Hechos 20

Macedoniaman hinaspa Greciaman Pablopa risqanmanta

1Chay chaqwa tukuruptinmi, iñiqkunata Pablo huñuruspan allinta kallpancharqa, hinaspam despedikuspan Macedonia lawman lloqsirqa. 2Llaqtan-llaqtan rispanmi iñiqkunata kallpanchastin Grecia lawman chayarurqa. 3Chaypi kimsa killa karuspanmi barcopi Siria lawman rinanpaq kachkaspan, yachakururqa judiokuna paypa contranpi yacharachinakusqankuta. Chaymi Macedonia lawnintaña kutimurqa. 4Hinaptinmi payta compañarqaku Berea llaqtayuq Pirropa churin Sópater, Aristarco, Tesalónica llaqtayuq Segundo, Derbe llaqtayuq Gayo, Timoteo hinaspa Asia lawmanta kaq Trofimowan Tíquico. 5Paykunam puntaruspanku Troas llaqtapiña suyawarqaku. 6Ñoqaykuñataqmi mana levadurayuq tanta fiesta pasaruptin, Filipos llaqtamanta barcopi lloqsirqaniku, hinaspam pichqa punchawmantaña paykunata Troas llaqtapi hayparqaniku, hinaspaykum qanchis punchawraq chaypi qeparqaniku.

Troas llaqtapi iñiqkunata Pablo watukusqanmanta

7Semanapa qallariynin domingo punchawtam, tantata partenakunankupaq llapa iñiqkuna huñunakurqaku, hinaptinmi Pablo yachachirqa. Ichaqa paqarinnintillan pasakunan kasqanraykum chawpi tutakama yachachirqa. 8Wasipa altosnin cuartopim huñunasqa kachkarqaniku achka lamparakunawan achkikuspayku. 9Ventanapiñataqmi Eutico sutiyuq joven tiyachkarqa. Pablo tutakama rimaptinmi chay jovenqa puñuywan aysachikusqanpi puñuruspan, wasipa kimsa kaq altosninmanta wichiykurqa, chaymi wañusqataña hoqarirqaku. 10Pabloñataqmi uraykuspan chay jovenpa hawanman chutakuykuspan abrazaykurqa, hinaspam llapa iñiqkunata nirqa:

Ama manchakuychikchu, kawsachkanmi, nispa.

11Chaymantam altosman kaqlla seqarqa, chaypim tantata pakiykuspan mikurqa, hinaspam achikyanankama rimaruspan pasakurqa. 12Llapa iñiqkunañataqmi chay joventa kawsachkaqtaña pusarqaku, chaywanmi llumpayta kallpanchakurqaku.

Troasmanta Mileto llaqtaman Pablopa risqanmanta

13Ñoqaykum barcopi puntaruspayku Asón llaqtaman rirqaniku, Pablota hoqarinaykupaq. Paymi rimanakusqaykuman hina chakiwan rirqa. 14Paywan Asón llaqtapi tuparuptiykum, barcoman seqaramuptin Mitilene llaqtaman pasarqaniku. 15Chaymanta barcopi lloqsispaykum paqarinnintin Quío islapa chimpanman chayarqaniku. Paqarinnintin punchawñataqmi Samos islaman chimparqaniku, paqarinnintin punchawñataqmi Trogiliopi sayaykuspayku Mileto llaqtaman chayarqaniku. 16Chaynataqa ruwarqaniku Efesoman Pablo mana riyta munaptinmi chaynapi Asia lawpi mana tardanaykupaq. Jerusalén llaqtamanmi utqayman riyta munarqa atispaqa chaypi Pentecostés punchawpi kananpaq.

