Hechos 18

Corinto llaqtaman Pablo chayasqanmanta

1Chaykunapa qepantam, Atenas llaqtamanta Pablo lloqsispan Corinto llaqtaman pasarqa. 2Chaypim Aquila sutiyuq judiowan tuparurqa, payqa Ponto law llaqtayuqmi karqa. Paymi warmin Priscilawan chayraq Italia lawmanta chayaramurqaku, Roma nacionmanta llapa judiokuna lloqsinankupaq emperador Claudio kamachikusqanrayku. Pablom paykuna watukuq rirqa. 3Hinaspam Aquila hina carpakuna ruwaq kasqanrayku paykunawan kuska llamkananpaq qeparqa. 4Sapa samana punchawmi Pabloqa judiokunapa sinagoganman rispan judiokunata chaynataq mana judiokunatapas Jesucristoman iñichiyta munaspan rimapayaq.

5Silaswan Timoteo Macedoniamanta chayaramuptinkum, Pabloqa mana samaykuspa Diospa palabranta willakurqa, hinaspam judiokunaman yachachirqa Jesusqa suyasqanku Cristopuni kasqanta. 6Chay judiokunam ichaqa Pablopa contranpi hatarispanku imaymanata rimarqaku, hinaptinmi Pabloñataq pachantapas taspispanraq nirqa:

Wiñaypaq wañuyman wichispaqa kikikichikmi huchayuq kankichik, manam ñoqachu. Kunanmantaqa mana judío kaqkunamanñam willakuq risaq, nispa.

7Hinaspanmi judiokunapa sinagoganmanta lloqsikuruspan, Ticio Justo sutiyuq runapa wasinman pasakurqa. Payqa karqa Diosta kasukuqmi, wasinpas karqa sinagogapa waqtallanpim. 8Crispo sutiyuq runam judiokunapa sinagoganpi kamachikuq karqa, paymi wasinpi llapallan kaqkunapiwan Jesucristoman iñikururqaku. Corintopi kaqkunamantapas achkaqmi Pablota uyarispanku iñikururqaku, hinaspam bautizakurqaku. 9Huk tutam Pablo puñuchkaptin, visionninpi Señor rikuriykuspan nirqa:

Ama manchakuychu, ama upallaspa hinalla willakuy. 10Ñoqam qanwan kachkani, manam pipas imanasunkichu. Kay llaqtapiqa achkallañam kachkan akllasqaykuna, nispa.

11Chaymi Pabloqa Corinto llaqtapi wata parten yacharqa, Diospa palabranta paykunaman yachachispan.

12Ichaqa Acaya lawpi Galión gobernador kachkaptinmi, Pablopa contranpi llapa judiokuna huñunakururqaku, hinaspankum juzgadoman aparuspanku 13nirqaku:

Kay runam llapa runakunata creechichkan leyninchikpa contranpiña Diosta yupaychanankupaq, nispanku.

14Pablo rimarinanpaq kachkaptinmi, llapa judiokunata Galión nirqa:

Judiokuna, sichum kay queja kanman imapas mana allin ruwaymanta otaq pipa contranpipas sayariymanta, hinaptinqa mana imanispaychá uyarikichikman. 15Sichum rimasqaykichikmanta, sutikunamanta hinaspa leynikichikmanta quejaykichik kaptinqa, kikikichikyá imaynatapas allichakuychik, chaykunamanqa manam chapukuymanchu, nispan.

16Hinaspanmi llapa judiokunata juzgadonmanta hawaman qarqoramurqa. 17Hinaptinmi llapa runakuna, sinagogapi kamachikuq Sostenesta hapiruspanku, gobernadorpa ñawpaqninpi maqaparqaku. Gobernador Galiontam ichaqa mana imapas qokurqachu.

PABLOPA KIMSA KAQ ILLASQANMANTA

Antioquiaman Pablopa kutisqanmanta

18 # Nm 6.18. Pablom unay punchawkuna Corinto llaqtapi qeparqa, hinaspam llapa iñiqkunamanta despedikuykuspan, Aquilawan hinaspa Priscilawan kuska Siria lawman pasarqaku. Cencrea llaqtaman chayaruptinkum, Diosman promesa ruwasqanta cumplinanpaq lliw chukchanta rutukururqa. 19Éfeso llaqtaman chayaruptinkum, Aquilatawan Priscilata chaypi saqeykuspa sapallanña judiokunapa sinagoganman pasarqa, hinaspam chaypi judiokunawan atipanakurqa. 20Paykunam Pablota ruegarqaku chaypi unay qepananpaq, ichaqa paymi mana munaspan 21paykunamanta despedikurqa:

Dios munaptinqa huktawanmi kutimusaq watukuqnikichik, nispan.

Chaymantam Éfeso llaqtamanta barcopi pasakurqa. 22Cesarea llaqtaman chayaruspanmi, iñiqkunata saludaykunanpaq Jerusalenman rirqa, chaymantam Antioquía llaqtaman pasarqa. 23Chaypi tardarispanmi, huktawan pasaspan Galacia lawkunapi hinaspa Frigia lawkunapi purirqa llapa iñiqkunata kallpanchastin.

Éfeso llaqtapi Apolospa willakusqanmanta

24Chay punchawkunapim Éfeso llaqtaman chayarurqa judiokunamanta kaq Alejandría llaqtayuq Apolos. Payqa karqa Diospa palabranta allin yachaqmi hinaspa allin willakuqmi. 25Señormanta yachachisqa kachkaspapas bautizaq Juanpa yachachisqan bautismollatam reqsirqa, hinaspam kusikuyllawanña Jesusmanta haykam yachasqanta willakuq. 26Paymi judiokunapa sinagoganpi mana manchakuspa willakuyta qallaykurqa. Chayta Priscilawan Aquila uyariruspankum wasinkuman pusarqaku, hinaspam aswan allintaraq Diospa ñanninmanta yachachirqaku. 27Acaya lawman Apolos rinanpaq kaptinmi, Éfeso llaqtapi wawqe-panikuna kallpanchaspanku, chay llaqtapi kaq iñiqkunaman cartata qellqarqaku, chaynapi Apolos chayaptin allinllata chaskiykunankupaq. Chay llaqtaman Apolos chayaruspanmi, Diospa kuyakuyninman hina iñiqkunata llumpayta yanaparqa. 28Atiywan llapa runakunapa qayllanpi rimaspanmi judiokunata pantaypi kasqankuta qawachirqa. Qellqaman hina qawachispantaqmi Jesusqa suyasqanku Cristo kasqanta reqsichirqa.

Currently Selected:

Hechos 18: RCHQ2

Highlight

Copy