna.
21Na' may li nar kay sleɗna hay ziyna va'ɗi,
kay sa vo hay ziyna va' kaf ka cuki hiɗi sligar ma diɓilikŋa.
22Na'a cil gudoŋŋa,
na' cil sligar-barawna, hiɗi purpella.
23Jufa'a selem tiy goy fara'a,
hay li ma nam mus jar sa maariyana vi nagata.
24Na' cil semisna, gusum goyo,
na' gus kantin goyo mi sa li filiwna.
25Na'a hobay hiɗi donota hiɗi suburta,
tuwa' may li nar kay sle ma min li vokŋaɗi.
26Na' mal vuna' goyo hiɗi yali,
hatta ta ŋaata ka hay vuna'a.
27Na' coli jigere kay sle ma ka li vo hay ziyna va'a,
na' may ti fun ma zulomdaɗi.
28Gurona va' yaw kulo'o, da' ala sle'ta kagu,
jufa' fok kulo, nam subura'a.
29Guro-boyn ŋolo ka hiɗi poyta ŋaata,
may naku, nak suwsi kafe.
30Law ma ŋaan mi ɗutu,
jifiyt vat goy ɦawa'a kaw;
may cata ta li nar kuɗ Ma-Vatɗina na' ma fi suburta.
31Na' as fi wurakŋa kay lopna va'a,
sum sa hay nagat kaf tiya' se' a kay lop ma na' lumna.
Currently Selected:
LAW MA NIR-NIRAMNA 31: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
