GATTA-SEM-MA'TA 33
33
Musus gi bol kay jafna vi sa Israyella
1Kayni ti bolda ta Musus sana vi Lawna ga' kay sa Israyella jew mitta valamu. 2Nam di'e:
Ma-Vatɗina may goy vi Sinay pa,
nam fokay kulo kisiya hay Seyir pa,
nam wileɗ kulo'o kay hiɗiyta Paran,
nam kalay goy jar sa sunda-wuralawna
sa gu' gu' ŋolo, hiɗi ɓalam ta jufta
gi kuta vi gatta aya.
3Awa, nam min sumuna;
sa peldetna valam kaf ka hay ɓalamu,
nisi ka lakay gaa gayaŋu,
nisi vi yoboyna vaŋawa.
4Musus vul vun-ma-gatna kataya,
nam kayni mi galla vi tokŋa vi Yakub.
5Nam ay mi mulla kay Yesurun,
hay li ma sa ŋulona vi sumuna tokaya,
hiɗi sa jafna vi Israyel kaw.
6Hin Ruben mus iriya,
a nam ma mitɗige,
sumuna valamu ma
li ŋol dak-dak lige.
7Kayni mi va ma nam di'e kay Yuda:
Ma-Vatɗina, humaŋ della vi Yuda humge,
naŋ ma hotom kat sumuna valam hotge.
Hin gilaŋatam gut kalamu,
naŋ ma gutumu hay li ma
nam ka dur sa gawt kalamna.
8Kay Levi nam di'e:
Tumimna hiɗi Urimna vuli hay ɓam sa ma peldetna,
ma naŋ nememay hay Masana,
ma naŋ ci wayt hiɗi namu hay Meribana.
9Namu ma di kay sulumu hiɗi bulum ala:
Nan may ɗuwsiɗi,
namu ma may poŋ jar ɓosiyomnaɗina,
ma may wi gurona valamɗina,
kay sa Levitna li kuɗ yoboyna vaŋu,
nisi ŋom bonota ta jargita kaw.
10Nisi hat dita vaŋu mi Yakub,
hat gatta vaŋu mi Israyel kaw;
nisi cuk urdi ma hisna hay cinaŋu,
hiɗi vulda kaf kulo kay
giwin-ma-ɗifinna vaŋu kaw.
11Ma-Vatɗina, gaŋ bol kay donota valam gi ge.
Firiyaŋ hiɗi lopna vi ɓalamu,
sum sa fok kulo kalamna naŋ ma kussi fursi goyo,
nisi sa ka gaw kalamna kaw,
kay nisi ma fok kulo loɗi.
12Kay Benyamin nam di'e:
Namu mi ma Ma-Vatɗin minim ŋolla,
nam musi katam hiɗi sle'ta;
Ma-Vatɗina vulum liyn ma musta dok-doko,
nam musi kulo pelemu.
13Kay Yosef nam di'e:
Ma-Vatɗina ma gi bol kay nagata valamu,
hiɗi ŋaata valamu ta may kulo
dukalawn pa, hiɗi maɗayna,
hiɗi niy ma may gaa hay zulla pana,
14hiɗi ŋaata vi fatta ta ti'e,
hiɗi ŋaata vi jaf ma day hay tilla kafna,
15hiɗi vun-jaf ma jewna vi hiɗiy ma ɓa-ɓana,
kuɗ ŋaata vi hiɗiyn ma vatɗina,
16kuɗ ŋaata vi nagata hiɗi sle ma haya'na.
Hin slugota vi nam ma ka musi jar gikŋa,
co kay Yosef coge; hay vok namna
ma vileki goyo jar ɓosiyomna.
17Put-gujuna valam ma vuɗi jewna vulum wileta;
miyok put namna ki miyok funda nala;
hiɗi miyok namna, nam dab sumuna kafe,
ta-ta hay dabaŋ-gu'ta vi nagata:
Sum sa gu' gu'na vi Efrayim nisi ki kayn nala,
sum sa birimna vi Manase nisi ki kayn nala.
18Kay Zabulon nam di'e:
Firiyaŋu Zabulon hay kal-goyta vaŋu,
naŋu Isakar kaw, hay guɗukŋa vaŋu.
19Nisi ma yi sumuna kulo kay hiɗiyta;
ɗawni nisi ma li ɗifinna ma ɗigera,
kay nisi ma ti faray ma may gaa kuɗ
niy-lumna pana, hiɗi farayna ma
ŋayay gaa jar ŋeslna.
20Kay Gad nam di'e:
Sle'ta ka kay nam ma sleɗ dik Gadna,
nam ma tun suku ki zlo-tancata nala,
nam jet gilaŋŋa hiɗi zok-ta'ara goyo.
21Nam vilek vun-jaf ma jewnawa,
kay galla vi sa ma ŋolla
ka ŋayay hay liy namna;
nam ka tuni vok sumuna,
nam li ɗigerta vi Ma-Vatɗinawa,
hiɗi kitata valamu kay sa Israyella.
22Kay Dan nam di'e:
Dan mi zlon ma joriyona, ma ka pira
goy hay Basan.
23Kay Neftali nam di'e:
Neftali hobi hiɗi slugota,
hobi hiɗi bolda vi Ma-Vatɗina,
nam sli gal ma vulatina hiɗi
gal ma kayamna.
24Kay Aser nam di'e:
Jar gurona vi Yakub, bolda ka kay Aser,
slugot li kalamu jar ɓosiyomna lige,
hinim tun selem hay mula tunge.
25Vun-ziyna vaŋu ma li mi kawaya
hiɗi wayna kaw lige,
musaŋ iriya bay-moyna dok-dok musge.
26Naŋ Yesurun, lawn mara'a ma ŋray
hiɗi Lawna vaŋ mayɗi,
Nam fokay hay dukalawn pa kay gut kuɗaŋu,
nam ka ziyi kulo kay ɗugulla
hiɗi mulda valamu.
27Lawn Ma-Vatɗina mi liyn ma ŋayna,
liyn ma ŋayna ka hay glaŋam Ma-Vatɗina;
nam digiɗ sa gawta goy vokaŋu,
nan di'e: Vatsi goyo.
28Sa Israyella ka lakay hay sle'ta,
jafna vi Yakub ka tuni goy visiya,
hay nagata vi alkamarena hiɗi gulda-guldana,
liyn ma dukalawna ka si maɗayn gaa'a.
29Sle'ta kigiya, nigi sa Israyella,
sa ma ki nigi nala mi gige?
Sum sa suɗi goyo kay Ma-Vatɗina.
Marayta vi gutda vigiya,
kew-gaferaŋa vi mulda vigiya.
Sa gaw kigina ma mun jaŋi vokgiya,
nigi ma tay liyn ma ɗiŋiriŋŋa visi gaa'a.#33:29 Liyn ma ɗiŋiriŋŋa Kayni mi yam barana ma nisi ka girif lawayn ma waan kulo kalamna.
Currently Selected:
GATTA-SEM-MA'TA 33: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
