NAHUM 3
3
1Joot kay hoyok-ziyn ma ɦok busuwn goyna,
hobay hob' hiɗi sinda,
hobay hiɗi ɦawlata kaw,
sa gar kay vurum sumun dok-dokŋa.
2Nisi ka wat sumun hiɗi libetna,
Sumun kaf ka hum hiɗi humsiya,
suwana vi sem kekena,
jaŋŋa vi kulumayna,
jaŋŋa vi keke-ma-duura,
3kulumayn dok-dok ganiya,
kew-gaferaŋ wileɗa,
kaway-ma-duur ka tigeɗa.
Sumun ŋolo ka hiɗi milla,
sa muɗi ŋumna nisi ŋolo.
Sa mitina sa as ŋaɓsiɗi.
Sumun ka tupa kulo kay sa mitin tiŋ-tiŋ'.
4Kay mige na' ta viyuwta li tuwa' viyuw ŋol suwa,
hobay hiɗi nemda, hiɗi gul-yalda va'a,
na'a ta gus jaf-sumun goyo hiɗi viyuwta va'a.
Na'a ta gus jaf-sumun kaf goyo hiɗi gul-yalda va'a.
5Wulin kayn nan coowa kagu,
din mi Ma-Vatɗina vi vok-ma-duura,
sligar ma cuki tagŋa nan ma kulotom goyo,
nan min ɗek nalata vag goy kir sumun noŋ kaf,
zulota vagu nan min ala muliyan kaf ma wa' goy wi'.
6Nan min ko tugosn kagu,
nan min muɗag ɦay-ɦaya,
nan muɗag goy va ma liw hiɗi namu,
7nala la sa wagu,
nam ma jaŋ vokagu, ma di ala:
Ninive muɗi mi liyn ma vurumu,
sa ma yorag mi gige?
Sum sa teŋag iragu nan fisi ɗawn arige?
8Nak (Ninive) jifiy suw No-Amon su?#3:8 No-Amon Ma li ti Tebes hay Egipte ta kulota, sa Asiriyan kol ka'a hay 663 jew YK.
Na'a ta ka goy jar liyn ma gi niyn goyna,
ŋuyi kalaf jar niyna,
gulmun ma ŋuyi ta'na mi niy-lumna ma ŋolla,
niy-lumna ma ŋolla mi gulmunna va'a.
9Etiopiya jewe donota va' may vatɗi,
ki Egipte nala kaw,
sum sa hay Put hiɗi Libiya kaf ay juni kuɗsiya.
10May hiɗi kayni kaf nisi kalay goy gorvo'o,
Sumun yawsiya,
gurona visi sa vuɗi wulina,
jiwesli gaa sem sumun hay hayana kafe,
sa ŋulona visiya sumun ɓurawsi jarsiya,
muliyana visiya sumun cisi jaɓn sesiya.
11Nak kaw lasta ma suwag yagu,
nak ma ŋay goyo,
nak ma gar kay ŋay vok sa ma gawta.
12Gulmun ma ŋuyi tagŋa kaf
nam mi gu-gumna ma vuɗ gosoyo,
hay li ma san gazamu,
nam yak hay vun gigekaw ma min tumu.
13Ɗuwag sum sa hayagŋa tige,
hini hayag wulin kayn si boyna tuta;
Vun-galana vag malawa goy vidiŋ' kay sa gawt kagŋa,
kut ti sle ma duk vun-ziyna vagawa.
14Tuɗgi go niyna nigi sa Ninivena,
kay hoyok-ziyna vigi ka sli'e,
kotgi gulmun ma tigin kulo'o,
cukgi segi gaa hay nagana, gusloɗgi nagana,
kotgi va ma gi direŋgella!
15Hay li namn ɗawn kut ma ŋalgi goyo,
kew-gaferaŋ ma vatgi goyo,
kut ma tigiya ki keŋ-keŋŋa nala,
molgi yam-tuwgiya ki keŋ-keŋŋa nala,
molgi yam tuwgiya ki baara nala.
16Sumuna vigi sa li filiwna
biyay ŋolo suw mislekŋ ma dukalawna.
Keŋ-keŋŋa mal gilaŋatam goyo nam pira.
17Sa ŋomda vigiya nisi ki baar nala,
sa li lopna vigiya nisi ki baar ma patna nala,
hay li ma liyn li sleɗe,
nam bar gaa kay zlaɓna,
hay li ma fatta day kulo'o,
nam muna,
liyn ma nam ay hayna sa as wumɗi.
18Sumuna vag sa ŋom farayn cuki sene,
mulla vi Asiriya,
Sumuna vag sa wi duura say geɗ tuwsi loɗi,
Sumuna vag ka meray goy kay yam-hiɗiyna,
sa ma toksi yisi may loɗi.
19Va ma sleɗ vun milla vag may loɗi,
namu mi mil ma cap cag goy mati.
La sumun hum labara vagawa,
nisi ma ci ɓisi kag rip-rip'.
Joo na'ta ta tun-suk may haya' noŋɗit kayni,
sa ma nak la' talamɗin mi gige?
Currently Selected:
NAHUM 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
