LOPNA 21
21
Paulus hay Tirus hiɗi Sesariya
1Hay li ma jarma ja hiɗi nisi jana, numa dol lumna kay tuɗ ɗiger hay Kos, hay buurta ka'ta numa dol hay Rodus, ɗawni pa numa kal hay Patara. 2Nisi fi lumna kep ma kal hay Fenisiya, numa jik hayamu, dolma'ay goyo kaw. 3Hay li ma numa co vok Kiprus, numa hina' hay galma gulu, numa gi hay galla vi Siriya, kay tuɗ gaɓ hay liyna ma yaw jak ma hay lumna goyna. 4Numa fi sa hatayna, numa lakay ɗawni ir buur siɗaya. Ŋusta zutsiya, nisi di tam Paulus kay nam ma tuɗ hay Yerusalemɗi. 5May hay li ma buur kayni vatawa, numa kalay hiɗi sumun kaf, boyna hiɗi gurosgurayna kaw kay guma dirma'a, numa kalay ta-ta goy jiy hoyok-ziyna. Numa girif gaa kay deŋella kay siɗawa. 6Jarma ja goy jana, numa jik hay lumna, nisi hotay vo misiya may. 7Hay li ma numa vat hiɗi gina vi lumna hay Tirus pa vatna, numa co hay Pitelomayis, ɗawni numa gi deɓ mi ɓosiyomana, numa lak hiɗi nisiya ir buur kepe kaw. 8Hay buurta ka'ta numa kaliya, numa co hay Sesariya. Numa cuk hay ziyna vi Filip ma evanzelistena, ma kep jar sa siɗiyana, numa lak vo valamu. 9San kayni guro-boyna valam ay ɦidi sa di vun jobta-Lawna. 10Ki numa ay ɗawni ir buur ca nala, sa ma jobta-Lawna kep ma may hay Yudiya pa, ma selem Agabus, nam ma tuma'a. 11Nam yaw kantina vi Paulus, jun gayam hiɗi ɓalamu di ala: Kayni mi va ma Ŋusta-Peldetta di goyo: Sa ma mul kantin yawni, sum sa Yudiyana ma junum ki kayn nala kaw hay Yerusalem, nisi ma vulum goyo hay ɓam sa waana kaw. 12Hay li ma numa hum na kayni, numa hiɗi sum sa hay hoyok liy namna kaw siɗawa Paulus kay nam ma tuɗ hay Yerusalemɗi. 13May Paulus disi ala: Nigi tiya, ɓulakan dikan kaw kayni kay mige? Kay nan ka goboy tam junda ɦawaɗi, may kay mit hay Yerusalem hay sem Bum-Sumuna Yesu. 14Kay nam min vi dita vumaɗi ni, numa kaw so'ot hiɗi dit kaynɗi, may numa di'e: hin minda vi Bum-sumuna li'e.
PAULUS HAY YERUSALEM, HAY SESARIYA HIƊI ROM
Cota vi Paulus hay Yerusalem
15Bugol buur kayni, numa'a kotma slena vuma'a, kalma hay Yerusalem. 16Sa hatayn sara hay Sesariya pa tapis kuɗma'a, guma cawma vi san kep yum Nason, sa ma Kiprusna, sa ma hatayna ma numa'a lak jew vo valamna.
17Hay cota vuma hay Yerusalem, ɓosiyomana vuma hiɗi firita. 18Hay buurta ka'ta, Paulus kalay hiɗi numa'a tam Yakub, sa maariyana kaf tokay hay liy namna ɗawni kaw. 19Hay li ma nam gisi deɓ gina, nam tun caw visi labara goy kep kep kay slen ma Lawna lumawa jar sa waana kuɗ lopna valamu. 20Hay li ma nisi hum kayni, nisi subur Lawna. Bugolda nisi di'e: Ɓasumana, naŋ wi'e, sumuna birim gaage jar sa Yudiyana vi'e, nisi kaf lakay ciwer kay gatta. 21May nisi hum kaŋ ala, naŋ ka hat sa Yudiyana sa jar sa waana kay nisi ma hin vun-ma-gatna vi Musus goyo, naŋ ka disi ala nisi may ka gosay mi gurona visiɗi, vi kuɗ data vi sumaysiɗi kaw. 22Nay ma lay linige? Hay li ma sumuna humawa ala naŋ miya, nisi ɗawn ma daka! 23Kay na'ta naŋ ma li va ma numa daŋgin ɗawni, sum sara fiɗi sa yi va kisiya ka jarma'a; 24naŋ yawsi kuɗaŋu, poraŋ tuwaŋ hiɗi nisiya, vaŋ wurakŋa taŋu, kay nisi ma wel yisi goyo. Nala sumun kaf ma wi ala lawta ta nisi huma'ay kaŋga kayni may gasiɗi, may naŋ dolay kaw ka li kuɗ gatta. 25May kay sa waana sa vi'e, numa col varta, numa ɗoys goy tisi kaw kayni kay nisi ma tel tuwsiya kay sliw ma liy ɗifin goy tam lawayn ma waana, kay busuwna, kay muuriyan ma muruɗina, kay zlata-liwista kaw.
