LOPNA 11

Peter ka ɗek caw poyta valamu goy vok sa viyna sa hay Yerusalem

1Sa Apostolayna hiɗi ɓosiyosina sa ka hay Yudiya hum ala sa waana kaw vi yoboyna vi Lawna. 2Hay li ma Peter kalay Yerusalem, sa kaay-gosayna ka lawam ɦiy ala: 3Naŋ kalay kalaf vi sa bay ka-gosayna, naŋ ti hiɗi nisiya kaw kayn litige? 4Nala Peter tun caw lawsi hay dita ta luma'da ala: 5Nan ay hay hoyok-ziyna vi Yoppe, van vul tuwam kiranu hay li ma nan ay siɗawa, van siray gaa'a ki va ma ŋol ma wura ɦiriw-ɦiriw' ma keŋem fiɗi ay juniya, siray gaa dukalawna pa, co ta-ta gaa tanu. 6Hay li ma nan ka ɗuwum ŋali ŋali, nan wi muuriyana ma gayam fiɗi fiɗina, muuriyan ma fulla, sle ma ɦarmatna hiɗi layayn ma dukalawna. 7Nan hum della ma ka dan ala: Fokaŋ kulo'o Peter, ŋatamu, taŋga; 8may nan di'e: A'a, Bum-Sumuna, kay va ma liwisi lebo ma joo'o, nan bay kalam hay vunan tuwa. 9Hay sem ma'ta del may kulo wuralawna pa ka di ala: va ma Lawna di goy kalam ala nam bay liwisi, naŋ ma ɗuwum ki va ma liwisi naɗi. 10Slen kayni li sem hiɗi, bugolda nam yaways kulo'o hay dukalawna kaf. 11Ɗuw na kayni, sumuna ɦidi sa cukiyay sun hay Sesariya pa, ka lakay vun-galana vi ziyna ma numa ay hayna. 12Ŋusta danu kay nan ma tuɗ kuɗsiya bay giriŋi, ɓosiyayn sa karkiyan lakŋi guma cawma ta-ta numa cuk hay ziyna vi Korneliyus. 13Nam vuma labara nanige nam wi sunda-wuralawna ma col vokomu dum ala: Gaŋ sun hay Yoppe, gar Simon ma gileta valam Peter, 14nam ma kus yoboyna taŋu, yoboyna ma naŋ ma fi su'da haya, naŋ hiɗi ziyna vaŋ kafe. 15Hay li ma nan sli lawtiya, Ŋusta-Peldetta jikay gaa kisiya, ki nam li hiɗi naya hay tun cawta nala kaw. 16Nala human gan kay yoboyna vi Bum-Sumuna ma nam di ala: Yohana li baptisma hiɗi niyna, may nigiya, nigi ma fi baptisma hiɗi Ŋusta-Peldetta. 17La Lawna vulsi vulda ki nam vulaya hay li ma nay vi kuɗ Bum-Sumuna Yesu Kristu nala, nan mi gige a nan as col dono kir Lawna? 18Hay li ma nisi hum kayni, diksi tun gaa'a, nisi subur Lawna di'e: Lawna vul hagatawa kaw mi sa waana, a nisi ma hama kay nisi ma fi su'da.

Barnabas hiɗi Saulus hay Antiokiya

19Nisi sa lasta nig kisiya mersi goyo kaw bugol mitta vi Stefanus kalay ta-ta hay Fenisiya, hay Kiprus, hay Antiokiya kaw, nisi kus yoboyna tam sa maraɗi, may tam sa Yudiyana tuta. 20May jarsiya sum sara sa hay Kiprus hiɗi Sirene, sa co'ay hay Antiokiya pa, nisi kus yoboyna tam sa Grekŋa, disi goyo kay labara ma firina vi Bum-Sumuna Yesu. 21Ɓam Bum-Sumuna ay hiɗi nisiya, sumuna ŋolo vi'e, muɗi tam Bum-Sumuna kaw. 22Labara kayni co hay humda vi sa ekklesiyana hay Yerusalem, nala nisi gi Barnabas ta-ta hay Antiokiya. 23Hay li ma nam co ɗawni, nam wi slugota vi Lawna, nam firiya, nam vulsi teŋ-irta, kay nisi ma lak hiɗi diksi juni dono tam Bum-sumuna. 24Kay nam ay mi sa ma ŋaana, ma hobay hiɗi Ŋusta-Peldetta, hiɗi vida kaw, vokŋa ma ŋolla tapay kuɗ Bum-Sumuna.

25Barnabas ay hay Tarsus kay gar Saulus; 26hay li ma nam fumay fina, nam maram hay Antiokiya, nisi ka lak hay ŋra-vunda vi sa tapna, nisi hat tokŋa ma ŋolla kaw ir busa kenem', sa hatayna sumun muɗ yisi ala sa fi Kristuna hay sem ma jewna kayni hay Antiokiya. 27Hay buur namna kayni, sa jobta-Lawna may Yerusalem pa, kal gaa Antiokiya. 28Sa kep jarsiya ma semda valam ala Agabus, nam fok kulo'o, ɗek goy hay Ŋusta ala mayta ŋolda ma li kay nagat kuɗulu', may na'ta li kayni hay liyna vi Klawdiyus. 29Sa hatayna ŋra vunsiya, gigekaw kuɗ asta valamu valamu, kay vul slena tam ɓosiyosina sa hay Yudiya. 30Nisi li ki kayni nala, nisi jokom tam sa maariyana hay ɓam Barnabas hiɗi Saulus.

Currently Selected:

LOPNA 11: Massana

Highlight

Copy