LUKAS 19
19
Sakewus
1Yesu kal kulo'o hay hoyok-ziyna Yeriko, nam raw jaramu. 2Ɗuw na kayni, sa mara kepe yum Sakewus, nam mi sa ma ŋolla vi sa tar vun-lumuna, nam faray ŋolo kaw. 3Nam gar a wi Yesu a nam ir nanige. May nam asɗi, kuɗ sumuna, kay nam wuli giɗeŋe. 4Nam kal jaŋ voksiya, jik kulo hum gu-sikomora kay sar Yesu, kay Yesu min raw hay hagat na'ta. 5Hay li ma Yesu co hay liy namna, nam ɗuw kulo'o, dumu: Sakewus, jikaŋay gaa koloyo, kay nan min busa vo hay ziyna vaŋ vaydi. 6Sakewus jikay gaa gosoyo, nam vi Yesu hiɗi firita. 7Hay li ma sumun wi kayni, nisi kaf ŋurnaya di'e: Nam kalay mus vo hay ziyna vi sa ma sulukŋa. 8May Sakewus col vok Bum-Sumuna, nam dumu: Humaŋu Bum-Sumuna, gal farayna vanu nan vulum mi sa hawna, la nan yaw gurjut kay sa hiɗi dono'o, nan hot wurakamti sem fiɗi suwa. 9Yesu dumu: Vaydi su'da maawa kay ziyna tani, kay san zawni kaw mi goora vi Abraham. 10Kay goora vi sana maawa kay suɗ ma ay bay-goyna.
Law ma nir-niramna kay minna
Mat 25:14-30
11Hay li ma nisi hum kayni, nam di law ma nir-niramna mara'a lo, kay nisi ka goboy hiɗi Yerusalem. Nisi var ala mulda-Lawna ma ɗawn wulin de'. 12Nam di'e: Sa kep hay jafna vi mulda, nam kal haya nagata gineta kay fi mulda, bugolda nam ma hotaya. 13Nam yi sa sunda valamu doogo, vulsi minna#19:13 Minna slen ma jugoɗom gaa kuɗ nagat kafna: Ora, wayna, hiɗiy ma ŋaana, kawayna, mr. doogo kaw, di tisi ala: Dokgit yalamu, ta-ta hay li ma nan ma hotay tuwa. 14May sum sa hay nagata valamu ka gaw talamu. Nisi cuk sumun talamu kay dum ala: Numa may min ala san kayni ma ti mul kuma'aɗi. 15Hay li ma nam hotiyawa, bugol nam fi muldayawa, sa sunda sa nam vulsi gurjuta nam yisi ay talamu, kay nam min wi ala gige gige jarsiya doka' ya' gaage. 16Ma jewna ma'a di'e: Sam-ŋolla, minna vaŋu nan dokom yalamu, nan fi min na doogo lo. 17Nam dumu: Ŋaa'a, naŋ sa ma sunda ma ɗigera, kay naŋ li ɗigerta tam slen kiɗaya, may nan min tunaŋ guverner kay nagat doogo. 18Ma ma'na kaw co'o di'e: Sam-ŋolla, minna vaŋu nan dokom yalamu, nan fi min mara talam vasl lo. 19Nam dumu: Naŋ kaw nan tunaŋawa kay hoyok-ziyn vasl. 20Mara'a ma'a di'e: Sam-ŋolla, minna vaŋ kayni, nan ŋomom juni hay vun-sligar jun, 21kay nan li nar kaŋu, kay naŋu mi sa ma ɦiya, Naŋ yaw sle ma naŋ lakamis gaaɗina, naŋ feɗ sle ma naŋ cukum gaaɗina kaw. 22Nam dumu: Nan min ka kitat kaŋu kuɗ vunaŋu, naŋ sa ma sunda ma joona; naŋ wi ala nan mi sa ma ɦiya; naŋ wi ala nan yaw sle ma nan lakam gaaɗina, nan feɗ sle ma nan cukum gaaɗina kaw; 23Kay na'ta naŋ vul gurjuta vanu mi sa ni gurjutnaɗi kay mige? Kay hay li ma nan hotiyawa, nan ma fi gurjuta vanu hiɗi niya' kuɗa'a. 24Nam di tam nisi sa ay tokay hay liy namna ala: Sligi minna ma hay ɓalamna goyo, vulum mi nam ma fi minna doogona. 25Nisi dumu: sam-ŋolla, minna ka kalam doogo. 26Nan digiya, sa ma falam ka'ana, talamu ma vulumis lo, may sa ma falam mayɗina, va ma ka kalamna ma sliys goyo. 27May, nisi sa gaw kanu, sa min ala nan ti mulda kisiɗina, nigi marsi tani, ŋatsi goy vok iranu.