26Hay buurta ka'ta, Paulus yaw sum sa fiɗina, por tuwam hiɗi nisiya, cuk hay Tempella kaw. Nam di goyo kay liy ma buura vi poora visi ma vata, hiɗi vulda ma san gige gige vula kaw.
Nisi vi Paulus
27Hay li ma buur ma siɗiyan vatawa, Yudiyana sa hay Asiya, sa wumis hay Tempella ɦilay sumun kulo'o kaf, nisi vumu kaw. 28Nisi siwela di ala: Nigi sa Israyella, nigi gutma'a! Zawni mi sa ma hat sumuna arige arige, hat sumuna kaf kaw, joo kat jaf-sumuna, joo kat gatta, joo kat liyn tani kaw, sa Grekŋa kaw nam kalsi kalaf hay Tempella, nam muɗ liyn ma peldetna tani goy liwisi. 29Kay hay jewe, nisi wi Trofimus ma Efesusna hiɗi namu hay hoyok-ziyna, nisi varay kayn ala Paulus kalamawa kalaf hay Tempella.
30Hoyok-ziyn kaf ɦilay kulo'o, sumun munay jaŋ hay liyn kaf, nisi vi Paulus, sabamay goy jiya hay Tempella pa, duk vun Tempella kulo de' kaw. 31Hay li ma nisi ka gar hagata kay cum goyo, labara kayni coy tam komandaŋŋa vi vok-ma-duura ala, Yerusalem ka hay ɦilayta. 32Koloy na kay' de, nam yaw sojena hiɗi kapitenna kuɗumu, jaŋ katsiya. Hay li ma nisi wi komandaŋŋa hiɗi sojena, nisi hin Paulus viɗek'. 33Wulini komandaŋŋa ma talamu, vumu, vul hagata kay junum ɓalam hiɗi jaɓna ma'. Bugolda nam job ala nam kayn mi gige, lo lop ma nam ay lumna mi mige kaw. 34May jar tokŋa sa hena siwel visiya, segen siwel visiya kaw; hay li ma nam fi a hum va gasiɗi kay ɦilayta-kulota, nam vul hagata kay nar Paulus hay ziyda ta gulmun ta'ta. 35Hay li ma Paulus ka jik kulo'o, sojena slum kulo sliya, kay giji-gijita vi sumuna; 36kay vokŋa vi sumuna sa ka tuɗ kuɗumna ka siwel ala: Cum ciy goyo!
Paulus ka law tam sum sa hay Yerusalemna
Gal 1:11-16; 1 Tim 1:12-17
37Hay li ma nisi tun caw kalam kalaf hay ziy ta gulmun ta'ta, Paulus ka di tam komandaŋ ala: Naŋ as vulan hagata kay di va taŋ ne' su? Nam hot dita: Naŋ wi vun Grekŋa su? 38Sa ma Egiptena ma goboyni mar ɦilayta kulota, pat sum sa ci-matna birim fiɗi kuɗum hay fulda kayni may mi naŋɗi su? 39May Paulus di'e: Nan mi Yudiyana ma hay Tarsus hay Kilikiya, ma hay hoyok-ziyn ma ŋolda valam kaw kiɗayɗi, nan siɗawaŋu kay naŋ ma vulan liyn neeɗa kay kus yoboyna tam sumuna. 40Komandaŋ vulum liyna, Paulus colay hay liyn ma jik kulona, ci wur-ɓalamu, sumun zan ɦim'. Nala nam kus yoboyn tisiya hay vun Hebrena disiya:
Currently Selected:
LOPNA 21: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
Free Reading Plans and Devotionals related to LOPNA 21
Now Is The Time: Acts Youth Journey
Jesus in All of Acts - A Video Devotional
The Book of Acts
