2 KORINTENA 9
9
1May kay gutda kuɗ sa peldetna kayni, la nan ɗo tigi kay kaynɗi kaw, law mayɗi. 2Kay nan wi minda vigi ta ŋaata ta nan subur tuwan kigiya vok ir sa Makedoniya kuɗa' ala: Sum sa Akaya kot tuwsi ay jumda pa, ciwerta vigiya gi hum sumun ŋolo. 3May nan cuk ɓosiyaynis kayni, kay segi ma numa tiyim kuɗ lawt kayni ma muɗ goy waaɗi, kay nigi ma lak kotiya kaw, ki nan di nala. 4Kay sum sa Makedoniya sa tapis kuɗan ɗawni, hinsi figi bay tuwgi kotiɗi, kay la nisi figiyawa hiɗi tuwgi bay kota, kayni ma muɗ zulo kuma'a, zulo kigi kaw. 5Kay na'ta nan vara kay cuk ɓosiyaynis katgi vokan jewe, kay kot vulda ta nigi di kay vula'ta, kay na' ma li koti hiɗi bolda, may hiɗi vulda ta ir ma ɗeŋŋaɗi.
Deŋga tam sa vul hiɗi bolda
1 Tim 6:17-19; Fil 4:15-19; 1 Yoh 3:16-18
6Nan digiya: sa ma cuk kiɗaya, nam ma feɗ kiɗaya kaw, sa ma cuk ŋolo, nam ma feɗ ŋolo kaw. 7Gigekaw ma vul kuɗ va ma nam varam hay dikamna, hiɗi yortaɗi, ki hiɗi dono'o naɗi kaw, kay Lawna min sa ma vul hiɗi firita. 8Lawna ka hiɗi donota kay hobgi hiɗi slugota kuɗ jafa' kafe, kay dok-dok nigi as fi slen kay asgiya, nala nigi ma as kay lop ma ŋaana pet. 9Ki ɗo'ay nala:
Nam biya slenawa goyo, nam vul slenawa mi sa sa hawna;
Ŋaata valamu ka dok-doko.#9:9 Ɗuw Nul 112:9.
10Namu mi ma:
Vul jafna mi sa cuk jafna,
Vul funa kay ti'e kaw.#9:10 Ɗuw Es 55:10.
Nam ma vulgi jafna kaf ma nigi minimu, nam ma wulum kulo'o kaw, kay vulda vigiya ma vuɗ vuɗna ŋolo. 11Nigi ma li faraya hay slen kaf, kuɗ vulda ta kuɗ jafa' kafta, vulda ta numa as hot gi-deɓta ka'a tam Lawna. 12Kay lopna vi vulda kayni, may kay gutda kuɗ sa peldetna ɦawaɗi, may nam vul lop ma slugona ŋolo tam Lawna. 13Hay li ma nisi wi ŋaata vi lop namnawa, nisi ma subur Lawna kuɗ hum-vunda vigiya, hay li ma nigi di goy kay labar ma firina vi Kristu, hiɗi vulda-minda vi tap-ɓamta vigiya tisi nisiya, tam sumun kaf kaw. 14Hay li ma nisi siɗaw kigiya, haysi tiy kay ɗuwgiya kay slugota ŋolda vi Lawna ta haygita. 15Gi-deɓta tam Lawna kay slugota valam ta ŋolda, ta san as da' cawa' goyɗita.
Currently Selected:
2 KORINTENA 9: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
