EZEKIYEL 2
2
Ezekiyel wi ɗerwella
1Nam di tanu: Goora vi sana, colaŋ kulo'o kay seŋu, nan min lawis taŋu. 2Hay li ma nam dan dit kayni dina, Ŋusta kal hayanu, colan kulo'o kay senu; nan hum dita vi nam ma ka law tanu.
3Nam di tanu: Goora vi sana, nan min gaŋ kat sa Israyella, kat sum sa raway goyna, nisi sa yaway kulo'o katanu, nisiya hiɗi sumaysiya ay sum sa ci mati vok iranu, ta-ta hay buur ma wulin lakŋi. 4Gurona visiya yisi ɗeŋe, diksi so'otaya kaw. Nan min gaŋ katsiya, naŋ ma law tisi ala: Bum-Sumuna Ma-Vatɗina di ki kayn nala. 5La nisi hum misiya, hum misiɗi, nisi hayɗin si jafna vi sum sa ŋel gatta. Nisi ma wi ala sa ma jobta kep ka jarsiya. 6Naŋu, goora vi sana, naŋ ma li nar kisiɗi, li nar kay ɓakŋa visiɗi, kay sum nisin kayni si zigiy-olla hiɗi gu-zigiyna, naŋ ma mus ɗawni gaa kay ɦurduwna; naŋ ma li nari kay ɓakŋa visiɗi, naŋ ma muɗ ɦuyum' kay voksiɗi kaw, kay nisi kayni si jaf-sum sa ŋel gatta. 7Naŋ ma disi yoboyna vanu, la nisi hum misiya, hum misiɗi, kay nisi hayɗin si jaf-sum sa ŋel gatta. 8Goora vi sana, naŋ hayɗini humaŋ va ma nan min di'e! Naŋ ma ŋel gatta ki sum segena sa ŋel gatta naɗi. Malaŋ vunaŋ goyo, taŋ va ma nan min vulaŋu.
9Nan ɗuw goy na kayni, iran wi ɓamta kep ka meɗay goy tanu, ɗerwel ma ɗutina ka viy hay ɓamta na'ta. 10Sana but ɗerwelda goy vokanu, ɗoy hay ɗerwel na'ta haya' kalafi hiɗi bugola' kaw ala: Tiyna, yorta, mut-siyna.
Currently Selected:
EZEKIYEL 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001