LUKAS 11

Siɗawta buma'a hay wuralawna

Mat 6:9-13; Mat 7:7-11

1Yesu kal goy hay liyn mara'a fat tara kepe kay siɗawa. Hay li ma nam vat siɗawta, kep jar sa hatayna valamu ka dum ala: Bum-sumuna, naŋ hatma siɗawta ki Yohana hat sa hatayna valamu nala. 2Nam disiya: Hay li ma nigi siɗawa, nigi ma di ala:

Buma'a hay wuralawna,

Hin semda vaŋu li goy peldete,

Hin mulda vaŋu ma'a.

3Vulma tina vuma ma numa

tum hay buurta kafna.

4Vulma gida kay sulukŋa vuma tage,

Ki numa kaw vul gida mi sa li

suluk katma nala.

Hinma cuk hay nemdaɗi.

Slen ma san as fum kuɗ siɗawta

Mat 7:7-11; Luk 18:1-8; Mat 15:22-28

5Nam disi lo ala: La sa jargiya banamna ka'a, nam tuɗ talam hay henjeta kay dum ala: Bananna, vulan fu bal ɦidi, 6kay banan mara'a co rogoy vo vanu, may va ma nan vulumti a ti'e mayɗi. 7Nam as hotom ditay kalafi hay ziyda pa ala: Naŋ makan tuwanɗi, vun-ziyn duki vatiya, nanu hiɗi gurona vanu numa buri gaa'a, nan as fok kulo kay vulaŋ fuɗi, nam as hotom dit nala su? 8Nan digiya: La nam min fok kuloɗi kay banamna makam tuwam kayn makiya kaw, nam ma va' talamu fok kulo'o, vulum va ma nam jobomtina. 9Nan digiya: Siɗawgiya, nigi ma fi slena, gargiya, nigi ma fi'e, dabgiya, vun-ziyn ma malis goy kigiya. 10Kay gigekaw ma siɗawa fi'e; sa ma gara fi kaw, sa ma daba, vun-ziyn ma malis goy kalamu. 11Jargiya, la goora job fun hay ɓam bulumu, bulum as vulum hiɗiyna hay baŋal fun su? Lebo la nam job kulufna, bulum as vulum guyna hay baŋal kulufn su? 12Lebo la goora job sena, bulum as vulumti ti ɦurduwta su? 13Kay na'ta nigi sa joon kaw, la nigi wi kay vul sle ma ŋaan mi gurona vigiya, nala bugi ma hay wuralawna ma vul Ŋusta-Peldetta mi nisi sa siɗawamu kaw.

Sa ma ful kalamu gidiŋi kaw yeray goyo

Mat 12:22-45; Mark 3:22-30

14Yesu digiɗ ful ma gidiŋŋa goyo hay sana, hay li ma fulla kalawa goyo, san tun caw di'e. Sumun kaf muɗi ɦuyum'. 15May segena di'e: Nam digiɗ fuliyan goy kayni hiɗi Beelzebul mulla vi fuliyana. 16Segena jobom ala nam lisi ɗekka ta may kulo'o wuralawni pa, kay nisi min wakamu. 17Hay li ma nam wi varta visiya, nam disiya: La mulda tarige kaw dur jar-tuwa'a, na' ɓulak goyo, ziyna ɦo gaa'a kay tuwamu kirɓicik kaw. 18La Satan ɓuraway jar-tuwamu, mulda valamu mus ta-ta ɗawni nanige? Kay nigi di ala nan digiɗ fuliyan goy kayni hiɗi donota vi Beelzebul. 19La nan digiɗ fuliyan goy kayni hiɗi donota vi Beelzebul, gurona vigi digiɗsi goy kayni hiɗi mige? Kay na'ta gurona vigiya ma ka kitata kigiya. 20May la nan digiɗ fuliyan goy kayni hiɗi cita-ɓam Lawna, nala mulda-Lawna coowa ta-ta jargi yo!

21Hay li ma sa ma donota tuwam koti ŋaa'a hiɗi sle ma duura valamu, nam ŋom slena valamu, slena valam laki ŋomi ŋaa'a kaw.

22May hay li ma sa ma dono suwum namu coowa, nam kol kalamu, nam yaw sle ma duura valamu ma nam tun vida valam kalamna goyo kaf. Sle ma nam tum ɓuraŋŋa nam as ɓurawam goy kaf kaw.

23Sa ma min tap hiɗi nanɗi, nam gaw hiɗi nanu, sa ma tok slen kulo hiɗi nanɗi, nam merem meri goyo.

24Hay li ma ful ma liwisna cukawa goyo hay san pa, nam raw hay hay liyn ma niyn mayɗina, gar tun-sukka. May hay li ma nam fi liynɗi, nam di'e: Nan min hot hay ziyna vanu ma nan kalay goyo hayam pana. 25Hay li ma nam hotawa, nam fi liyn toray goyo, kotay kaw. 26Hay na'ta nam kal goyo, yaw fuliya ma joo ma suwum namna siɗiya ay kuɗumu. Nisi cuk kalaf hay ziyna, lak hayamu kaw. San kayni makka ta nam fa'ta ɗawni suw ta jewta.

27Hay li ma Yesu ka law ki kayn nala, cat kep jar tokŋa ka siwel talam ala: sle'ta ka kay cat ta ziyaŋ haya'ta hiɗi miira va'a ma naŋ cumna. 28May nam hot dita: Sle'ta ka kayni kay nisi sa hum yoboyna vi Lawna, ŋomom hay diksiya kaw.

