YEREMIYAS 3
3
1Dit di ala: Hay li ma san gi cata valam goyo,
la cat na'ta hinimawa muɗ goy cata vi sa mara'a,
san kayni as hot kat cat na'ta lo su?
La nala nagat noŋ kaw ma muɗ liwisɗi su?
May nigiya, nigi muɗ tuwgiyawa viyuwu hiɗi sum sa cilena ŋolo,
nala nigi hotay katan ɗawn hottige?
Din mi Ma-Vatɗina.
2Cukgi irgi gal kulo'o ɗuwgi tige,
nigi may muɗ tuwgi viyuwɗi su?
Nigi lak hay hagata,
ki sa Arabna hay fulda nala,
nigi muɗ nagatawa liwisi
hiɗi viyuwta vigiya hiɗi joota vigiya.
3Niyna teli kulo'o;
niy ma menda min siɗi,
may nigi min li tuwgi dok-dok ki boy sa viyuwna nala,
nigi min li zuloɗi.
4Wulin kayni nigi ka siwel tan ala «bunu» ɗisu?
Nigi ay si boniyonna hay joriyota vigi pa.
5Nam ma ŋom ɦiyda valam dok-dok su?
Nam ma ŋoma'a ta-ta hay vatɗita su?
Humgiya nigi ka di ala:
nigi li sle ma ci-matna,
nigi dab yam ɦiyda vigiya.
Gatta kay hamda
6Ma-Vatɗina di tanu,
hay liyna vi mulla Yosiyas:
Slen ma sum sa Israyel sa bay-vina ka lumna nigi wumawa su?
Nisi tuɗi kulo kay hiɗiy ma ɗiŋiriŋŋa kaf,
nisi tuɗi gaa kuɗ gu ma goɗayn kaf,
ɗawni nisi muɗ tuwsi viyuwu.
7Nan di'e: Bugol nisi li slen kaynawa lina,
nisi ma hotay katanu.
May nisi may hotayɗi.
Ɓosiyosina, sa wi gatɗina hay jafna vi Yuda wi kayni hiɗi irsi kafe.
8Kuɗ digiɗ ma nan digiɗ Israyel sa bay-vin goyo,
kuɗ zlata-bulota visi pete,
kuɗ ta nan vulsi ɗerwel ma ɓuraw jar cata hiɗi jufna,
nan wi ala ɓosiyosina sa hay jafna vi Yuda
sa wi gatɗina tuwsi min li narɗi,
nisi kalay muɗ tuwsi liwis nala kaw.
9Kuɗ liwista visi ta siwel goy kisita,
sum sa Israyel muɗ nagatawa liwisi,
nisi li zlata-bulotawa hiɗi hiɗiyna,
hiɗi guna kaw.
10hiɗi kayni kafe,
ɓosiyosina sa hay jafna vi Yuda sa min gatɗina
min hotay hiɗi diksi kafɗi,
nisi li kayni hiɗi sinda, din mi Ma-Vatɗina.
11Ma-Vatɗina di tanu:
Israyella sa bay-vina ɗuw ir ɗigere,
hay li ma ŋrasi hiɗi jafna vi Yuda sa hum gatɗina.
12Tuɗaŋu, siwelaŋ yoboyn kayni hay gal ma gaana,
naŋ ma di ala:
Hotgiyaya, Israyella sa bay-vina,
din mi Ma-Vatɗina,
nan ma cuk iran kigi hiɗi ɦiy loɗi,
kay nan mi sa ma slugo'o, din mi Ma-Vatɗina.
Nan may ŋom ɦiyda vanu kay dok-dokɗi.
13Nigi ma wi jiw-zlata vigiya tuta,
nigi ma wi ala nigi ay si sum sa bay vi kuɗ Lawna,
Ma-Vatɗina vigiya,
wigi ala nigi tun segi hay liyn kaf kat laway ma pulla,
gaa kuɗ gu ma ŋulomna kafe,
nigi min human vunanɗi, din mi Ma-Vatɗina.
14Hotgiyaya, guro sa ŋel-gatta, din mi Ma-Vatɗina,
kay nanu mi mulla vigiya,
nan ma yawgi ay goy kep kep hay hoyok-ziy ma kepna,
ma' ma' kuɗ jaf ma kepna,
nan ma nargi hay Siyon.
15Nan ma vulgi sa ŋomda sa kuɗ minda vanna,
nisi ma ŋomgiya hiɗi yamda-wida hiɗi hagata ŋaata.
16Hay li ma nigi biyawa ŋol dak-daki hay nagata,
hay buur namna ɗawni,
sa as law kay timgilla vi bonota vi Ma-Vatɗin loɗi;
sa as var kay kayn loɗi,
sa as di va kalam loɗi,
la nam ka'a lebo mayɗi kaw,
hum sa as gum kay kayn noŋɗi,
sa as kot timgil mara loɗi,
din mi Ma-Vatɗina.
17Hay buur namna ɗawni,
Yerusalem nisi ma ya' ala zlamda-mulda vi Ma-Vatɗina;
jaf-sumun kaf ma tok tuwsi hay Yerusalem,
hay semda vi Ma-Vatɗina,
nisi ma tap kuɗ varta joota vi diksi loɗi.
18Hay buur namna ɗawni,
jafna vi Yuda ma poy kuɗ tuwsi hiɗi jafna vi Israyel;
nisi ma may kuɗ tuwsi pa hay nagata ta gal gaata,
hay nagata ta nan vula' voco'o mi sumaygiya.
19Nan di'e: Nan lakgi jar gurona van ɗawn laktige?
Nan ma vulgi nagata ta yulumta,
nan ma vulgi ganna ma ŋaa'a suw fi jaf-sum segen kaf ɗawn vultige?
Nan di'e: Nigi ma yan ala «buma'a»,
nigi ma cal goy hiɗi nan loɗi.
20May ki cata ɗut cilena va' nala,
nigi kaw min vi kuɗanɗi,
jafna vi Israyel, din mi Ma-Vatɗina.
21Della ka siwel hay liy ma ɗiŋiriŋŋa;
kayni mi tiyna,
mi giɗel-della vi gurona vi Israyel;
kay nisi slugut hagata visiyawa,
yisi jok Ma-Vatɗina Lawna visiyawa.
22Hotgiyaya, guro sa ŋel-gatta,
nan ma vul gida kay bay-vida vigiya.
Numa lakŋi, numa tuɗ taŋu,
kay naŋu mi Ma-Vatɗina, Lawna vuma'a.
23Awa, suwana ma may kulo kay ɗiŋiriŋŋa
hiɗi hiɗiyn pa kayn mi sini;
Awa, su'da vi Israyel may goy vi Ma-Vatɗina Lawna vay pa.
24Lawayn ma waana nam vat vuɗna vi lopna vi sumiyaya
hay joriyota vay pa,
fok-dimina visiya hiɗi luwayna visiya,
guro-jufayna hiɗi guro-boyna visiya.
25Va ma buura vuma' mi zulota,
va ma bar kuma'na ti zulota ŋolda;
kay numa li sulukawa kat Ma-Vatɗina Lawna vuma'a,
numa'a hiɗi sumayma'a,
hay joriyota vuma pa ta-ta vaydi,
numa min hum del Ma-Vatɗina Lawna vuma'ɗi.
Currently Selected:
YEREMIYAS 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
