Génesis 41
41
Rey Faraonpa mosqokusqanmanta
1Iskay wata pasaruptinmi rey Faraonñataq mosqokururqa: Nilo mayupa patanpim pay sayachkasqa, 2hinaptinmi sumaq qanchis wira vacakuna Nilo mayumanta lloqsimuchkasqa, totorallaña ukupi pastota mikustin.
3Chay sumaq qanchis wira vacakunapa qepantañataqmi qanchis millakuypaq tullu vacakuna mayumanta lloqsimuchkasqa, hinaspam Nilo mayupa patanpi sumaq vacakunapa waqtanpi sayachkasqaku. 4Chay millakuypaq tullu vacakunam, qanchis sumaq wira vacakunata mikukururqaku, chayllamanmi Faraón rikcharirurqa. 5Ñataq puñuykuspanmi mosqoyninpi kayta rikurqa: Qanchis espigakunam chulla tullullamanta sumaqllaña lloqsimuchkasqa.
6Chaynataqmi qanchis pusillanña espigakunapas sumaqllaña espigakunapa qepanta rupaq wayrapa chakichisqan lloqsimuchkasqa. 7Hinaspam chay qanchis pusillanña espigakuna poqosqa allin grano espigakunata millpururqaku. Faraón rikchariruptinmi chayqa mosqoylla kasqa.
8Chaymi Faraonqa paqarinnintin punchawta llumpay hukmanyasqallaña kaspa, Egipto nacionpi layqakunata chaynataq yachayniyuqkunata qayachirqa. Hinaspam mosqoyninta willakurqa, ichaqa manam mayqanninkupas mosqoyninpa imam ninantaqa willayta atirqakuchu.
9Chaymi rey Faraonta vino serviqkunapa kamachiqnin nirqa:
Kunanmi huchayta yuyariruni.
10Reynilláy Faraón, qanmi piñakurqanki ñoqapa chaynataq panaderokuna kamachiqpa contranpi, hinaspam waqaychasuqniki soldadokunapa capitanninpa wasinpi carcelman apaykachiwarqankiku. 11Hinaptinmi ñoqapas chaynataq paypas chay tutalla mosqokururqaniku. Sapa mosqoypam huk willakuynin karqa. 12Chay carcelpim ñoqaykuwan kuska hebreo casta joven tarikurqa. Payqa waqaychasuqniki soldadokunapa capitanninpa serviqninmi karqa, payman willaptiykum mosqoyniykupa imam ninanta sapakamaman willaykuwarqaku.
13Chaymi paypa imam niwasqankuman hina cumplikurqa. Ñoqam llamkanayman kutiykamurqani, hukniytañataqmi warkurachirqanki, nispa.
14Hinaptinmi Joseyta Faraón qayachispa utqayllaman carcelmanta hurqochimurqa. Chukchanta rutuspam pachantapas mudaykachispa rey Faraonman pusamurqaku. 15Faraonmi Joseyta nirqa:
Mosqoyniypa imam ninantam mana pipas willawayta atinchu, ichaqa uyarirqanim mosqoykunata uyariykuspalla imam ninanta willakuq kasqaykita nispa.
16Joseyñataqmi Faraonta nirqa:
Chayqa manam ñoqallamantachu, aswanqa Diosmi allinnikipaq willasunki, nispa.
17Chaymi Joseyta rey Faraón nirqa:
Mosqoyniypim Nilo mayu patanpi sayachkasqani. 18Hinaptinmi Nilo mayumanta qanchis sumaq wira vacakuna lloqsimuchkasqa, hinaspam totorallaña ukupi pastota mikurqaku. 19Chay vacakunapa qepantañataqmi, qanchis millakuypaq tullu vacakuna lloqsimuchkasqa. Kay Egipto nacionpiqa manam chayna millakuypaq tullu vacakunataqa rikurqanichu.
20Chay millakuypaq tullu vacakunam punta kaq qanchis wira vacakunata mikukururqaku. 21Hinaspam mikuruspankupas mana mikusqa hinalla karqaku, punta kasqankupi hina tullulla, chayllamanmi rikcharirurqani.
22Huktawan mosqokuspaymi rikurqani chullalla tullumanta qanchis espigakuna sumaqllaña lloqsimuqta. 23Chaynataqmi rupaq wayrapa chakichisqan qanchis pusillanña espigakunapas sumaqllaña espigakunapa qepanta lloqsimuchkasqa.
24Chaymi pusillanña espigakuna qanchis sumaq espigakunata millpururqaku. Chaykunatam willarqani layqakunaman, ichaqa manam mayqanninkupas ima ninanmi kasqantapas willawayta atirqakuchu, nispa.
25Chaymi rey Faraonta José nirqa:
Mosqoynikikunaqa hukllam, Diosmi imam ruwananta qawachisuchkanki. 26Qanchis sumaq vacakunawan qanchis sumaq espigakunaqa qanchis watallam. Mosqoynikiqa chullallam.
27Chaykunapa qepanta wicharimuq millakuypaq tullu vacakunawan rupaq wayrapa chakichisqan qanchis pusillanña espigakunapas qanchis watakunallataqmi. Chay mosqoynikipa imam ninanqa qanchis wata muchuymi. 28Diosmi imam ruwananta qawachisuchkanki kay willasqayman hina:
29Qanchis watam Egipto nacionpi sumaqllaña kawsay qespinqa. 30Chaykunapa qepantañataqmi Egipto nacionpi qanchis wata muchuy kanqa. Hatun cosechakunatapas manañam yuyanqakuñachu, chay muchuymi kay nacionta wakchayachinqa.
