MALAKIYA 3
3
1Humgiya, nan min gi sa ma sunda vanu,
nam ma kot hagat goy vokanu,
Gosoy na kay' nam ma kal hay tempella valamu,
Bum-Sumuna ma nigi garamna,
namu mi sa ma giy sunu kay bonota ta dikgi ka mina'ta,
ɗuwgiya, nam ka ma'a.
Din mi Ma-Vatɗina vi vok-ma-duura.
2Sa ma as col dig buur ma nam min maan ɗawn mi gige?
Sa ma as col kulo vokom mi gige hay li ma nam ma co'o?
Kay namu ki kuta ta yor kawayn nala,
ki savoŋŋa ma muz sligara nala.
3Nam ma mus gaa'a,
ma yor gurjuta,
ma vo' goy haɓi,
nam ma vo gurona vi Levi goy haɓi,
ki san ka yor ora hiɗi gurjuta nala.
Nisi ma li ir vi Ma-Vatɗina.
Vulda ta nisi mara' tam Ma-Vatɗin ɗawni,
ma li hiɗi dikga ɗigerta.
4Nala vulda ma sum sa hay Yuda hiɗi Yerusalem
lum tam Ma-Vatɗin ɗawni,
ma li kir Ma-Vatɗin ŋaa'a,
ki hay buur ma jewn nala,
ki hay busata ɓa-ɓat nala.
5Nan ma co tigi goboyo kay ka kitata.
Sum sa tun gireyta hiɗi sum sa li zlata-bulota,
nan ma li koliyo kay patsi dirsi goyo,
nan ma ka kitat kay sum sa yi slen kisi bay hagamna,
kay sum sa ti gurjuta vi sum sa lisi lopna,
kay sum sa curoɗ boy sa duhulla hiɗi guro sa kuyuna,
sa li gulu'u mi sum sa pulla,
sa narta may hay diksi noŋɗina,
din mi Ma-vatɗina vi vok-ma-duura.
6Kay nanu mi Ma-Vatɗina,
nan may mu'ɗi.
may nigi gurona vi Yakub,
nigi may vati goy goyɗi.
Gal ma doogona
7Jew hay liyna vi sumaygi pa,
nigi cal gatta vanawa goyo,
nigi min hum kuɗa' loɗi,
may hotgiyay kiranu,
nan ma hotis kirgi lay,
Din mi Ma-Vatɗina vi vok-ma-duura.
May nigi di'e:
Nay hot kiram ɗawn hot tige?
8Sa-wurana nam asay a ɗut Lawn su?
May nigi ka ɗutanu.
Kay nigi di'e:
Numa ɗutaŋ hay mige?
Nigi ka ɗutan hay gal-ma-doogona hiɗi vulda ɗisu?
9Be'da-goyta coowa kigiya,
may nigi ka ɗutanu,
nagat noŋ kuɗulu!
10Margi gal-ma-doogona vigi kaf hay feera vi Ma-Vatɗina,
kay ziyna van ma li hobay hiɗi slen ma tina.
Ma-Vatɗina vi vok-ma-duura di'e:
Nigi wakan tuwa hawtige,
la nan mal vun ɗugul ma dukalawn goy kigiɗina,
la nan gi bolda van ta ŋolda kigiɗina,
11bakmarana nan ma telem goy kigiya,
slena vigi ma tina ma vuɗi gaa kay nagatna as a ɓulak goy loɗi,
gulda-gulda ma hay sinena as get loɗi.
Din mi Ma-Vatɗina vi vok-ma-duura.
12Jaf-sumun kaf ma di ala sle'ta kigiya,
kay nagata vigi ma muɗ ti nagata ta yulumta.
Din mi Ma-Vatɗina vi vok-ma-duura.
Bolda kay nisi sa sun Ma-Vatɗina
13Law ma nigi ka dum katanna nam kalay joo ŋolo,
din mi Ma-Vatɗina.
Kay nigi di'e:
Numa dum kataŋ mi mige?
14Nigi di'e:
Nay sunay Lawn yawn goy meere ɦawa'a;
la nay hum kuɗ vun-ma-gatna valamu,
la nay poy may hay yorta kuɗ Ma-Vatɗina vi vok-ma-duura kaw,
nay fum kuɗum mige?
15Wulin kayn sum sa sli yam tuwsi kulona
nisi kiray nay ŋaa'a suwa;
Awa, sum sa joon nisi li faray ŋolo,
Awa, nisi nem Lawna,
hiɗi kayn kaf nisi ka hulot goyo.#3:15 Ɗuw Nul 73:3-4.
16Bugol kayni nisi sa li nar kuɗ Ma-Vatɗina
job tuwsi jar tuwsiya;
Ma-Vatɗin jak humam tisiya, nam humsiya.
ɗerwel tara kep ɗoy vok iramu,
kay humam ma gum kay nisi sa li nar kuɗumna,
sa sli semda valam kulona.
17Nisi ma muɗ goy ir vanu,
din mi Ma-Vatɗina vi vok-ma-duura,
nisi ma muɗ goy ir vanu hay buur ma nan kotomna;
nan ma li slugot kisiya,
ki san li slugot kay goora valam ma sunumna nala.
18Hay na'ta nigi ma wi ɓurawta
ta jar sa ma ɗigera hiɗi sa ma joona,
jar sa ma sun Lawna hiɗi sa ma may sunumɗina.
19May ɗuwgiya buur ma co'o,
namu ki kuta ta vidikka nala,
sa sli yam tuwsi kulo'o,
hiɗi sa sulukŋa kaf ma muɗ ki hosona nala,
buur namna ma min coon ɗawni nisi ma ŋal goyo,
din mi Ma-Vatɗina vi vok-ma-duura.
So'olsi ma ŋal goy lay,
humsi ma ŋal goy lay.
20May fatta vi ɗigerta ma day kulo'o
kigi nigi sa li nar kay semda vanu,
yerta-goyta ma co'o kuɗa' gilaŋatamu.
Nigi ma cuk goyo,
nigi ma pir kulo'o ki guro-luway ma jakayna nala.
21Nigi ma tay sa joona gaa kuɗ segiya,
nisi ma muɗ ki butuw-kuna gaa kuɗ segi nala,
kayni hay buur ma nan kotomna,
Din mi Ma-Vatɗina vi vok-ma-duura.
22Humgi ma gigi kay vun-ma-gatna vi Musus ma sunda vanu,
vun-ma-gatna ma nan vulumti kulo kay hiɗiyt Horeb,
Gatta hiɗi dita colita ta nan ɗo tam sa Israyel kafe.
23Humgiya, nan min gi Eliyas ma jobta tigiya,
jew a buura vi Ma-Vatɗin co'o,
buur namna ma ŋolo ma sa col digamɗi.
24Nam ma hot dik sumayn tam gurona visiya,
dik guron tam sumaysi lay,
kay a nan ma co ɓulak nagat goyɗi.
Currently Selected:
MALAKIYA 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
