MATEWUS 27

Sa ɗiger-lawta ŋra vun-tuwsiya

Mark 15:1; Luk 22:66-71

1Hay li ma liyn foowa goyo, muliyan ŋulo sa-ɗifinna hiɗi sa maariyana vi sumuna kaf ŋra vun-tuwsiya kay ci Yesu goyo. 2Nisi junumu, tuɗum goyo, vulum hay ɓam guverner Pilatus.

Yudas jun tuwam goyo

Lop Ap 1:16-20

3Hay li ma Yudas ma di newt kay Yesuna wi ala nisi tun kitatawa kay Yesu, nam ham goyo, nam hot gurjuta ta dok-ɦidita tam muliyan ŋulo sa-ɗifinna hiɗi sa maariyana, 4nam disiya: Nan li sulukawa hay li ma nan di newta kay busuwna ma may li jootɗina. May nisi dumu: Kayni may ti lawta vumaɗi, may lawta vaŋu. 5Ki kayn nala Yudas cuk gurjuta ta dok-ɦidita gaa hay Tempella, nam vi tuwam goyo, kaliya, jun tuwam kulo'o. 6Muliyan ŋulo sa-ɗifinna yaw gurjuta, nisi di'e: Sa fi cuka' hay timgil ma hay Tempelɗi, kay kayni gurjuta vi busuwna. 7Nisi ŋra vun-tuwsiya kay gurju na'ta, nisi yawa'a, gus sinena vi sa ma in dowayn hiɗi na'a, kay pi sum sa pulla haya'a. 8Hay na'ta sine namna yum ala sinena vi busuwna ta-ta vaydi. 9Kayni kay hob vun dita vi Yeremiyas ma jobta-Lawna ma nam di ala: Nisi yaw gurjut dok-ɦidi, gurju ma gusna ma ŋaɓay kalamna, ki ma gurona vi Israyel ŋaɓam gusta valam nala. 10Nisi vulum kay sinena vi sa ma in dowayna, ki Bum-Sumuna vulum hagata nala.

Yesu vok Pilatus, guverner ma Romena

Mark 15:2-20; Luk 23:1-4, 13-25; Yoh 18:28—19:16

11May Yesu col kulo'o vok guvernera. Guvernera jobom ala: Naŋu mi mulla vi Yudiyan su? Yesu hotom dit ala: Naŋ di hay liyamu. 12May law ma muliyan-sa-ɗifinna hiɗi sa maariyana pum kalam kafna, nam min hot dit kuɗumɗi. 13Pilatus dumu: Law ma nisi pum kaŋŋa kaf kayni naŋ may humumɗi su? 14Yesu may hotom dit kay va kep noŋɗi, van kayni muɗ guverner ɦuyum' ŋolo.

15May hay buura vi yuldet kaf, guverner gisi sa ma daŋgay goy kep kep, sa ma sumun jobomna. 16Hay na'ta sa ma selem tiy ŋolo ay hay daŋgay kepe, yum Barabas. 17Kay na'ta hay li ma nisi ay dakaya, Pilatus disiya: Nigi min ala nan gigit goyn mi gige? Barabas lebo Yesu ma yum ala Kristuna su? 18Kay nam wi ala nisi vulum Yesu goy kayni kay hunayta. 19May hay li ma nam ka musi hay zlamda-kitata, cata valamu gi sun ay talam ala: Sa ma ɗigera kayni naŋ ma li va talamɗi, hay henjeni duwayt lasan ŋolo kuɗumu.

