LOPNA 18

Paulus hay Korinte

1 Kor 1:1-9; 2 Kor 11:5-12

1Bugol kayni Paulus hin Aten, nam kal hay Korinte. 2Hay Korinte nam fi sa ma Yudiya kep ma semda valam ala Akuilas, nam vuɗi hay Pontus, nam may hay Italiya pa musi ŋolɗi hiɗi cata valamu Priskila, kay Klawdiyus vul hagat mi sa Yudiyana kaf kay kalay goy hay Rom pa. Nam jun hiɗi nisiya; 3Ki lopna valam kayni mi lopna visiya, nam mus vo visiya, nisi tap li lopna kuɗ tuwsi kep, kay lopna visin mi kotta vi guɗukŋa. 4Hay sabatna kaf nam ka kus yoboyna hay sinagogayna, nam ka vi dik sa Yudiyana hiɗi sa Grekŋa.

5May hay li ma Silas hiɗi Timotewus may hay Makedoniya pa, Paulus vul tuwam goy hay hatta vi yoboyna vi Lawna; nam di goy tam sa Yudiyana ala Yesu kayni mi Kristu. 6May nisi pi kiram hiliŋ', ŋulumu kaw, nam gifir sligara valam goyo di tisi ala: Busuwgi ma tun kelgiya! Nan ɓan may hay lawta loɗi, wulin pa nan ma tuɗ tam sa waana. 7Nam kalay ɗawn pa, kal hay ziyna vi sa ma li nar kuɗ Lawna kep ma semda valam ala Titiyus Yustus, ziyna valam ay goboy hiɗi sinagogayna. 8May Krispus mulla vi sinagogayna vi kuɗ Bum-Sumuna hiɗi ziyna valam kaf. Sa Korintena sa hena ŋolo sa hum yoboyna vi Paulusna vi'e, fi baptisma kaw.

9Hay henjeta Bum-Sumuna di tam Paulus hay ɗekka ala: Li narɗi, may daŋ goyo, ba vunaŋɗi, 10kay nan ka hiɗi naŋu, sa ma tun ɓalam taŋ kay laŋ joo mayɗi, kay sumuna van ka ŋolo hay hoyok-ziyna tani. 11Nam mus jarsiya kay hatsi yoboyna vi Lawna ir busat kep hiɗi til karkiya.

12Hay liy namna Galiyoŋ ay guverner vi Akaya, sa Yudiyana tap vunsi kep fok kulo kay Paulus, tuɗum vok liyn ma kitana, 13nisi di ala: San kayni ka vi sumun hiɗi lawta kay nisi girif Lawna ki gatta di naɗi. 14May hay li ma Paulus min mal vunam kulo'o, Galiyoŋ di tam sa Yudiyan ala: Nigi sa Yudiyana, lali kayni ti zlata-joota, lebo zlata-liwisi, nan ma humgi hiɗi ŋalda ki kayni hay liyamu nala; 15may hay li ma nigi ci wayt kayni kay lawi, kay sem-slena kay gatta vigiya kaw, kayn ti lawta vigiya, nan as ka kitata kay slen ma ki kayn nalaɗi. 16Nam cuksiyay goy hay liyn ma kitan pa. 17Nala nisi kaf vi Sostenes, ma ŋolla vi sinagogayna, nisi tun caw tomu vok liyn ma kitana, may Galiyoŋ humam ciŋ kay kaynɗi.

Hotta vi Paulus hay Antiokiya

18Paulus musay ɗawni ir buur ŋolo. Bugolda nam hin ɓosiyomna, kal hay lumna kay dol hay Siriya, namu hiɗi Akuilas hiɗi Priskila. May nam wel yalamis goy wel hay Kaŋkreya, kay nam yi va kalamu. 19Nisi co hay Efesus, Paulus hin sa tuɗis hiɗi namna ɗawni. Nam kal hay sinagogayna, kus yoboyna hiɗi sa Yudiyana, 20Nisi giɗelem delem kay ma nam mus hiɗi nisiya ir liyn neeɗa. 21Nam may minɗi, nam hinsiya, disi kaw ala: La li nanige kaw nan min li yuldeta ta vokayt ɗawni hay Yerusalem. Nan ma hotay tigiya, la Lawna minawa. 22Nam dolay goy hay Efesus pa kay tuɗ hay Sesariya; nam jik kulo kay tuɗ gi deɓ mi sa tapna, bugolda nam kal hay Antiokiya.

Rogoyta vi Paulus ta sem ɦidita hay lopna vi sunda

23Hay li ma nam musi ɗawni ir liyn neeɗa, nam kala, jik hiɗi selem hay nagata vi Galileya hiɗi Frigiya, kay vul donota mi sa hatayna.

24Sa ma Yudiyan kep ma selem Apolos, nam vuɗi hay Aleksandriya, sa ma kus yoboyn goy ŋaa cet-cet', sa ma wi ɗota goy ŋaa'a kaw, nam co hay Efesus. 25Nam hatay hay hagata vi Bum-Sumuna, colay dono'o hay Ŋusta, nam di goyo, hat kaw hay liyam ɗiger kay Yesu. Nir na'ta kep nam wum kayni mi baptisma vi Yohana tuta. 26Nam tun caw law goy haraŋ hay sinagogayna. May hay li ma Akuilas hiɗi Priskila humum humna, nisi vum kuɗsiya, ɗekem hagata vi Lawna goy kiram ŋaa suwa. 27Ki nam var kay jik hay Akaya ɗaw nala, ɓosiyomna vulum teŋ-irta kay jik haya, nisi kaw ɗo tam sa hatayna kay nisi ma vum ŋaa'a. Hay li ma nisi co ɗawni, nam muɗ jibet kir sa vi kuɗ slugota vi Lawna. 28Kay nam hot lawta hiɗi dono'o kir sa Yudiyana goy haraŋ vok sumuna kaw, kay nam ɗeksi hay ɗota ala Yesu kayni mi Kristu.

Currently Selected:

LOPNA 18: Massana

Highlight

Copy