Tʋma Labʋ 17

Pɔɔlɩ nɛ Silaasɩ powoba Tesalooniki

1Pɔɔlɩ nɛ Silaasɩ pakʋyɩ Liidii tɛ lɛ, patɩŋnɩ Amfipolii nɛ Apolooni pɛ-tɛtʋ taa nɛ pɔkɔɔ patalɩ Tesalooniki ñɩndʋ taa. Yuda ñɩma Ɛsɔ ɖɩsɛyɛ naɖɩyɛ kɛwɛ peeɖe. 2Patalaa nɛ pɩtalɩ kɩyakʋ kɩhɛzʋʋ lɛ, Pɔɔlɩ wolo Ɛsɔ ɖɩsɛyɛ taa ɛzɩ ɛtɩɩlakʋʋ yɔ. Peeɖe ɛ nɛ Yuda ñɩma palabɩ lɩmaɣza Ɛsɔtɔm Takayaɣ taa tɔm yɔɔ kɩyakɩŋ kɩhɛzɩŋ naadozo. 3Ɛlɩzɩ-wɛ tɩ-tɔbʋʋ nɛ ɛtɩŋnɩ tɩ-yɔɔ nɛ eheyi-wɛ se Weyi Ɛsɔ Lɩzaa Yɔ, pɩɩwɛ ḿbʋ́ se ɛtɔɔ kʋñɔŋ siŋŋ nɛ ɛkɔɔ ɛsɩ nɛ efe nɛ ɛlɩɩnɩ sɩɖaa taa. Eheyi-wɛ se Yesu weyi ɛkɛdɩɣ-wɛ ɛ-tɔm yɔ, ɛnʋ lɛ Weyi Ɛsɔ Lɩzaa Yɔ. 4Ɛyáa ḿbá, pa-taa lɛlaa tisi tɔm ńdʋ́ nɛ patɩŋ Pɔɔlɩ nɛ Silaasɩ pa-wayɩ nɛ pɩkpɛndɩnɩ Grɛɛkɩ ñɩma sakɩyɛ mbá pañaŋaɣ Ɛsɔ yɔ nɛ abila naayɛ. 5Peeɖe Yuda ñɩma labɩ ɛsɩsɛmɩyɛ nɛ pekpeɣli añɔndɔmwaa nabɛyɛ nɛ pa nɛ wɛ peyele ɛyáa kpeɣli Tesalooniki tɛtʋ ńdʋ́ tɩ-taa nɛ peseɣti-wɛ. Halɩ paaku ɖama nɛ powolo abalʋ weyi payaɣ se Yaasɔɔ yɔ ɛ-tɛ nɛ pañɩnɩɣ Pɔɔlɩ nɛ Silaasɩ se pakpa-wɛ nɛ pahʋʋnɩ-wɛ tɔm samaɣ ɛsɩndaa. 6Ɛyáa ḿbá powoba lɛ, patana-wɛ. Peeɖe pakpa Yaasɔɔ nɛ pɛkpɛndɩnɩ taabalaa nabɛyɛ nɛ pɔhɔm-wɛ nɛ powoni tɛtʋ ñʋndɩnaa cɔlɔ nɛ poholuu se: «Ɛyáa panɛ, pɛwɛɛkɩɣ kedeŋa kpeekpe, lɛɛlɛɛyɔ, patalɩ ɖɛ-tɛ cɩnɛ 7nɛ Yaasɔɔ mʋ-wɛ nɛ pɛwɛɛ ɛ-tɛ! Pa-taa nɔɔyʋ ɛɛɖɔŋ mbʋ́ Room wiyaʋ sɔsɔ ɖʋwa yɔ pʋ-yɔɔ, pɔyɔɔdʋʋ se nɔɔyʋ wɛɛ ɖɔɖɔ, ɛkɛ wiyaʋ sɔsɔ, ɛnʋ lɛ Yesu.» 8Tɔm ńdʋ́, tɩɩcɛyɩ ñʋndɩnaa ḿbá nɛ ɛyáa samaɣ siŋŋ. 9Ɛlɛ́, pɛpɛlɩ Yaasɔɔ nɛ ɛ-taabalaa kɩmɩyɛ nɛ pɛhɛyɩ-ɖɩ nɛ pʋcɔ peyebi-wɛ.

