MIKKA 6
6
Ma-Vatɗina ka law sumuna valamu
1Wulin kayni humgi va ma Ma-Vatɗina ka di'e:
Yawgi kulo'o tiygi tam hiɗiyta,
hingi liyn ma jiŋiliŋŋa humgi delgiya.
2Nigi hiɗiyna humgiya,
Ma-Vatɗina min li kita hiɗi sumuna valamu,
Nigi so'ol nagat ma tuni gaa ɗeŋŋa,
kay Ma-Vatɗina kitat ka jaram hiɗi sumuna valamu,
nam min ci wayt hiɗi Israyella.
3Nigi sumuna vanu sa nan kotgina,
nan ligit mi mige?
Nan makgi hiɗi mige?
Nigi hotan dit tuwa tige.
4Yawgi ay goy hay nagat Egipte pa kayn mi nanɗi su?
Butgi goy hay gorvot mi nanɗi su?
Musus hiɗi Aaron hiɗi Miriyam tunsi vokgi mi nanɗi su?
5Nigi sumuna vanu,
humgi ma gigi tige,
hay li ma Balak mulla vi Mowab gar kay ligi joo'o,
vargi kay hot-dita ma Balam goora vi Pewor hot talam tige.
Tun caw ay hay Sittim pa ta-ta hay Gilgal,
kay nigi ma wi lopna van ma ɗigera.#6:5 Ɗuw hay Ŋɓ 23:7-10.
6Nan ma co vok Ma-Vatɗina hiɗi mige?
Nan ma girif Lawn ma Kulo-Jamna hiɗi mige?
Nan ma co talamu hiɗi ɗifin ma ŋal-goyna,
hiɗi goor-putna ma busata valam kepna su?
7Ma-Vatɗina min fok-gamalana ma kis gu' gu'na su?
Ma-Vatɗina firi kay mul-olive
ma nan vulumti birim gaa gaagen su?
Nan ma vul goora van ma vuɗi jewna kay ci-matta van su?
Nan ma vul nam ma may goy hayan pana su?
8Naŋ sana,
Lawn daŋ goy jew ɓa kay va ma ŋaana,
Ma-Vatɗina min job taŋ kayn ala,
Naŋ ma lum mi law ma ɗigera,
ala naŋ ma li kuɗ gatta gasita,
ala naŋ ma hot yaŋ kuɗ Lawna vaŋu.
Ma-Vatɗina ka kitat kay sum sa ɦod slen goyna hiɗi sa ɦawlana
9Del Ma-Vatɗina ka siwel hay hoyok-ziyna,
naŋ sa ma yalla,
laŋ nar kay semda valamu, humaŋu,
humgiya nam ka siwel kay wat sa humɗina.
10Sa ma joona faray ma fum kuɗ hagata ta bay-ɗigerta
ka vo valam lo su?
Dutta-kusta ta dira' dabay kulota ka lo su?
11Firita hiɗi jiw-zlata ta sum sa joon ka gara'ta
nan hina' bay di va ka'a su?
Sle ma ŋa-nekka ma ɗut hiɗi namna nan as hinim nala su?
12Sumuna visi sa farayn hobay hiɗi ɦawlata,
sum sa hay nagata dum mi law ma sinna,
hay vunsiya mi ɗutta tuta.
13Kuɗ kayni nan min gi tuw-tit jargiya,
kuɗ sulukŋa vigiya nan min vatgi goyo.
14Nigi ma ti'e may as a hobɗi,
ruwatgi ma wargi dok-doko.
Sle ma nigi ŋayam kulona as tun kuloɗi,
la va hinawa kulo'o,
duur ma ɓulakam goyo.
15Nigi ma cuk jafna,
may as a feɗemɗi,
nigi ma kesl mul-olivena,
may mul namna nigi as a setem tigiɗi,
nigi ma kesl gulda-guldana,
may nigi as a cum vinna valamɗi.
16Nigi li kuɗ gatta vi mulla Omri,
nigi li ki sum sa vo vi mulla Akab nala kaw,
nigi poy kuɗ gat ma nisi hinim tigina,
kuɗ kayni nan min vulgi goyo tam ɓulak-goyta,
sumun ma cen kuɗ sa figina,
nigi ma ziy zulota vi sumuna vanu may.
Currently Selected:
MIKKA 6: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
