CAWA'TA TUNITA 48

Yakub gi bol mi gurona vi Yosef

1Bugol slen kayni, nisi mar labara tam Yosef ala: Humaŋu, buŋ ka moyo. Nam yaw gurona valam sa ma'na kuɗumu: Manase hiɗi Efrayim. 2Nisi ka di Yakub goy jew ala: Humaŋu, goora vaŋ Yosef ka tuɗi taŋu. Nala Israyel va' talam dono'o, mus kulo kay va ma buura valamu. 3Yakub di tam Yosef: Lawn ma Gaŋeraŋ-Petna vul tuwam kiranu hay Luz, hay nagat Kanaan, nam gan bolo. 4Nam dan ala: Naŋ ma vuɗ jafn ŋolo, nan min biyaŋ jafaŋ ŋolo, nan min muɗaŋ goy bum jaf-sumun ŋolo, nagat waŋŋi nan min vula' mi jafna vaŋ ma bugolaŋŋa, kay na' ma muɗ goy visiya dok-doko. 5Wulin kayni gurona vaŋ sa ma' sa vuɗi hay nagat Egipte jew mata vanu, nisi ma muɗ ir vanu; Efrayim hiɗi Manase, nisi ma muɗ ir vanu, ki Ruben hiɗi Simeyon nala kaw. 6May guron sa naŋ vuɗsi bugolsina nisi ir vaŋu; nisi ma fi yita kay fi gal ɓurawta visi ɗawn hiɗi sem ɓosiyosina. 7Hay li ma nan hotay hay Padan pa, Rakel mit hay hagata, na' mit hay ɓanu, hay nagat Kanaan, jar liyn neeɗa hiɗi Eufrata, nan pa' ɗawni, hay hagata vi Eufrata ta ya' Betlehem.

8Israyel ɗuw gurona vi Yosef, nam di'e: Nisi lakŋi si sarige? 9Yosef hot dit mi bulumu: Nisi kayni si gurona vanu, sa Lawn vulanti tanna. Israyel di'e: Nan siɗawaŋu, marsi tan goboyo, kay nan gisi bolo. 10Ir Yakub muɗi neke kay maarta, nam as ɗuw loɗi. Yosef mar guron kulo tam bulumu. Israyel bowsi kulo digamu, nam ŋaf vunam hiɗi nisiya. 11Israyel di tam Yosef, nan may varay ala nan ma waŋ iraŋu loɗi, may wulin kayni Lawn hinanawa wi jafna vaŋ noŋo. 12Yosef yawsiyay goy hay ɓal bulumu, nam girif gaa kay nagat vokomu. 13Bugolda Yosef yawsi ma' pete, nam vi Efrayim hiɗi balam ta jufta maram hay gal ma gulla vi Israyel, nam vi Manase hiɗi ɓalam ta gulda, maram hay gal ma jufna vi Israyel, nam tersi kulo tam bulumu. 14Israyel meɗ ɓalam ta jufta goyo, tuna' kay Efrayim ma goora, nam tun ɓalam ta gulda kay Manase, nam tun ɓalam kayni hiɗi tap-wida, kay Manase mi ma vuɗi jewna. 15Nam gi bol kay Yosef, nam di'e: Lawna ma sumiyan Abraham hiɗi Isaak poy vok iramna, Lawn ma ŋoman hay poyta vanu hay vu'da van pa ta-ta vaydina, 16Sunda-wuralawna ma butan goy vun law ma joon kafna, gaŋ bol kay guron lakŋi. Ma yisis hiɗi semda vanu hiɗi sem sumiyanu Abraham hiɗi Isaak yige. Lisi a nisi biya ŋolo hay nagata biyage.

17Hay li ma Yosef wi ala bulum tun ɓalam ta jufta kay yam Efrayim kayni, dikam may li ŋaaɗi, nam mok ɓam bulumu, kay sla' goy kay yam Efrayim, kay joka' kay yam Manase. 18Yosef di tam bulumu: May naɗi bunu, kay hen zawni mi ma vuɗi jewna, tunaŋ ɓaŋ ta jufta kalam hay'. 19Bulum min viɗi, nam dumu: Kiranta ta'! nam kaw ma muɗ mi jaf-sumu, nam kaw ma muɗ ŋolo, may ɓasulum ma goora ma muɗ ŋol suwumu, jafna valamu ma li ŋol dak-dak. 20Nam gisi bol hay buur na'ta, nam di'e: Sumun ma gi bol ɗawn hiɗi segi nigiya, kay sumun ŋolo ma di ala Lawn muɗaŋ ki Efrayim hiɗi Manase nala. Nala nam tun Efrayim vok Manase. 21Israyel di tam Yosef: Humaŋu, mitta vanawa, may Lawn ma li hiɗi nigiya, nam ma hotgi goy hay nagata vi sumaygiya. 22Nan min vulaŋ va mara goy suw guro-biyoŋŋa, kayn di ala galla ma nan slum hay ɓam sum sa Amoriyan hiɗi kew-gaferaŋa vanu hiɗi ɓarawta vanu.

Currently Selected:

CAWA'TA TUNITA 48: Massana

Highlight

Copy