20Muliyan ŋulo sa-ɗifinna hiɗi sa maariyana gi yam sumuna kay nisi ma siɗaw kay Barabas, may ci Yesu goyo. 21Guverner sli lawtiya disiya: Jar sa ma'n lakŋi, nigi min ala nan gigit goyn mi gige? Nisi di'e: Barabas. 22Pilatus di tisiya: Yesu ma yum Kristuna nan ma lum talam mi mige? Nisi kaf di'e: Ɓalam kat gu-ma-grakŋa. 23Guverner di'e: Kay mige? Nam lum joon mi mige? May nisi siwel ŋol suwa ala: Ɓalam kat grakŋa. 24May hay li ma Pilatus wi ala lawta valam may ti loɗi, hay li ma nam wi kaw ala winekŋa ka jor vokom ŋol suwa, nam sli niyna, muz ɓalam goyo vok sumun kaf, nam di'e: Sa ma ɗigera kayni busuwna valam may kanɗi, kayni lawta vigi nigiya. 25Sumun kaf hot dit ala: Hin busuwam tun kuma numa'a hiɗi gurona vuma'a. 26Ki kayn nala Pilatus gisi Barabas goyo. Bugolda nam vul hagata kay nisi ma wat Yesu, nam vulumu kay nisi ma ɓalam kat grakŋa.

27Kay na'ta sojena vi guvernera vi Yesu kuɗsi kalaf hay Pretoriyum, nisi dak sa gardena kaf talamu. 28Nisi fok sligara valam goyo, cukum sligar-tuw ma slaw keŋŋa talamu, 29nisi cil bogoray ma zigiyna, tunumti kalamu, vulum libetna hay ɓalam ma jufna kaw, nisi girif gaa vokomu, panam ala: Gaŋ deɓawa, mulla vi Yudiyana. 30Nisi tuf nenen kalamu, yaw libetna, watam kalamu. 31Hay li ma nisi panam panna, nisi fok sligar-tuwna valam goyo, cukum sligara valam talamu, kalam goyo kay ɓalam kat grakŋa.

Yesu ɓalay kat grakŋa

Mark 15:21-41; Luk 23:26-49; Yoh 19:16-30

32Hay li ma nisi cuk goyo, nisi ŋaf hiɗi sa ma Sirene#27:32 Sirene ti nagata ta ka hay Libiya ta-ta vaydi. kepe, semda valamu Simon, nisi vum hiɗi dono'o kay ziy gu-ma-grakŋa vi Yesu. 33Hay li ma nisi co hay liyn ma yum ala Golgata, kayni di ala liyn ma zok-ta'ara; 34nisi vulum vin ma ci'e, rigasay hiɗi goyo-goyna, may hay li ma nam jugomu, nam min ciɗi. 35Nisi ɓalam kat gu-ma-grakŋa, nisi ɓuraw sligara valamu jarsiya, ŋaɓam kuɗ ɦayta, kay hob vun dita vi sa ma jobta-Lawna ma di ala:

Nisi ɓuraw sligara vanu jarsiya, sligar-tuwna vanu nisi ŋaɓam kuɗ ɦayta.#27:35 Ɗuw hay Nul 22:19.

36Nisi lak gaa'a ŋomomu. 37Kulo kalamu nisi ɗo ɗot ta nisi pi lawt kalam hiɗi na'ta ala: KAYNI MI YESU MULLA VI YUDIYANA. 38Hay na'ta nisi ɓal sum sa coŋcoloŋ ma' kat gu-ma-grakŋa kaw hiɗi namu, kep hay galam ma jufna, kep hay galam ma gulla may.

39Nisi sa jik hay hagata ŋulumu, gila yisiya kaw, 40ala: naŋu ma ɦo Tempella gaa'a hot inim kulo'o hay buur hiɗi kawna, suɗaŋ tuwaŋ yo! La naŋu mi goora vi Lawna, jikaŋay gaa'a kay gu-ma-grakŋa pa. 41Muliyan ŋulo sa-ɗifinna, sa wi-ɗota hiɗi sa maariyana kaw ŋulumu di'e: 42Segena nam suɗsiya, may nam asay kay suɗ tuwamɗi su? Namu mi mulla vi Israyel, la nam jikay gaa'a kay gu-ma-grakŋa pa, nay ma vi hayamu. 43Nam zam ɓam Lawna, hin Lawna suɗum wulini, la nam kiram ŋaa'a, kay nam di'e: Nanu mi goora vi Lawna. 44Sa coŋcoloŋŋa sa ɓalay kat gu-ma-grakŋa hiɗi namna ŋulum nala kaw.