Nisi job ɗekka may Yesu minɗi

Mat 12:38-42

29Hay li ma sumun mol talamu, nam tun caw di'e: Jaf-sum sa wulin kayni mi jaf ma joona, nisi gar ɗekka; may ɗekka tara'a tara'a ma vulis tisi suw Yonas ma jobta-Lawna tayɗi. 30Kay ki Yonas li ɗekka tam sum sa Ninive, nala kaw goora vi sana ma li ɗekka tam sum sa vaydina. 31Cata-mulda ta kayamta ma fok kulo'o hay buura vi kitata hiɗi sum sa hay zaman ma vaydina, na' ma ka kitat kisiya, kay na' may goy hay vun dabaŋ-gu'ta vi nagata pa, kay hum yalla vi Salomon. Ɗuwgiya, ma ŋol suw Salomon ka tani. 32Sum sa hay Ninive ma yaw kulo'o hay buura vi kitata hiɗi jaf-sum nisina, nisi ma ka kitat kisiya, kay nisi ham kuɗ yoboyna ma Yonas kusumna, ɗuwgiya, ma ŋol suw Yonas ka tani.

Law ma nir-niramna kay fitilla

Mat 5:15; 6:22-23

33Hay li ma san do fitillawa, nam as tunum goy ŋayaya lebo gaa'a kuɗ gilikŋaɗi, may nam tunum kulo kay va ma tun fitil kalamna, kay nisi sa cuk kalafi ma wi haraŋa. 34Iraŋ kayni mi fitilla vi tuwaŋu. La iraŋ ka ŋaa'a, tuwaŋ pet hobay hiɗi haraŋa, may la iraŋ moyo, tuwaŋ pet muɗi jufunu.

35Kay na'ta li ŋali kay haraŋa vaŋu ma muɗ goy jufundaɗi. 36Kay na'ta la tuwaŋ kaf hobawa hiɗi haraŋa, la jufunda ne' kaw mayɗi, tuwaŋ kaf ma fo goy haraŋi, ki hay li ma fitilla ka li haraŋ kaŋu nala.

Yesu law sa wi-ɗota hiɗi sa Farisena

Mat 23:1-36

37Hay li ma Yesu ka di yoboyna, sa ma Farisena kep jobomu kay nam ma tuɗ ti vo valamu. Nam kal vo'o, tun caw ti funa. 38May hay li ma sa ma Farisena wi ala Yesu muz ɓalam jew tinɗi, nam muɗ ɦuyum'. 39May Bum-Sumuna di talamu: Nigi sa Farisena, kaway ma cina hiɗi tasana nigi muzum ŋorom goyo, may haygi kalafi hobawa hiɗi kulda hiɗi jiw-zlata. 40Nigi sa ɦay-ɦayna, nam ma li ŋor slena, nam li sle ma hay kalafna kaw ɗisu? 41May vulgit ti vulda minda ta may goy haygi kalaf pata, nala slen pet ma muɗ goy bay-gese kigiya.

42Joot kigiya, nigi sa Farisena, kay nigi vul gal ma doogona vi Minte hiɗi ruwe#11:42 minte hiɗi ruwe Minte mi ɓona vi gun ma his ŋaa'a, ruwe mi ɓona vi us ma his ŋaa'a kaw. hiɗi hadafn pet, may ɗigerta hiɗi minda tam Lawna nigi li muray hiɗi na'a. May ŋaata nigi as lumu bay hin mara goyɗi.

43Joot kigiya, nigi sa Farisena, nigi min lak hay zlamayn ma vokŋa hay sinagogayna, nigi min gi-deɓta hay lumuna kaw. 44Joot kigiya, kay nigi ŋray ca hiɗi yam-usna ma sahay goyna, ma sumun poy kulo kalamu bay wumu.

45Sa kep jar sa wi vun-ma-gatna sli ditiya dumu: Bum-yalla, hay li ma naŋ di slen kayni, naŋ ŋulmaawa. 46May Yesu hot dita: Joot kigi nigi kaw, nigi sa wi vun-ma-gatna, kay jakŋa ma nekŋa ma ziy lop ŋolo nigi tunum kay sumuna, may nigi kay tuwgiya tun cita-ɓigi talamɗi. 47Joot kigiya, nigi sa muw yam-usna vi sa jobta-Lawna, may cisi goyo si sumaygiya. 48Nala nigi wi sle ma sumaygi lumna, nigi tap vungiyawa hiɗi lopna visi kaw, kay nisi ci sa jobta-Lawn goyo, may nigi muw yam-usna visiya.

49Kuɗ kayni yalla vi Lawna di ala: Nan min cuk sa jobta-Lawna hiɗi sa apostolayna tisiya, segena nisi ma cisi goyo, segena nisi ma lisi lasi. 50Kay busuwna vi sa jobta-Lawna kaf ma ɦok goyo tun caw tam kotta vi nagat pana, ma jobis tam jaf-sum nisina. 51Tun caw tam busuwna vi Abel pa, ta-ta tam busuwna vi Zakariya ma nisi cum goyo jar giwin-ma-ɗifinna hiɗi Tempella. Awa, nan digiya: Busuwna visiya ma jobis tam jaf-sum nisina.

52Joot kigiya, nigi sa wi vun-ma-gatna, kay nigi sli klena vi yallawa goyo, nigi kay tuwgiya kal kalafɗi, nisi sa min cuk kalafi nigi telsiyawa kaw.

53Hay li ma nam kal goy ɗawni pa kalla, sa Farisena hiɗi sa wi-ɗota tun caw a som dono'o kay nam ma lawsi kay slen ŋolo, 54nisi gan jawt vokomu, kay nilam va goy vunamu.

Currently Selected:

LUKAS 11: Massana

Highlight

Copy