2 TIMOTEWUS 2

1May naŋu, goora vanu, muɗan dono'o hay slugota ta ka hay Kristu Yesu. 2Slen ma naŋ humum hay vunanu kir sum sa di-goyna ŋolo, naŋ ma di sle namna mi sum sa gasina, sa ma nagay kay hatam goy tam segena.

3Caŋ lasta hiɗi nanu ki soje ma gasina vi Kristu Yesu nala. 4Sa ma li lopna vi sojena tun ŋalda valam kay slena vi nagatɗi, la nam min sleɗ dik sa ma vum hay lopna, 5sa ma jaŋŋa may fi bogoraynɗi kaw, la nam may jaŋ hay hagata va'ɗi. 6Sa ma zumna ma mak tuwamna, la litigekaw nam mi ma feɗ wan jewna. 7Varaŋ kay va ma nan di'e: Bum-Sumuna ma vulaŋ yalla hay slen kaf.

8Humaŋ jak kay Yesu Kristu, kay nam dayay kulo'o jar sa mitina pa, namu hay jafna vi David, kuɗ labara ma firina vanu, 9namu ma nan ka ci las kuɗumu, ta-ta juni-jun ki sa ma li joot nala, may yoboyna vi Lawna may juniɗi. 10Kay na'ta nan ka ziy makka kaf kayn kuɗ sa vileki goyna, kay a nisi kaw ma fi su'da ta ka hay Kristu-Yesu, hiɗi gajijita ta vatɗita.

11Kayni yoboy ma gasina

Kay la nay mitawa hiɗi namu,

Nay ma lak iriya hiɗi namu kaw;

12La nay so tuwaya,

Nay ma fi mulda hiɗi namu kaw;

La nay puw vunay kalamu,

Nam kaw ma puw vunam kaya;

13La nay col kay dita vayɗi,

Nam dok-dok col kay dita valamu,

Kay nam as kay puw vunam kay tuwamɗi.

Law kat nisi sa cal goy hiɗi hatta ta bay-gesta

1 Tim 1:3-7; Tit 1:10-16

14Kayni mi sle ma naŋ as gisi humsi kalamna, naŋ ma gatsi kir Lawna ala yoboyn ma nisi may fi ŋaat kuɗumɗina nisi ma ci wayt jar-tuwsi kalamɗi, kay nam cani mar ba-goyta kisi nisi sa humumu. 15Naŋ ma so tuwaŋu kay col vok Lawna ki sa ma tuwam waki-wak nala, ki sa ma li lopna ma li zulo kay vaɗi, hat yoboy ma gasina goy hay liyam ɗigere kaw nala. 16Naŋ ma ja jaraŋ goyo hiɗi ɓak ma waa ɗaara, kay nisi sa ɓak ɓak ma waa ɗaara ma tuɗ voksi dok-doko hay liwista. 17Yoboyna visiya mut vokomu vokomu ki mil-ŋayakŋa nala. Himenewus hiɗi Filetus ka jar sum nisina. 18Nisi sa viy goyo, gasit hini goy kisiya, nisi di ala dayta-kulota liy vatiya, nala nisi ɓulak vida vi sum segena. 19May sem ziyna vi Lawna ka tuni gaa dono'o, ɗot tuni kulo kalam ala: «Bum-Sumuna wi sumuna valamu» lo ala: «La gigekaw yi sem Bum-Sumuna, nam ma ja jaram goy hiɗi bay-ɗigerta».

20Ziyda ta ŋolda ina' kayni, na' may koti hiɗi ora hiɗi doorota tutaɗi, may guna hiɗi nagana ka kaw, hena kay li lop ma ŋulon hiɗi namu, hena kay li lop ma gurayn hiɗi namu may. 21La san por tuwam goyo, nam ma lin mi dowayna ma kay lopn ma ŋaana, liy goy peldete, ŋaa'a kay mulamna, nagay kay lop ma ŋaana kaf.

22Naŋ ma pir kay darta vi joriyota, may garaŋ ɗigerta, vida, ti-kamda, toyta kaw hiɗi nisi kaf sa yi sem Bum-Sumuna hiɗi dikga peldetta. 23Ci-wayta ta ɦay-ɦayta ta gutɗita naŋ ma noya' goyo, kay na' vuɗ cirepta. 24May sa ma sunda vi Bum-Sumuna as ci wayɗi, nam ma mus ŋal kiliŋ tam sumun kafe, wi yal kay hat segena, mus ŋali hay zumalda kaw; 25Sum sa min ci-wayta nam ma moɗsi hiɗi ŋali, hiɗi varta ta ala Lawn ma vulsi hamda, kay co tam wida vi gasita, 26kay hotsiyay hay hagata visi ta ŋaata, kay butsi goy vun jawta vi Matna ma visiyawa, kay hotsi gaa kuɗ minda valamu.

Currently Selected:

2 TIMOTEWUS 2: Massana

Highlight

Copy