45May hay leer ma karkiyana, jufunda li hay nagata pet, ta-ta leer ma zleeŋena. 46Hay leer ma zleeŋena Yesu siwel hiɗi delem kulo ŋolo di'e: Eli, Eli, lama sabaktani! Kayn ala Lawna vanu, Lawna vanu, naŋ hinanawa kay mige? 47Segena jar nisi sa ay hay liy namna hum kayni, nisi di'e: Nam ka yi Eliyas. 48Wulini wulini kep jarsiya fok jaŋi, nam yaw sligara, nam jiyobom hay vinegrena, junum vun zugulla, vulum kulo'o mi Yesu kay nam ma cumu. 49May segena di'e: Hinim tuwa, may ɗuwa la Eliyas co'o kay suɗum goyo klasige.

50May Yesu siwel hiɗi delem kulo ŋolo, sukam sa'ata. 51May ɗuw na kayni, sligar kojolayna ma ɓuraw jar Tempella haway goy ma', kulo kalam pa ta-ta gaa dab', nagat wira, hiɗiyna mun goyo. 52Vun-zulla mali goyo, tuwna vi sa peldetna ŋolo sa ay mitina dayay kulo'o. 53Nisi cukay goy hay zulla pa, cuk kulo hay hoyok-ziyna ma peldetna bugol dayta-kulota vi Yesu, vul tuwsi kir sumun ŋolo. 54May hay li ma mul ma sojen kalam kisna hiɗi nisi sa lakay ŋom Yesu wi wiira-nagata hiɗi sle ma lina, nisi muɗ nar ŋolo, nisi di'e: Gasi wete, san kayni mi goora vi Lawna. 55Boyn ŋolo ka dakay goy gine'e hiɗi liy namna kay ɗuwa, nisi sa ay tapay kuɗ Yesu hay Galileya pa kay sunumu kaw. 56Jarsiya ay Mariya Madelen, hiɗi Mariya sum Yakub, hiɗi Yoses, hiɗi sum gurona vi Sebedew.

Nisi kal tuw Yesu gaa hay zulla

Mark 15:42-47; Luk 23:50-56; Yoh 19:38-42

57May hay li ma vulatita coowa, sa ma farayna kepe hay Arimate, semda valam ala Yosef, nam kaw mi ma hatayna vi Yesu. 58Nam kalay tam Pilatus, jobom kay tuw Yesu. Pilatus vul hagata kay nisi ma slum tuwamu. 59Yosef sli tuw Yesu, nam ɗutum hay sligar ma haɓ tal-talla, 60Nam burum hay zul ma wulina, ma nam ceɗemu gaa'a jar hiɗiyna. Bugolda nam ligat hiɗiy ma ŋolla vun zulla, kaliya may. 61May Mariya Madelen hiɗi Mariya heta ka lakay gaa'a ɗiger vul zulda.

62May hay buurta ka'ta, kayni ti buur ta bugol buura vi kotta, muliyan ŋulo sa-ɗifinna hiɗi sa Farisena tapay kuɗ tuwsiya, kalay tam Pilatus, 63nisi di'e: Sam-ŋolla, humma guma kay va ma sa ma ɗut sumuna kayni dumu hay li ma nam ka iriya tuwa, kay nam di'e: Buur ɦidi nam ma day kulo'o. 64Kay na'ta naŋ ma vulsi hagata kay nisi ma ŋom zulda ta-ta hay buurta ɦidita, kay la naɗi sa hatayna valam ɗawn ma co slum tuwam goyo, nisi ɗawn ma ɗut sumun ala nam dayawa kulo'o hay mitta pa, nala ɗutta ta bugolta ma li ŋol suw ta jewta. 65Pilatus disiya: Sa gardena vigi ka'a, tuɗgi ŋomgi zulda ŋaa'a kuɗ donota vigiya. 66Nisi kaliya, nisi lak vun zulda kay ŋoma'a, nisi duk vun hiɗiyn dono'o, lak sum sa ŋomda kaw.

Currently Selected:

MATEWUS 27: Massana

Highlight

Copy