Éfeso llaqtapi ancianokunawan rimasqanmanta

17Pablom Mileto llaqtapi kachkaspan, Efesopi iñiqkunapa ancianonkunata qayachirqa. 18Paykuna hamuruptinmi Pablo nirqa:

Qamkunam yachankichik kay Asia lawman hamusqaymantapuni imaynam qamkunawan kawsasqayta. 19Llapa judiokuna imataña ruwawayta munaptinkupas humillakuspaymi waqastinpas hinaspa ñakaristinpas Señorninchikta servirqani. 20Chaywanpas allinnikichikpaq Diospa palabran willaytaqa manam amirqanichu, ñoqaqa yachachirqaykichikmi llapa runakunapa qayllanpipas chaynataq wasikichikpipas. 21Judiokunamanpas chaynataq mana judiokunamanpas nirqanim: “Huchaykichikmanta wanakuspa Diosman kutirikuychik, hinaspa Señorninchik Jesusman iñikuychik”, nispa. 22Kunanmi Jerusalén llaqtaman richkani Chuya Espiritupa kamachisqan, manam yachakunichu wakpi imam suyawasqantapas. 23Sapa llaqtaman risqaypim Chuya Espíritu niwan: “Presochasuptikim ñakarinki”, nispan. 24#2 Ti 4.7.Ichaqa vidaypas ñoqapaqqa manam llumpay valorniyuqchu. Aswanpas munani Señor Jesucristopa kamachiwasqanta kallpachkaq hina kusikuywan ruwaytam hinaspa Diospa kuyakuyninmanta willakunaypaq Señor Jesucristopa kamachiwasqan cumpliytam.

25Qamkunamanmi Diospa munaychakuyninmanta yachachirqaykichik, kunanmi ichaqa yachakuni, manañam huktawanqa rikuwankichikñachu. 26Chayraykum kunan nikichik, manam huchayuqchu kani llapallan runakuna castigasqa kanaykichikmantaqa. 27Diospa munasqantaqa mana imatapas pakaspaymi willarqaykichik. 28Chaynaqa, cuidakuychikyá, cuidaychiktaqyá iñiqkunatapas, paykunata michinaykichikpaqmi Chuya Espíritu qamkunata akllasurqankichik, paykunaqa Señorninchik Jesucristopa yawarninwan rantisqanmi. 29Yachanim, ñoqa pasakuptiyqa pantachikuqkuna hamunanta, paykunam yarqasqa atoqkuna hina, iñiqkunata chinkarachiyta munanqaku. 30Qamkuna ukumantapas wakinkunam hatarinqaku, paykunam iñiqkuna qatinanta munaspanku llullakunata yachachinqaku. 31Chaynaqa cuidakuychikyá, amayá qonqaychikchu weqeywan tuta punchaw kimsa watantin sapakamaman yachachisqaytaqa.

32Wawqellaykuna, kunanqa Diospa makinmanwan kuyakuy palabranmanñam saqekichik, payqa atiyniyuqmi iñiynikichikpi wiñachisunaykichikpaq, chaynataq chuyanchasqan llaqtanman prometesqan herenciata qosunaykichikpaqpas. 33Ñoqaqa manam pipa qollqentapas, qorintapas nitaq pachantapas munapayarqanichu. 34Aswanqa yachasqaykichikpi hinam makiywan llamkaspay imatapas rantiq kani ñoqapaq chaynataq puriqmasiykunapaqpas. 35Qamkunatapas yachachirqaykichikmi ñoqa hina llamkaspa wakchakunata yanapanaykichikpaq. Amayá qonqaychikchu Señor Jesucristopa nisqanta, paymi nirqa: “Chaskispa kusikuymantaqa, qospa kusikuymi aswan allinqa” nispa.

36Chaykunata Pablo rimaruspanmi qonqorakuykuspan paykunawan kuska Diosta mañakurqa. 37Chaymi llapallanku anchata waqakuspanku Pablota abrazaykuspa muchaykurqaku, 38hinaspam “manañam huktawanqa rikuwankichikñachu” nisqanwan llumpay llakisqallaña karqaku. Chaymantam barcopa kasqankama compañarqaku.

Currently Selected:

Hechos 20: RCHQ2

Highlight

Copy