CAWA'TA TUNITA 19

Sodoma hiɗi Gomora

1Hay vulatita Sunda-wuralawna sa ma'na co hay Sodoma hiɗi Gomora, nisi fi Lot musi goy hay vun-galana vi Sodoma. Hay li ma Lot wisiya, nam fok kulo'o kay ŋafsi irsiya, nam girif gaa voksi kay nagata. 2Nam disiya: Humgiya nigi sa ŋulona vanu, nan siɗawgiya kay nigi ma cuk vo hay ziyna vi sa ma sunda vigiya, nigi ma muz segi goyo, nigi ma buur haya, hay li ma liyn foowa goyo, nigi ma kal migiya. Nisi di'e: A'a, numa bur goy jiy hay hagana. 3May Lot giɗelsi delsiya, ta-ta nisi co'o, kal vo hay ziyna valamu, nam kot tin kisiya, nam li fun-bay-kufna, nisi ti'e.

4Liyn ma nisi bur gaan bay as tuwa kayni, sum sa hoyok-ziyn Sodoma co'o, nisi ŋuy ziyna; tun cawis tam gurosgurayn pa ta-ta tam sa busayna, sum sa hoyok-ziyn tokay noŋ kaf. 5Nisi yi Lot nisi dumu: Sum sa cukay vo hay ziyna vaŋ henjeni ka arige? Naŋ cuksiyay goy jiy tuma'a kay numa min bur hiɗi nisiya. 6Lot kalay goy tisiya hay vun-galana, nam duk vun-ziyn kulo bugolomu. 7Nam disiya: Bosiyonna, nan siɗawgiya ligi va ma jooɗige! 8Humgiya, guro-boyna van ka ma' sa bay bur tam sa tuwa, nan min marsi goy tigiya, nigi as li tisiya va ma nigi mina, may sumun lakŋi nigi li va ma joo tisiɗige, kay nisi ka lakay vo hay ziyna vanu. 9Nisi dumu: ɦuraŋis goyo, nisi hot di'e: San zawni co jaray kayn ki pul ɦawa nala, may nam min ka kitata vaya kayn kay mige? Humaŋ ŋaa'a, numa min laŋ naŋ joo suwsi nisiya. Nisi tun caw zut Lot hiɗi dono'o, nisi co goboyo kay kus vun-ziyna. 10Sa sunda-wuralawna meɗ ɓisi ay goyo, vi Lot kalaf tisi hay ziyna, duk vun-galan kulo'o. 11Sum nisina sa ka molay hay vun-ziyna nisi duksi irsi goy tisoŋ', tun cawis tam sa gurayn pa ta-ta tam sa ŋulona', nisi tamtam ta-ta kay gar vun-ziyna, may liyam ma fi kisi mayɗi.

12Sa sunda-wuralawna di tam Lot: sa vaŋ mara ka tan su? La kunoŋ kla goor vaŋ ma jufu lebo ta ca'a kla ka hay hoyok-ziyn tani ni, naŋ ma kalam goy hay liyn tani. 13Kay numa min ɓulak liyn tan goyo, kay tiy ma sumun tiy tuwsi kisi vok Ma-Vatɗin suwi ŋolo, Ma-Vatɗin cukma'aya kay ɓulak hoyok-ziy namna tan goyo. 14Lot kalay goyo, nam kus yoboy hiɗi kuniyomna sa min yaw gurona valamu, nam disiya: Yawgi kulo'o, hingi liyn tani, kay Ma-Vatɗin min ɓulak hoyok-ziyna. May kuniyomna ɗuwum ki nam ka di law ma cen ɦawa nala.

