1 TIMOTEWUS 6

1Nisi kaf sa hay gorvota ma ɗuw mulaysina ki nagay kay sli-yam kulota nala, kay sumun ma ŋul semda vi Lawnaɗi, ŋul hattaɗi kaw. 2nisi sa mulaysin si sum sa viyna na, nisi ma ɗuwsi birek-cek ala nisi muɗawa ɓosiyom tuwsiyaɗi, may nisi ma sunsi ŋaa suwa, ki nisi si sum sa viyna sa min tuwsina sa li lop ma ŋaana mi tuwsiya nala.

Sa hat hatta bay gasita, darta vi farayna, gatta tam Timotewus

Mat 6:19-34

3Kayni mi sle ma naŋ ma hatsiya, gatsi kaw. La sa hat hatta tara'a, vi kuɗ yoboy ma gasina vi Bum-Sumuna vaya Yesu Kristuɗi, vi kuɗ hatta ta tap hiɗi vida kuɗ Lawnɗi kaw, 4Nam sli yam tuwam kulo'o, nam wi va noŋɗi kaw, may hayam dar cirepta hiɗi ci-wayta kay caw slena, kayni vuɗ hunayta, poŋ-ira, yaw diira, niŋa ma joona, 5ci-wayta ta vat noŋɗita vi sum sa ŋusta visi ɓulakiya, sa gasita visi mayɗi, vida kuɗ Lawna muɗi kirsi ki hagata ta fi gurju haya nala.

6Gasi, vida kuɗ Lawna hiɗi ŋalda cuki gaa klasi kayni mi faray ma ŋolo. 7Kay nay may mar va hay nagat noŋɗi, nay fi sli va kuɗay goyɗi kaw. 8May hay li ma nay fi tina hiɗi sligara, nay ma li firiya hiɗi kayni. 9May nisi sa min muɗ faraya, nisi nig gaa hay nemda hiɗi jawta hiɗi darta joota ŋolo, hiɗi sle ma gunina mara'a mara'a, ma sir sumuna gaa hay ba-goyta hiɗi ɓulak-goyta. 10Kay darta vi gurjuta kayni mi sutayna vi sle ma joon kaf, segena sa vul tuwsi hay darta vi gurjuta calawa goy gine'e hiɗi vida, kal tuwsiyawa hay lasta kuɗ jafa' kafe.

11May naŋu sana vi Lawna, piraŋ kay slen cani, garaŋ ɗigerta, narta kuɗ Lawna, vida, ti-kamda, ŋalda, zigin-zlata.

12Duraŋ duura vi vida ŋaa'a, vaŋ irita vatɗita, ta yaŋay ka'ta, ta naŋ di vun-ma-viyna ma ŋaana goy vok sa di-goyn ŋolo ka'a. 13Nan ka daŋu vok-ir Lawna ma vul irita mi slen kaf, vok ir Yesu Kristu kaw, ma di vun-ma-viyna ma ŋaana goy vok Pontiyus Pilatus, 14a naŋ ma ŋom vun-ma-gatna bay gese, bay lawta joota kaŋu kaw, ta-ta hay hotta vi Bum-Sumuna vaya Yesu Kristu, 15nam ma min ɗek tuwam goyo hay liyn ma kaay kaana, nam ma bum sle'ta, mul ma valam kepe ma vatɗina, mulla vi muliyana, Bum-Sumuna vi sumay sumuna. 16Nam kepe ma mitɗina, ma mus hay haraŋa ma sa as co hayamɗina, nam ma ir sa bay wumu, fi wumɗi kaw, talam namu suburta hiɗi gaŋeraŋa Ma-Vatɗina. Amen.

17Naŋ ma di tam nisi sa ka hiɗi farayna hay zaman ma vaydina, kay nisi ma subur tuwsi ŋolɗi, a nisi ma tun vida visi kay faray ma ba goynɗi kaw. May nisi ma tun vida visi hay Lawna ma vulay slen kaf ŋolo, hayay ma sleɗa kaw. 18Nisi ma la' ti ŋaata a nisi ma fi farayna hiɗi lop ma ŋaana, a nisi ma vul slen mi sumuna, a haysi ma li haɓi kaw, 19ki kayn nala nisi ka tok farayn ma ŋaana ma ɓulakɗina kay liyn ma vokŋa, kay ɓisi ma tun tam irita ta gasita.

20Naŋ Timotewus, ŋomaŋ sle ma naŋ fumna, muɗ bugolaŋ tam yoboy ma joona hiɗi waa ɗaara, hiɗi wida ta nisi ya' wida, may ti wida ta gasitɗi, 21Segena fi wida na'ta, may nisi co tam wida vi gasitaɗi.

Slugota mus hiɗi nigi musge!

Currently Selected:

1 TIMOTEWUS 6: Massana

Highlight

Copy