31Ñawpaq sumaqllaña cosechakunatapas manañam rikunqakuñachu, llumpay muchuy kasqanrayku. 32Diosmi chaynatapuni utqayman ruwanqa, chaypaqmi iskay kutikama mosqorqanki.
33Chaynaqa, kunanpuni maskay allin yuyayniyuq chaynataq yachayniyuq runata hinaspa churay Egipto nacionpi kamachikunanpaq. 34Kaytawan ruway: Sapa llaqtapi kamachikuqkunata churay, chaynapi Egipto nacionpi qanchisnintin wata sumaqllaña cosechakunamanta, pichqa costalmanta hukninta huñuspa waqaychanankupaq.
35Chaynaqa, kay hamuq allin watakunapiyá qampa qawasqaykita llapallan kawsayta huñuchunku. Llapa trigokunatayá sapa llaqtapi taqechunku, muchuy tiempopi runakuna mikunankupaq. 36Hinaptinmi Egipto nacionpaq chay kawsaykuna waqaychasqa kanqa, chaynapi qanchis wata muchuypi runakuna yarqaymanta mana wañurunankupaq, nispa.
Egiptopi José kamachikusqanmanta
37Faraonpaqwan yanapaqninkunapaqmi Joseypa nisqankuna allinpaq rikchakapurqa. 38Hinaptinmi runankunata Faraón nirqa:
José hina Diospa espiritunwan kaq runataqa manam maypipas tarichwanchu, nispa.
39Chaymi Joseyta Faraón nirqa:
Diosllam tukuy kaytaqa willasurqanki, qam hina yuyayniyuq hinaspa yachayniyuq runaqa manam pipas kanchu. 40#Hch 7.10.Qanmi kay palacioypi kamachikunki, lliw runaykunam kamachisqaykita kasusunki. Ñoqallañam rey kasqayrayku qanmanta masqa kasaq, nispa.
41Faraonqa nirqataqmi:
Kunanmi Egipto nacionpi kamachikunaykipaq churayki, nispa.
42Hinaspanmi makinmanta sellanan anillota hurqoykuspa Joseyman churaykurqa, fino linomanta pachawan pachaykachispam kunkanmanpas qorimanta collarta churaykurqa. 43Hinaspam Joseytaqa allinnin carretapi muyuchimurqa, puntan riqkunañataqmi qaparirqaku: “¡Pay pasananpaq ñanmanta asuriychik!” nispanku. Chaynatam José Egipto nacionpi kamachikuqpaq churasqa karqa.
44Faraonqa nirqataqmi:
Ñoqa rey kachkaptiypas Egipto nacionpi runakunaqa qam kamachiptillaykim tukuy imatapas ruwanqaku, nispa.
45Joseytam Faraón suticharqa “Zafnat-panea” nispan. Casarachirqañataqmi On llaqtapi sacerdote Potiferapa warmi churin Asenatwan, chaynapim Joseyqa Egipto nacionpi allin reqsisqa karqa.
46Joseyqa kimsa chunka watayuqmi karqa, Egiptopi rey Faraonpa qayllanman pusaptinkuqa. Joseymi rey Faraonpa palacionmanta lloqsirqa lliw Egipto nacionpi purimunanpaq.
47Qanchis watam chakrakunapi cosecha alli-allinta qespirqa. 48Chaymi Joseyqa, lliw Egipto allpapi wiñaq kawsaykunamanta qanchisnintin wata huñurqa. Muyuriqnin chakrakunamanta huñuspam sapa llaqtapi waqaycharqa.
49Joseymi trigota huñururqa lamar qochapi aqota hinaña, manaña yupaypas atinankama.
50Manaraq muchuy chayamuchkaptinmi, Joseypa churinkuna iskayña karqa, paykunatam warmin Asenat wachakurqa. Asenatqa On llaqtapi sacerdote Potiferapa churinmi karqa.
51Joseymi piwi kaq churinta Manaseswan suticharqa: “Diosmi tukuy llakiyta qonqaykachiwan chaynataq aylluykunatapas” nispa.
52Huknin churintañataqmi Efrainwan suticharqa: “Diosmi ñakarisqay nacionpi miraykachiwan” nispa.
53Egipto nacionpi kawsaykunapa sumaqllaña qespinan qanchis watakunam pasarurqa. 54#Hch 7.11.Hinaptinmi Joseypa nisqanman hina qanchis wata muchuy qallaykurqa, chay muchuyqa llapallan nacionkunapim karqa. Egipto nacionpim ichaqa mikuy karqa, trigota huñusqankurayku.
55 #
Jn 2.5. Chaymantam Egipto nacionpipas muchuy qallaykurqa. Hinaptinmi llapa runakuna rey Faraonta mikuyta mañakurqaku. Chaymi Faraonñataq nirqa:
Joseyman rispa imam nisusqaykichikta ruwamuychik, nispa.
56Egipto nacionpi llumpayta muchuy miraruptinmi, José kicharqa taqekunapa kasqan wasikunata, trigota runakunaman rantikunanpaq, Egipto nacionpi aswan-aswan muchuy kasqanrayku. 57Llapallan nacionkunapi llumpay muchuy kaptinmi, huklaw llaqtakunamantapas Egipto nacionman riqku, kawsaykunata Joseymanta rantimunankupaq.
Currently Selected:
Génesis 41: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
