SA KA KITANA 11

1Hay Galaad sa ma juf ma wi duur ka kep yum Yefte, namu mi goora vi cata viyuwta; sa ma vuɗumna yum Galaad. 2Cata vi Galaad vuɗum guro sara'a kaw. Guro nisina hay li ma nisi muɗ ŋulo muɗna, nisi digiɗ Yefte goyo. Nisi dumu: Naŋ as yaw vocota vi buma'ɗi, kay naŋ mi goora vi cata ta may goy pul pa. 3Nala Yefte pir malam goy gine'e, nam hin guro-biyomna, tuɗ mus hay nagat Tob. Sum sa ɦay-ɦayna tok tuwsi talamu, nisi kal goy ŋuy liyn kuɗ tuwsiya.

4Mus bugolda neeɗa kayni, gurona vi Amon dur sa Israyella. 5Hay li ma gurona vi Amon ka li duura hiɗi sa Israyel ki kayn nala, sum sa ŋulona vi Galaad gi sunda tam Yefte hay nagata Tob. 6Nisi di tam Yefte: naŋaya, tunaŋ ŋol kuma'a, nay duray gurona vi Amon. 7Yefte hot dit tam sa ŋulona vi Galaad: Nigi lakŋi si sum sa kaan gawna ɗisu? Digiɗan goy hay ziyna vi bunu ɗisu? Wulini hay li ma sum-zlat figiyawa ni, nigi hot garan lo kay mige?

8Sum sa ŋulona vi Galaad di tam Yefte: Wulini numa hotiyawa kuɗaŋu, ŋaat naŋ tapaŋ hiɗi numa'a, naŋ ma dur gurona vi Amon, naŋ ma lin mi ŋolla vuma'a, ŋolla vi sum sa Galaad kaf kaw. 9Yefte hot di sum sa ŋulona vi Galaad: La nigi min ala nan tap hiɗi nigiya kay dur sum as Amonna, hay li ma Lawn vulsiyawa hay ɓanu ni, nan ma li mi mulla vigiya. 10Sum sa ŋulona vi Galaad di tam Yefte: Sle ma nay dumna lakŋi, Lawn ka humumu, la numa li kuɗumɗi, Lawn ma ka kitat kuma'a.

11Yefte tap kuɗ sa ŋulona vi Galaad. Nisi tunum kulo ŋol kisi ki mulla visi nala, nisi tunum mi ŋolla vi vok-ma-duura visi kaw. Yefte yi va kalam kuɗ yoboyna ma nam dumna kaf vok Lawna hay Mispa.

Nisi kol kay sum sa Amonna

12Yefte cuk sumun tam mulla vi sa Amonna, kay dum ala: Naŋ co dur nagata van kayni va ma ka jaran hiɗi naŋu mi mige? 13Mulla vi Amon hot disiya kay nisi ma tuɗ di Yefte ala: Nan min duraŋ kayn kay mige su, hay li ma sa Israyella kalay goy hay nagata Egipte pa kayni, nisi sli nagata vanu, vuna'ay Arnon zaw ta-ta Yabok, ta-ta vun Yordan zaw, wulini naŋ hotan nagata van bay lawi.

14Lo Yefte cuk sum sa sunda sem mara lo tam mulla vi Amon, 15kay nisi ma tuɗ dum ala: Nan Yefte ka dumis ala: Sum sa Israyella may sli naga vi sa ma Mowabɗi, may sli naga vi gurona vi Amonɗi lay. 16Kay hay li ma sa Israyella kal ay goy hay Egipte pa kayni, nisi poy hay fulda, ta-ta vun niyn ma slawna, ta-ta nisi co hay Kades. 17Bugol kayni sa Israyella gi sunda tam mul ma Edomna kay dum ala nam hinsi jikis hay nagata valamu, may mul ma Edomna min hinsiɗi, Nisi gi sunda tam mul ma Mowabna, nam minɗi lay. Sum sa Israyella lak misi hay Kades nala. 18Bugol kayni nisi sli hagata ta fulda, ŋuy goy gal nagat Edom hiɗi nagat Mowab. Nisi co hay gal ma kuɗuwna vi nagat Mowab, nisi vi guɗukŋa visi goy bugol nagat Arnon, min tun tun sesi kulo hay nagat Mowabɗi, kay vun nagata vi Mowab dab kayn hay Arnon. 19Sa Israyella cuk sumun tam Sihon mulla vi sa Amoriyana, mulla vi Hesbon, nisi dum ala nam hinsi jik hay nagata valamu ta-ta nisi kal hay liyn ma nisi na hayamna. 20May Sihon min vi dita visiɗi, nam tok sojena valamu, nisi tok tuwsi hay Yahat, nisi fok duura hiɗi sa Israyella. 21May Ma-Vatɗina Lawna vi sa Israyella vul Sihon hiɗi sumuna valam kaf hay ɓam sa Israyella; sa Israyella kol kisiya, sa Amoriyana sa lakay ziy hay liy namna kaf, sa Israyella sli nagat kisiya. 22Nisi yaw nagata vi sum sa Amoriyan noŋ kaf, tunis hay Arnon pa ta-ta hay Yabok, hay fultis pa ta-ta hay Yordan dab'. 23Wulin kayni vulma nagata vi sum sa Amoriyan kayni mi Ma-Vatɗina Lawna vi Israyel, may naŋu naŋ var ala naŋ as sla' kuma'a su? 24Nagat ta lawna vaŋ Kemos vulaŋgita may asaŋɗi su? Lebo naŋ var ala nagat ta Lawna vuma' vulmat mumata numa ma hina' goy hin su? 25Lebo naŋu, Balak goora vi Sippor mul ma Mowabna naŋ suwum su? Nam gar lawt hiɗi sum sa Israyel gar su? Lebo nam dur hiɗi nisi dur su? 26Wulin kayn busat liy kis-hiɗi Israyel ka li ziy hay Hesbon hiɗi naga guray ma gala'na, hay Arower hiɗi naga guray ma gala'na, hiɗi hoyok-ziyn ma ŋulona ma ka goboy kel Arnon, hay li namna pa nigi min sli naga namnaɗi kay mige? 27Nanu, nan may min gar law hiɗi naŋɗi, may naŋu, naŋ ka lan joota, li duur hiɗi nanu kaw. Vaydi kayni gurona vi Israyel hiɗi gurona vi Amon Ma-Vatɗina ma ka kitata ta jarsita. 28Sunda ta Yefte ga' tam mulla vi Amon nam min huma' noŋɗi.