15Hay li ma liyn tun caw fo goyo, sunda-wuralawna li Lot hiɗi dono'o nisi dumu, fokaŋ kulo'o, yawaŋ cata vaŋu hiɗi gurona vaŋ sa ma' sa ka taŋ tani, kalgiya kay a naŋ ma mit hay ɓulakka vi hoyok-ziyn tanɗi. 16Hay li ma nam tun caw ti muurayt neeɗa kayni, nisi vum ɓalamu, namu hiɗi cata valamu hiɗi gurona valam sa ma'na, kay Ma-Vatɗin min suɗum goyo. Nisi kalay hiɗi namu, hinim goy gine hiɗi hoyok-ziyna. 17Hay li ma sa sunda-wuralawna kalsi goy kalla, ma hena di tisiya: Nigi ma yaw jaŋi kay suɗ irita vigiya; nigi ma ɗuw ŋorgiɗi, hay liyn ma beɗna kaf nigi ma col hayamɗi, tuɗgi jaŋi kulo kay hiɗiyta, kay a nigi ma mitɗi. 18Lot di'e: A'a, Bum-Sumuna! 19Wulin kayn nan fi slugotawa hay vok iraŋu, naŋ ɗek slugota vaŋ ta ŋoldawa goy katanu, kay naŋ suɗ ciwta vanawa. May la nan jaŋ ta-ta kulo kay hiɗiyna, ɓulak-goyt fan ɗawn goy hoyoko, nan ma mita. 20Ɗuwaŋ hoyok-ziy hen tani, nam goboyo, nan na ŋay hayamu, nam gooro, hinan tuɗ ŋay hayamu. Lebo nam may goorɗi su? ciwta van suɗ goyo tuta. 21Sunda-wuralawn dumu: Wulin kayn nan min laŋ slugot lo, hoyok-ziy ma naŋ di kalamn zawn nan as a ɓulakam goyɗi. 22Tuɗaŋ ŋay hayam gosoyo, nan as kay li va tuwaɗi, la naŋ bay co hay hoyok-ziy namna. Kuɗ na'ta kayni nisi vul semda Sowar mi hoyok-ziy namna. 23Hay li ma fatta dayawa, Lot co hay Sowar.

24Ma-Vatɗina hin kuta hiɗi sufre si gaa kay Sodoma hiɗi Gomora, may vi Ma-Vatɗini pa. 25Nam ŋal hoyok-ziy namna goyo, liyn ma beɗna hiɗi sum sa hay hoyok-ziyn kaf, hiɗi sle ma zumum gaa kay nagatna kaw. 26Cata vi Lot ɗuw bugola'a, na' muɗ goy dol ma mandana.

27Abraham fok kulo graw culum culum, kay tuɗ ɗuw liyn ma nam colis jew vok Ma-Vatɗina. 28Nam ɗuw iram hay galla vi Sodoma hiɗi Gomora hiɗi naga ma galam kafna na kayni; nukŋa ka pat kulo kay nagata, ki nuk ma pat kulo' hay jurut nala. 29Hay li ma Lawn ɓulak hoyok-ziy ma hay beɗna, humam gum kay Abraham; nam suɗ Lot goy hay kuta, hoyok-ziyna ma Lot ay musi hay jewna nam ɓulakam goyo.

Tun cawta vi sum sa Mowab hiɗi sa Amonna

30Lot hiɗi gurona valam sa ma'na hin Sowar, nisi kal kulo'o cuk ziyna visi kulo kay hiɗiyna, kay nam li nari kay mus hay Sowar, nam hiɗi gurona valamu li ziy jar zul-hiɗiyna. 31Ta ŋolda di tam ta goota: Wulin kayn buy muɗi maari, hay liyn tani sa ma co garaya ki sum segen ka li hay nagat kaf nala mayɗi. 32Nala nak nagaya, vulay dolayn mi buya, buray hiɗi namu, kay jafna vi buy ma li ŋomiya. 33Nisi vul dolayn mi busiya, hay henje na'ta; ta ŋolda kal bur hiɗi bu'a; nam may wi buur ma na' bur talamna hiɗi fok ma na' fok kulon noŋɗi. 34Hay buurta ka'ta, ta ŋolda di tam ta goota, humagu, kamat henjeta nan bur hiɗi buya; wulin kayn nay vulum dolayn vunam hay henjet ta vaydita lo, nak kaw tuɗag burag hiɗi namu, kay jafna vi buy ma li ŋomiya. 35Nisi vul dolayna vun busiya hay henjeta ka'ta lo; ta goota kal buur hiɗi namu, nam may wi buur ma na' bur talamna hiɗi fok ma na' fok kulon noŋɗi. 36Gurona vi Lot sa ma'na vi haya hiɗi busiya. 37Ta ŋolda vuɗ goor kep, na' tunum selem ala Mowab, namu mi bum sa Mowabna ta-ta vaydi. 38Ta goota vuɗ goor kep kaw, na' tunum selem ala Ben-Ami, namu mi bum sum sa Amonna ta-ta vaydi.

Currently Selected:

CAWA'TA TUNITA 19: Massana

Highlight

Copy