LUKAS 15

Ɦu-dimita ta bay goyta, gurjuta ta bay goyta

Mat 18:12-14

1Sa tar vun-lumuna hiɗi sa sulukŋa co goboy tam Yesu kay humumu. 2Sa Farisena hiɗi sa wi-ɗota tun caw ŋurnaya, nisi di'e: san kayni tap hiɗi sa sulukŋa, ti fun hiɗi nisiya kaw. 3May nam ka disi law ma nir-niramna ala: 4La san jargiya ka hiɗi fok-dimin kis-kepe, la tara ba kuɗum kepe ni, nam hin ma dok-zleeŋe yam zleeŋen hay fulda kay tuɗ gar ta ba-goyta ta-ta nam fa'a ɗisu? 5Hay li ma nam fa'awa, nam wata'ay pelem hiɗi firita. 6Hay li ma nam coowa vo'o, nam yi boniyomna hiɗi sugoliyomna disiya: firigi hiɗi nanu, kay ɦu-dimita vanu ta ba goy kanta nan fa'awa. 7Nan digiya: Nala kaw firita ma li hay wuralawna kay sa ma sulukŋa kepe ma hama, suw kay sum sa dok-zleeŋe yam zleeŋe sa hamɗina.

8Lebo, la cat ka hiɗi gurju drakma doogo, may la na' ba drakma mara kuɗum kepe, na' do fitilla, tok hay ziyd goyo, gar hiɗi ŋali, ta-ta na' fi gurjut tuwa ɗisu? 9Hay li ma na' fa'awa, na' yi boniyo' sa boyna hiɗi nuriyo'na sa ziyna disi ala: Firigi hiɗi nanu, kay gurju drakma ta ba goy kanta nan fa'awa. 10Nan digiya: firita ka jar sa sunda-wuralawna nala kaw kay sa ma sulukŋa kep ma hamna.

Goor ma viyuwna

11Nam di lo ala: San kepe gurona valam ka ma': 12Ma goora di bulum ala: Bunu, vulan ir farayna vanu. Bumna ɓuraw farayna valam jarsiya. 13Buur ne' bugolda, nam tok slena valamu, kalay hay nagata ta gineta, ɗawni nam ba slena valam goy kaf hay poyta viyuwta jar sa sulukŋa. 14Hay li ma nam ba slena valamawa kaf goyo, mayta ŋolda nig kay nagata na'ta. Sle ma hay ɓalamna vat goy kafe. 15Nam kal mus vok sa ma hay nagat na'ta kepe. San kayni gum goy hay sinena valamu kay ŋomom bagumna. 16Hayam dar a hob hiɗi gayaŋŋa ma bagumna mutumna, may sa ma vulumti mayɗi. 17Hay li ma yal dumawa dina, nam di'e: Sum sa li lop vo vi bun ka gaage gaage, nisi ka fi tina visiya, may nan ci tuwan goy tani kay mayta kayni litige? 18Nan min fok kulo'o tuɗ tam bunu dum ala: Bunu, nan li sulukawa kat wuralawna, kataŋ naŋ kaw, 19Nan nagay kay sa yan ala goora vaŋu loɗi. Naŋ ma ɗuwan ki nan mi kep jar sa li lop vo hay ziyna vaŋu ɦawa nala. 20Nam fokay kulo'o, ma tam bulumu. Hay li ma nam ay goy gine tuwa, bulum wumu, nam muɗ kiram haw ŋolo, nam jaŋ kiramu, bowomu, firiyimu.

21Goora di bulumu: Bunu, nan li sulukawa kat wuralawna, kataŋ naŋ kaw, nan nagay a sa yan ala goora vaŋ loɗi. 22May bulumu di tam sa sunda valamu: Marangi sligar ma ŋaan gosoyo cukum talamu, gum way ɓalamu, cukum tuguru selemu kaw. 23Margi goor-put ma jakayna, ŋatamu, nay taya, firiyay kaw. 24Kay goora van zawni ay miti waŋi, may muɗawa iriya lo. Nam ay bay goyo, may nan fumawa. Nisi tun caw li firi ŋolo.

25May goor ma ŋolla ay goy hay sinen tuwa. Hay li ma nam co goboy hiɗi ziyna, nam hum del dilla hiɗi liwta vi darayna. 26Nam yi sa mara ma vo hay ziyn kep, jobom ala li kayn mi mige? 27Nam dumu: Ɓasuŋŋa hotiyawa vo'o, buŋu ŋat goor-put jakaynawa, kay nam fum hiɗi tuwam goy ŋaa'a. 28May nam muɗ ɦiya, min kal kalafɗi. Bulumu tuɗ goy jiya, giɗelem delemu. 29Nam hot dit tam bulum ala: Humaŋ tige, busat ŋolo nan ka sunaŋu, fat tara kep kaw nan bay ŋelaŋ vunaŋ noŋo. May goor ɦu-mee kep kaw naŋ bay vulanti tuwa noŋo kay li firi hiɗi boniyonna. 30May goora vaŋ namna zawni ba slena vaŋay goy kuɗ boy sa viyuwna kafe, may hay li ma nam coyawa, naŋ ŋat goor-put ma jakayn kuɗum namu! 31Bulum dumu: Goora vanu, naŋ ka dok-dok hiɗi nanu, slena van pet mi faŋŋa; 32may kay li firi ŋolo kayn ŋaa'a, kay ɓasuŋŋa zawni ay miti mit, may nam muɗawa iri lo; nam ay baya, may nay fumawa.

Currently Selected:

LUKAS 15: Massana

Highlight

Copy