29Ŋusta vi Ma-Vatɗina cuk kay Yefte, nam jikis hay Galaad hay galla vi Manase pa, cap hay Mispe vi Galaad, hay Mispe vi Galaad zaw, nam cap kay gar liy gurona vi Amon.

30Yefte yi va kalamu vok Ma-Vatɗina di'e: Ma-Vatɗina, la naŋ vulan gurona vi Amonawa hay ɓanu ni, 31hay li ma nan hotay vun duura pa hiɗi dikan sleɗayn ɗawni, sa ma kaliyawa goy kiran jewe hay ziyna van pana, nan ma lum goy taŋ ɗifini hiɗi ɗifin ma ŋal-goyna.

32Yefte tuɗ mok gurona vi Amon, Ma-Vatɗina vulsi hay ɓalamu, 33nam kol kisi dono ŋolo, tun cawis hay Arower pa ta-ta hay gal Minit, jar liyn ma hoyok-ziyn ma ŋulo dok-ma' ka hayna, ta-ta hay Abel-Keramim, Gurona vi Amon muɗi las ŋolo vok gurona vi Israyel.

Goota vi Yefte

34Hay li ma Yefte hotay vo hay ziyna valam hay Mispa kayni, goota valam kal ay goy kiramu hiɗi darayna hiɗi nulla. Na' kep kayn ti goota valam ta', goor valam ma juf mara mayɗi, ta ca tara tayɗi kaw. 35Hay li ma Yefte iram wa' na kayni, nam jet sligar ma talamna goyo ka di'e: Yaya! Goota vanu, nak ton sutiyan nala kay mige? Nak kaw jar sum sa makanna lay. Wulin kayni, nan yi va kan vok Ma-Vatɗina, nan as hot goy bugolanɗi. 36Na' di tam bu'a: Bunu, la naŋ yi va kaŋ vok Ma-Vatɗina ni, naŋ ma li tanu ki va ma kalay goy hay vunaŋ pa nala. Kuɗ kayni Ma-Vatɗina vulaŋ donota kay kol kay gurona vi Amon sa gaw kaŋŋa. 37Na' hot di tam bu' lo: May bunu, nan min ala naŋ hinan goy butiya ir til ma', nan min yaw nuriyonna kuɗanu tuɗ kulo kay hiɗiyta, tiy wayata-pasiyakka vanu.#11:37 Va ma muɗi tani ala wayata-pasiyakka kayni ti goot-cata ta wayata ta bay bur tam sa juf tuwa. 38Nam hota' dita: Tuɗagu. Nam hina' goy butiya ir til ma', na' tap nuriyo'n kuɗa'a, tuɗ kulo kay hiɗiyta, tiy wayata-pasiyakka va'a. 39Hay li ma til ma ma'n vatawana, na' hotay tam bu'a, nam li ɗifin hiɗi na'a ki vunam ma di goyn nala. Na' may buri tam sa noŋɗi. Hay na'ta pa lawt kayni hin jar sa Israyella ala: 40Busat kaf kayni gurona vi Israyel fi tuwsi kulo kay hiɗiyta ir buur fiɗi kay tiy goota vi Yefte ma Galaadna.

Currently Selected:

SA KA KITANA 11: Massana

Highlight

Copy