AMOS 7
7
Wida-vokka kay ɦo-gaata vi Israyel
1Bum-Sumuna, Ma-Vatɗina ɗek van kayn kiranu,
nam hin baara esl ŋolo kay ti wana,
kayni hay liy ma guro-guron tun caw goɗa,
hay li ma sumun feɗ wana vi mulla.
2Baara tun caw ti guro-gurona vi wan kay nagat kaf goyo,
nan ka di'e: Bum-Sumuna Ma-Vatɗina,
wulin kayni naŋ ma vul gid yo,
la naɗina, jafna vi Yakub ma lak iri ɗawn laktige?
Kay nam maŋay ŋolo?
3Ma-Vatɗina muɗ varta valamu,
van kayni ma co loɗi,
Din mi Ma-Vatɗina.
4Bum-Sumuna Ma-Vatɗina ɗek van kayni kiran lo;
Humgiya, Ma-Vatɗina min ka kitat kay sumuna hiɗi kuta;
kut min ŋal zul ma wiŋŋa, min ŋal sinena kaw.
5Nan ka di'e: Bum-Sumuna, Ma-Vatɗina,
telaŋ kut goyo,
la naɗi jafna vi Yakub mus iri ɗawn mustige?
Kay nam maŋaya!
6Ma-Vatɗina muɗ varta valamu,
kay van kayni may co jarsi loɗi.
Din mi Ma-Vatɗina Lawna.
7Bum-Sumuna Ma-Vatɗina gi ɗekka tara ay kiran lo:
Nan ɗuw kayni,
Ma-Vatɗina ka coli kulo jar gulmunna,
ma ŋray goy ja ɗiger hiɗi zigewna,
kaway ma ŋa ɗigerta vi gulmunna ka hay ɓalamu.
8Ma-Vatɗina di tanu:
naŋ wum mi mige Amos?
Nan hot dit ala mi kawayn ma li ŋaɓta.
Bum-Sumuna di'e:
Nan min gi kawayn ma li ŋaɓta jar sumuna van sa Israyella;
nan ma vulsi gida kay sulukŋa visi loɗi.
9Liyna vi jafna vi Isaak,
ma li ɗifin kulo kalamna ma hin goy ɦawa'a,
liyna visi ma peldetna ma ɓulak goyo,
nan ma fok kulo kat ziyna vi Yerobowam hiɗi kew-gaferaŋa.
Amos hiɗi mul-ma-ɗifinna Amatsiya
10Ki kayn nala, Amatsiya mul-ma-ɗifinna hay Betel, gi sun tam Yerobowam mul ma Israyella, dum ala: Amos ka di newt kaŋu jar sa Israyella kay mulda vaŋ ma ɦo gaa'a, sumuna hay nagat kaf makawa kay lawta vi Amos. 11Humaŋu: Nam ka di ala: Kew-gaferaŋa ma ci Yerobowam goyo, sum sa Israyella sumun ma yawsi goy gorvo gine'e hiɗi nagata visiya. 12Amatsiya di tam Amos: Naŋ sa ma slen vul tuwam kiraŋŋa, piraŋu, tuɗaŋ hay nagata vi Yuda, ɗawni naŋ ma ti vunaŋ maŋ lay, di kay law ma vokaŋ lay. 13May Betel tani naŋ di law ma vokŋa haya' loɗi, kay na' tani mi liyn ma peldetna vi mulla, mi hoyok-ziyn ma mulda hayamna;
14Amos hot dit tam Amatsiya ala: Nan may mi sa ma jobɗi, goora vi sa ma jobɗi lay, nan mi sa ma ŋomom faraya, nan pum mi gu-sikomora. 15Ma-vatɗin fanay kilan goy ŋomom mi faraya, nam ka di tan ala: Tuɗaŋu, daŋ vun-jobta kat sumuna vanu sa Israyella. 16Wulin kayni humaŋ yoboyna vi Ma-Vatɗina, naŋ ma di ala: Nan di vun-jobta kat sa Israyellaɗi, nan law tam ziyna vi Isaakɗi kawna, 17jakaŋ humaŋ kay hum va ma Lawn min di'e: Kuɗ kayni cata vaŋ ma muɗ tuwa' viyuwu goy jar hoyok-ziyna, gurona vaŋ sa jufayna hiɗi sa boyna kew-gaferaŋa ma calsi goyo, sinena vaŋu sum segen ma ɓurawam goy jarsiya, naŋ kay tuwaŋ ma mit goy hay nagata liwista, sum sa Israyella ma yaways goy gorvo'o hay nagata gineta.
Currently Selected:
AMOS 7: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001