28Hay li ma Yesu di slen kayni dina, nam tun voksiya, ka tuɗ hay Yerusalem.
HAY YERUSALEM, MITTA HIƊI DAYTA-KULOTA VI YESU
Yesu kal kulo hay Yerusalem
Mat 21:1-9; Mark 11:1-10; Yoh 12:12-19
29Hay li ma nam co goboy hiɗi Betfage hiɗi Betaniya, gal hiɗiyta ya' Olive, nam cuk sa hatayna valam sara ma' goy sunu, 30disiya: Tuɗgis hay hoyok-ziyn ma vokgi ɗiger, hay li ma nigi cukawa kulo hayamu, nigi ma fi kuro joriyon juni zaw, kuro joriyo namna sa bay ɓe kalam tuwa, nigi ma butum goyo, maram tani. 31La sa jobgiyawa ala nigi butum goy kay mige ni, nigi ma dum ala Bum-Sumuna min li va hiɗi namu.
32Nisi sa nam cuksi sunna kaliya, nisi fi slen ki nam disi nala. 33Hay li ma nisi but kuro ma joriyona, sumiyamna disiya: Nigi but kuro joriyon kay mige? 34Nisi di'e: Bum-Sumun min li va hiɗi namu. 35Nisi maram tam Yesu. Nisi bar sligara visi kay kuro ma joriyona, mus Yesu kulo kalamu. 36Hay li ma nam ka raw vokomu, sumuna bar sligara visi goy hay hagata. 37Hay li ma nisi co hay Yerusalem, hay liy ma beɗna vi hiɗiyt Olive, vokŋa vi sa hatayna tun caw li firiya, nisi tun caw subur Lawna hiɗi delsi kulo ŋolo kay lop ma ŋulona ma nam lumna. 38Nisi di'e:
Bolda ka kay mulla,
Nam ma min ma'a hay semda vi Bum-Sumuna,
Toyta hay wuralawna,
Gajijita hay liy ma Kulo-Jamna.#19:38 fi kayni hay Nul 118:26.
39Sa Farisen sara'a jar tokŋa dumu: Bum-yalla, gataŋ sa hatayna vaŋu. 40May nam hotsi dita: La nisi ziŋa kaw, hiɗiyna ma siwela.
41Hay li ma Yesu co kulo goboy tam hoyok-ziyna, iram wi hoyok-ziyn na kayni, nam tun caw tiy kalamu. 42Nam di'e: Yayya Yerusalem! Lali nak kaw wi va ma vulag sle'ta hay buur ma vaydina ɗisu? May wulini nam ŋayay kiragu. 43May buur ka co kagu, mi buur ma sa gaw kagŋa ma gi zlaɓ tagu, nisi ma ŋuyagu, ma hebag hay galak kafe; 44nisi ma tok gaa'a, hiɗi gurona vag sa hayagŋa kafe, nisi ma hin hiɗiy mara kulo kay niramɗi, kay nak min wi buur ma Lawna co ɗuwagŋaɗi.
Yesu digiɗ sa li filiwn goy hay Tempella
Mat 21:10-16; Mark 11:15-18; Yoh 2:13-17
45Nam kal hay Tempella, sa gus slen goyna nam tun caw digiɗsi goyo. 46Nam disiya: Ɗot di ala, ziyda vanu ma li ti ziy ta siɗawna, may nigi muɗa'awa goy zulla vi sa coŋcoloŋŋa kayn litige?
47Dok-dok nam ka hat hay Tempella, may muliyan-sa-ɗifinna hiɗi sa wi-ɗota hiɗi sa ŋulona vi sumuna gar a cum goyo. 48May nisi fi hagatɗi, kay sumun kaf ka jaɓay kuɗumu.
Currently Selected:
LUKAS 19: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001