TIYNA VI YEREMIYAS 5
5
Siɗawta vi sum sa ka hay curoɗa
1Ma-Vatɗina, humaŋ ma gaŋ kay slen ma co kuma'na gi ge!
Ɗuwaŋu, saraŋ tige numa muɗi zulo'o.
2Vocota vuma'a muɗi goy vi sum sa pulla,
ziyna vuma' vuli mi sum sa sa may wisiɗi.
3Numa muɗi kuyu'u, bay bumu:
Sumayma sa boyna muɗi ki boy sa duhulla nala.
4Niy ma cina numa gusum gusiya,
gu ma ŋalla co tuma kayn numa gusumay gusiya.
5Sum sa lasma'na ka jaɓi kulo bugolma lak';
sutayma tooya,
sa may hinma tun-sukka noŋɗi.
6Numa meɗ ɓuma'a tam sum sa Egiptena,
kat sum sa Asiriyana kay nisi hobma hiɗi funa.
7Sumayma li sulukawa,
may wulini nisi say loɗi,
may ziy nekka vi sulukŋa visi wulin kayn si numa'a.
8Sa gorvona ka ti mul kuma'a,
sa ma as butma goy hay ɓisi mayɗi.
9Tina vuma numa garam kayni hiɗi mitta buri galma waŋ',
kay numa ka tupa dig kew-gaferaŋa ma may ful pana.
10Tuwma ka giy ku keŋ ki giwinna nala,
kuɗ mayta ta ka cuma'ta.
11Nisi bur hiɗi boyn dono'o hay Siyon,
bur hiɗi guro-boy sa wayan dono'o hay hoyok-ziyna vi Yuda.
12Hiɗi ɓisiya,
nisi ɓal sa ŋulon kulo kat guna;
sum sa maariyana sa ma slisi yisi kulo mayɗi.
13Sum sa joriyona ziy hiɗiyna,
gurosguray sa joriyona ka tuwur gaa kuɗ gu ma nisi ziyimna.
14Sum sa maariyana may lak goy vun-gala loɗi,
sum sa joriyona nul ma gina muɗi kirsi bisi.
15Dikma muɗi min firit loɗi,
demerena vuma'a muɗi goy ɦehe'e.
16Bogoray ma kuma'na nigawa gaa'a.
Joot kuma'a, kay numa li sulukawa.
17La dikma ka ci lasta,
la irma muɗi jufunu,
18kayn kuɗ ta ala hiɗiyta vi Siyon vurumiya,
kayn kuɗ ta ala cekemna ka poy haya.
19Naŋ Ma-Vatɗin hayɗini, mulda vaŋ may vatɗi.
Zlamda-mulda vaŋu ka tam jafsi voksi lo lo.
20Yaŋ as jokma kay dok-doko kay mige?
Naŋ as hinma goyo hay buura vi irita vuma kafe kay mige?
21Hotma'ay kataŋu Ma-Vatɗina,
numa min hotiya,
vulma buura lo ki jew nala.
22Naŋ noyma goy kayn kay dok-doko su?
ɦiyda vaŋu ɓaŋ kal ta' kayn ki kayn nala su?
Currently Selected:
TIYNA VI YEREMIYAS 5: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001