YOSUWA 23
23
Yosuwa vulsi gatta
1Liyn kalay ŋolo bugol buur ma Ma-vatɗina vul tun-sukka mi sa Israyella goy hay ɓam sa gawt kisina, sa ŋuyi galsina. Yosuwa kaw muɗi maari, busata valam kalay ŋolo. 2Yosuwa yi sa Israyel talam kaf, sa maariyana valamu, sa ŋulona valamu, sa ka kitana hiɗi sa ŋulona vi sojena valamu. Nam disiya: Nan muɗi maari, busata van kaliya. 3Nigiya, va ma Ma-Vatɗina Lawna vigiya lum tam sum nisin lakŋi kaf kuɗgi nigiya nigi wum kafe; kay Ma-Vatɗina Lawna vigiya dur hay baŋalgiya mi namu. 4Ɗuwgiya, sum sa nigi bay sli nagata visi tuwana nan ŋaɓ nagata visi kuɗ ɦayta kay vulgita, hay vun Yordan pa, hiɗi jaf-sum sa nan vatsi goyn kaf, ta-ta tam niy-lum ma ŋolla hay liy ma fatta ɗig gaana. 5Ma-Vatɗina Lawna vigiya ma digiɗsi goy vokgiya, nigi ma vurna hay baŋalsiya, ki Ma-Vatɗina Lawna vigiya di tigi nala. 6Nigi ma li tuwgi dono'o kay li kuɗ vun-ma-gatna, kay ŋom slen kaf ma ka ɗoy hay ɗerwelda vi gatta vi Musus, nigi ma cal goy jufɗi, cal goy gulɗi kaw, 7kay rigas tuwgi hiɗi jaf-sum sa ka laki hiɗi nigi tannaɗi. Nigi ma yi sem lawayna visi kulo hay vungiɗi, yi va kigi hiɗi semda valamɗi kaw; nigi ma sun lawayna visiɗi, girif gaa vokomɗi kaw. 8May nigi ma jun tuwgi tam Ma-vatɗina Lawna vigiya, ki nigi ka li'e ta-ta vaydi nala. 9Jaf-sum sa ŋolo, sa dono'o kaw, Ma-Vatɗina digiɗsi vokgiya; ta-ta vaydi kaw sa ma as col dikgi mayɗi. 10San kep jargi digiɗ sum birimi, kay Ma-Vatɗina Lawna vigiya ka dur hay baŋalgiya, ki nam di nala. 11Ligi ŋal mi tuwgi ŋaa'a, mingi Ma-Vatɗina Lawna vigiya. 12La nigi cal goyo, la nigi jun tuwgi tam jaf-sum segen sa ka galgin lakŋi, la nigi tun slita jargiya hiɗi nisiya, la nigi rigas hiɗi nigiya, 13wigi goy ŋaa'a ala ma-Vatɗina Lawna vigiya ma digiɗ jaf-sum nisin vokgi dok-dokɗi; may nisi ma lak vokgiya ki dena hiɗi jawta ta ganayt nala, ki libetna ma watgi kuɗgiya hiɗi zigiyna ma jikgi kirgi nala, ta-ta nigi ma vat goyo hay nagat na'ta ta ŋaata ta Ma-vatɗina Lawna vigiya vulgiya.
14Ɗuwgiya, vaydi nan min tuɗ hay hagata ta sum sa hay nagat kaf ka jik haya'ta, vaydi hay dikgi kaf, hay ciwta vigi kaf nigi ma wi ala, yoboyna ma Ma-Vatɗina Lawna vigiya dum tigi kafna, vunam hobay kafe, mara kep kaw hin goy bay vunam hobɗi. 15Awa, ŋaa'a! Ki yoboyn ma ŋaana ma Ma-Vatɗina Lawna vigi dum kigina vunam hob kulo'o nala, yoboy ma joona ma nam dum kigina kaw vunam ma hob kulo'o, ta-ta nam ma vatgi goyo, gaa kay nagat na'ta ŋaata ta nam vulgit kayni kafe. 16La bonota ta Ma-Vatɗina vigi juna' hiɗi nigit kayni nigi noya' goyo, la nigi tuɗ girif lawayn mara'a, sunumu kaw, ɦiyda vi Ma-Vatɗina ma fok kulo katgiya, nigi kaf ma vat goyo hay nagata ŋaata na'ta ta nam vulgiya.
Currently Selected:
YOSUWA 23: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
