SA MA KUSTA 3
3
Va ma mus ta-ta gaa kay nagata mayɗi
1Slen kaf ma ka gaa kuɗ fatta liyna valam ka'a. 2Liyna kay vuɗa ka'a, liyna kay mita ka kaw; liyna kay pi slen gaa kay nagata ka'a, liyna kay pat goyo va ma piy gaa kay nagata ka'a; 3liyna kay ci mati ka'a, liyna kay yer goyo ka'a; liyna kay ɦo slen gaa'a ka'a, liyna kay in slen kulo'o ka'a kaw; 4liyna kay tiyna ka'a, liyna kay cenda ka'a kaw. Liyna kay yor-tuwta ka'a, liyna kay pir nulu ka'a; 5liyna kay gi hiɗiyn goyo ka'a, liyn kay mol hiɗiyn kulo yam tuwamu ka'a; liyna kay firi tuwna ka'a, liyna kay ja jar goyo ka'a kaw. 6Liyna kay gar va'a ka'a, liyna kay ba va goyo ka kaw, liyna kay ŋom va ka'a, liyna kay gi va goyo ka kaw; 7liyn kay jet va goyo ka'a, liyn kay sra va ma jetay goyna ka kaw; liyna kay ziŋa ka'a, liyna kay lawa ka kaw. 8Liyna kay mina ka'a, liyna kay ka gawi ka'a kaw; liyna kay li duura ka'a, liyna kay li toyta ka'a kaw.
9Ŋaata ma sana fum kuɗ lop ma nam lumna mi mige? 10Nan wi lopna ma Lawn vulum mi sum-wurana kay hotsi yisi gaa'a. 11Nam kot slena jifiya hay liyna valamu valamu; nam tun hay dik sumuna varta vi vatɗita, may sle ma Lawn lumu hay tun cawta pa ta-ta hay vatɗita sa as kay wumɗi. 12Nan wi ala va ma ŋaana kep kay sana kayni mi firita ma nam as vul mi tuwamu hay li ma nam ka iri tuwana tuta; 13may la hay li ma san ka ti'e, ci'e, ɗuw sle ma ŋaana jar lopna valam kaf, kayni ti vulda vi Lawna. 14Nan waawa kaw ala slen ma Lawna lumna as mus ta-ta, va ma cuk haya mayɗi, va ma yaw goyo mayɗi kaw. Lawn li slen nala kayni kay nay ma li nar kuɗumu. 15Va ma ka'a mi va ma aya, va ma min ma'a mi va ma ka wulini, slen ma kalayna Lawna hotomi lo.
16Nan wi va mara'a lo gaa kuɗ fatta: Hay liy ma ka kitat hayamna kayni, joota vurnay hay baŋal ɗigerta, joota vurnay hay baŋal gasita lo. 17Nan di hay dikan ala: Lawna ma ka kitata vi sa ma ɗigera hiɗi sa ma jiw-zlata kaw, kay liyn ka'a kay slen kaf, kitata ka'a kay lopn kafe.
Sa mitina hiɗi sa irina
18Nan di hay dikanu kay sum-wurana ala nisi kaw Lawna ma waksiya, hay li namna nisi ma wi kaw ala nisi ŋiray ca ki muuriyana nala. 19Kay gurona vi sum-wurana hiɗi muuriyana dabta visi kayni mi va kep, kep mita ki hena mit nala kaw, nisi kaf suk ma haysina mi suk namna kepe; nala suw ma san suw muura mi va waa'a. Kay slen kaf mi va waa'a. 20Slen kaf kal hay liyna kepe; slen kaf kotomi hiɗi nagana, nam kaf ma hot hay nagata kaw. 21Sa ma wi ala sukka vi sa-wurana kal kulo hay', sukka vi muuriyana tuɗ gaa kuɗ nagat may, sa ma wi naan gige? 22Nan wi kayni, va ma ŋaa'a ma sana fumu mayɗi, galla valam ma nam fum kep kayni mi firita ma nam fum kuɗ lopna valamu tuta. La naɗina, sa ma as hotomi kay li firiya hiɗi sle ma nam hinimis bugolomna ɗawn mi gige?
Currently Selected:
SA MA KUSTA 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001