CAWA'TA TUNITA 46

Jafna vi Yakub coowa kay li ziy hay Egipte

1Israyel kaliya, hiɗi slen ma ir valamna kafe. Nam co hay Ber-Seba, nam li ɗifin tam Lawna vi bulum Isaak hay liy namna. 2Lawna vul tuwam kir Israyel hay henjeta, nam dumu: Yakub, Yakub, Yakub! Israyel hot dita: Nanis zawni. 3Lawn di'e: Nanu mi Lawna, Lawna vi buŋu. Laŋ nari kay kal hay nagat Egipteɗi, kay ɗawni nan min muɗaŋ jafaŋ ŋolo. 4Nan kay tuwanu ka kuɗaŋ ɗawni hay Egipte, nan kay tuwanu ma hotaŋay goy hay Egipte pa, Yosef ma paŋu.

5Yakub hin Ber-Seba, gurona valam musum namu hiɗi boyna hiɗi gurosgurayna kaf kulo hay keke ma Farawn jokomiya kay yawsina. 6Farayna visiya hiɗi sle ma nisi fum hay nagat Kanaan kaf nisi yawam kuɗsiya. Yakub kalay hay Egipte hiɗi jafna valam noŋ kaf. 7Gurona valam sa jufayna hiɗi gurona visiya hiɗi guro-ŋolona visiya, gurona valam sa boyna hiɗi gurona visiya, hiɗi guro-ŋolona visiya, hiɗi jafna valam kaf nam yawsi kuɗumu.

8Kayni mi semda vi gurona vi Israyel sa co hay Egipte: Yakub hiɗi gurona valamu: Ruben goora valam ma vuɗi jewna.

9Gurona vi Ruben: Henok, Pallu, Hesron, hiɗi Karmi. 10Gurona vi Simeyon: Yemuwel, Yamin, Ohad, Yakin, hiɗi Cosar, hiɗi Sawul goora vi cata Kanaaniyata. 11Gurona vi Levi: Gerson, Kehat hiɗi Merari. 12Gurona vi Yuda: Er, Onan, Sela, Peres, hiɗi Zarak. May Er hiɗi Onan miti hay nagat Kanaan. Gurona vi Peres kayni si Hesron hiɗi Hamul. 13Gurona vi Isakar: Tola, Puva, Job, hiɗi Simron. 14Gurona vi Zabulon: Sered, Elon, hiɗi Yahleel. 15Nisi kayni si gurona sa Leya vuɗsi mi Yakub hay Padan-Aram, hiɗi goota va' Dina. Gurona va' sa jufayna hiɗi sa boyna li noŋ pet dok-ɦidi yam ɦidi.

16Gurona vi Gad: Sifyon, Haggi, Suni, Esbon, Eri, Arodi hiɗi Areeli. 17Gurona vi Aser: Yimna, Yisva, Yikvi hiɗi Beriya hiɗi Serak ta ɓasusita. Gurona vi Beriya kayn Heber hiɗi Malkiyel. 18nisi kayni si gurona vi Zilpa, ta Laban vula' mi goota valam Leyata, kayn si guro sa na' vuɗsi mi Yakubna, nisi noŋ pet sumun doogo yam karkiya.

19Rakel cata vi Yakub gurona va' kayni, Yosef hiɗi Benyamin. 20Gurona sa Yosef vuɗsi hay Egipten kayni: Manase hiɗi Efrayim, vuɗum guro nisin kayn ti Asnat, goota vi Poti-Fera, mul ma-ɗifinna hay On. 21Gurona vi Benyamin kayni: Bela, Beker, Akbel, Gera, Naaman, Ehi, Ros, Muppim, Huppim hiɗi Ard. 22Nisi kayni si guron sa Rakel vuɗsi mi Yakubna. Nisi noŋ pet sumun doogo yam fiɗi.

23Gurona vi Dan: Husim. 24Gurona vi Neftali: Yatseel, Guni, Yeser, hiɗi Silem. 25Nisi kayni si gurona vi Bilha, ta Laban vula' mi goota valam Rakelta, kayn si guro sa na' vuɗsi mi Yakubna. Nisi noŋ pet sumun siɗiya.

26Sum sa co hiɗi Yakub hay Egipte, nisi sa may goy hayam nam pana noŋ pet sumun dok-karkiya yam karkiya, boyna vi gurona vi Yakub may hayɗi. 27Gurona vi Yosef sa nam vuɗsi hay Egipten ka ma' lo. Sum sa hay jafna vi Yakub sa co hay Egipten noŋ kaf dok-siɗiya.

28Yakub gi Yuda vokomu kat Yosef, kay dum ala nam ka tuɗis hay Gosen. 29Yosef kot kekena valamu, ɓe kalamu, kay tuɗ hay Gosen, kay ŋaf ir bulum Israyel. Hay li ma iram wi bulumu, nam bowom kelemu, nam tiy ŋolo. 30Israyel di tam Yosef: Wulin kayn nan waŋ iraŋawa, naŋ ka iriya kayn tuta, mitta co ma' kan yo. 31Yosef di tam guro-biyomna hiɗi jafna vi bulumu: Nan min tuɗ di tam Farawn ala: Guro-biyonna hiɗi sum sa hay jafna vi bunu sa ay hay nagata Kanaan coowa tan tani. 32Nisi si sum sa ŋom fokŋa, nisi wul farayna; nisi co kayn hiɗi fukunayna visiya hiɗi luwayna visiya, hiɗi slena visi noŋ kafe. 33Hay li ma Farawn, yigiyawa, la nam jobgiyawa ala: 34lopna vigi mi mige ni, nigi ma hotom dit ala: Sa sunda vaŋ wulum mi farayna, tun cawi tam goorta vuma pa ta-ta wulini, numa hiɗi sumayma kafe. Ki kayn nala, nigi ma li ziy hay nagat Gosen, kay sum sa ŋom farayn kayn nisi liwisi kir sum sa Egiptena.

Currently Selected:

CAWA'TA TUNITA 46: Massana

Highlight

Copy