MATEWUS 7

Kitata, siɗawta

Luk 6:37-42

1Kaagi kitatɗi, kay kitat ma kaays kigi nigiɗi kaw. 2Kay kitata ma kaays kigiya hiɗi kitata ta nigi ka'ta, dutta-kusta ta nigi li ŋaɓta hiɗi na'ta kayni ma ŋaɓgi hiɗi na'a kaw. 3Naŋ wi usna ma ka nigiy kir ɓasuŋŋa, may gu-malla ma ka kiraŋ naŋŋa naŋ wumɗi kay mige? 4Naŋ fi di tam ɓasuŋŋa ala hinan sli us ma kiraŋŋa goyo, may gu-malla ma ka kiraŋ naŋŋa naŋ wumɗi may nanige? 5Naŋ sa ma milena, slaŋ gu-malla goy hay iraŋ naŋ jewe, bugolda naŋ muɗ wi goy haraŋi kay sli usna goy hay ir ɓasuŋŋa.

6Vulgi sle ma peldetna mi durnaynɗi, cuk kermena vigi gaa vok bagumnaɗi kaw, kay la naɗi nam ɗawn ma tayam gaa kuɗ selemu, muɗ kigiya, vurumgiya kaw.

7Siɗawgiya, slen ma vulis tigiya; gargiya, nigi ma fi'e; dabgiya, vun-ziyn ma malis goy kigiya kaw. 8Kay gigekaw ma siɗawa fi'e, sa ma gara fi'e, sa ma daba, vun-ziyn mal goy kalamu kaw. 9Sa jargiya ma min vul hiɗiyn mi goora valamu hay li ma goora valam siɗawam kay funa ka su? 10Lebo nam as vulum guyna hay li ma nam siɗawam kay kulufna su? 11Kay na'ta la nigi sa joon kaw wi yal kay vul sle ma ŋaana mi gurona vigiya, nala kaw bugi ma hay wuralawna ma vul sle ma ŋaana mi nisi sa siɗawamna suwa sem gaage?

Lita kuɗ yoboyna

Luk 6:31

12Kay na'ta slen pet ma nigi min ala sumun ma lum tigiya na, nigi ma lum tisi nala kaw, kay kayni mi va ma vun-ma-gatna hiɗi sa jobta-Lawna dumna.

Luk 6:43-44

13Cukgi kalafi hay vun-gala ma hebayna, kay vun-gala ma kal hay ba-goyta nam ŋol hiriŋ', hagata ta kal hayta beɗay kaw, nisi sa cuk hayamna ka ŋolo. 14May vun-gala ma kal hay irita nam hebiya, hagata ta kal haya na' zeh-zeh' kaw, nisi sa fumna ka kiɗaya.

15Ŋomgi tuwgi ŋaa'a kay sa jobta-Lawna sa sinda, nisi sa co tigiya hiɗi sligara vi fok-dimina, may haysi kalafi mi hotna ma gawta. 16Nigi ma wisi ɗawni kuɗ lopna visiya, sa fi ja vuɗna vi gu gulda-guldana goy hay hum gu-zigiyna pa su? Lebo san fi ja vuɗ gu-gumna goy hay zigiy-olla pa su? 17Nala kaw gu ma ŋaana vuɗum mi vuɗ-gu ma ŋaana, gu ma joona vuɗum mi vuɗ-gu ma joona may. 18Gu ma ŋaana fi vuɗ vuɗ-gu ma joonɗi, gu ma joona fi vuɗ vuɗ-gu ma ŋaanɗi kaw. 19Gun kaf ma vuɗ vuɗ-gu ma ŋaanɗi, nam ma kaam goyo, gum hay kuta kaw. 20Kay na'ta nigi ma wisiya kuɗ lopna visiya.

21Nisi sa yan ala Bum-Sumuna Bum-Sumuna kaf zawni as kal hay mulda-wuralawn kafɗi, may kal haya' ɗawni si nisi sa li minda vi bunu ma hay wuralawna tuta. 22Hay buur namna ɗawni, sumun ŋolo ma dan ala Bum-Sumuna, Bum-Sumuna, numa kus yoboyn kay sle ma vokayna hiɗi semda vaŋu, numa digiɗ fuliyan goyo hiɗi semda vaŋu, numa li ɗekka ŋolo hiɗi semda vaŋu kaw ɗisu? 23Hay na'ta nan ma disiya: Nan may wigi noŋɗi, patgi goyo hinanu, nigi sa li jiw-zlata.

24Kay na'ta gigekaw ma hum yoboyna vanu, li kuɗum kaw, nam ŋray ca ki sa ma in ziyna valamu kulo kay hiɗiyta nala: 25Niyn si ŋolo, niy-ɓatna ma'a, birina li kaw, wat ziyna, may nam ɦo gaaɗi, kay sem-ziyna tuni kay hiɗiyta. 26May gigekaw ma hum yoboyna vanu, may la nam li kuɗumɗi, nam ŋray ca ki sa ma bay-yalla ma in ziyna valamu kay ŋeslna nala: 27Niyn si ŋolo, niy-ɓatna ma'a, birina li kaw, wat ziyna, nam ɦo gaa'a, ɓulakka valamu li ŋolo.

28Hay li ma Yesu vat hatta valam vatna, sumun kaf lak ɦuyum' jiɓer kay hatta valamu. 29Kay nam hatsi kayni ki sa ma donot kuɗum nala, may ki sumuna visi sa wi ɗota naɗi.

Currently Selected:

MATEWUS 7: Massana

Highlight

Copy