Pɔɔlɩ nɛ Silaasɩ powoba Beree

10Đoo tɩyuwa lɛ, taabalaa heyi Pɔɔlɩ nɛ Silaasɩ se pɛɖɛɛ Beree tɛtʋ taa. Patalaa lɛ, powolo Yuda ñɩma Ɛsɔ ɖɩsɛyɛ taa. 11Peeɖe Yuda ñɩma lɩmaɣza kɛwɛ ɖeu nɛ pɩkɩlɩ Tesalooniki ñɩma, mbʋ́ pʋyɔɔ yɔ, paatisi Ɛsɔtɔm nɛ pa-laŋɩyɛ tɩŋa pilim. Paa ɖooye pañɩnaɣ Ɛsɔtɔm Takayaɣ taa se pana se tɔm ndʋ́ Pɔɔlɩ yɔɔdʋʋ yɔ, tɩkɛ toovenim na. 12Pa-taa ɛyáa sakɩyɛ kɛwɛnɩ lidaʋ Yesu yɔɔ, pɩkpɛndɩnɩ Grɛɛkɩ ñɩma: abila nɛ abalaa sakɩyɛ, nɛ petisi se tɩkɛ toovenim. 13Yuda ñɩma mbá pɛwɛ Tesalooniki yɔ, panɩwa se Pɔɔlɩ wɛɛ nɛ esusuu Ɛsɔtɔm Beree ḿbʋ́ lɛ, pakʋyɩ powolo peeɖe nɛ peseɣtiɣ ɛyáa nɛ peliɣtiɣ pa-lɩmaɣza. 14Pʋ-yɔɔ taabalaa heyi Pɔɔlɩ se ɛɖɛɛ teŋgu hɔɔlʋʋ taa kpaagbaa. Ɛlɛ́, Silaasɩ nɛ Timootee paba ñacaɣ peeɖe. 15Ɛɖɛɣaɣ lɛ, nabɛyɛ sɩɩ-ɩ nɛ patanɩ-ɩ Atɛɛnɩ tɛtʋ taa. Papɩsaɣ lɛ, eheyi-wɛ se patalaa lɛ, peheyi Silaasɩ nɛ Timootee se pakʋyɩ kpaka nɛ patɩŋ ɛ-wayɩ.

Pɔɔlɩ woba Atɛɛnɩ

16Pɔɔlɩ kaawɛ Atɛɛnɩ nɛ ɛɖaŋ Silaasɩ nɛ Timootee lɛ, ɛna se agɔlɩma coka ɖeke suni tɩ-taa. Pʋ-yɔɔ pɩwɩzɩ-ɩ 17nɛ ɛtɛzɩ ɖɛʋ ewolo Yuda ñɩma Ɛsɔ ɖɩsɛyɛ taa nɛ ɛ nɛ Yuda ñɩma nɛ mbá pɛtɛkɛ Yuda ñɩma nɛ pañaŋ Ɛsɔ yɔ, palakɩ lɩmaɣza Yesu tɔm yɔɔ. Paa ɖooye, ewokaɣ ɛyáa samaɣ ɖikpeɣliye nɛ ɛ nɛ mbá pɛwɛ peeɖe yɔ pɔyɔɔdʋʋ. 18Peeɖe lɔŋsɩnɖaa mbá pɛkɛ Epikuri nɛ Sitoyiisi pa-aŋgba taa ñɩma yɔ, powobi Pɔɔlɩ cɔlɔ nɛ pa nɛ ɩ pɔyɔɔdʋʋ nɛ pa-taa lɛlaa tɔŋ se: «Abalʋ kɔkɔɖɛ yaɖʋ ɛnɛ, se we ɛyɔɔdʋʋ yee?» Lɛlaa ñanɩ ɛyɔɔdaɣ Yesu sɩm nɛ e-fem pɔ-tɔm ḿbʋ́ lɛ, paba ñɔtɔŋ se: «Paa pɩɩla ɛzɩma, agɔlɩma kɩfana tɔm ɛyɔɔdʋʋ.» 19Pʋ-yɔɔ pakpaɣ-ɩ powoni ɛyáa samaɣ ɖikpeɣliye ɖenɖe payaɣ se Areyoopajɩ yɔ nɛ pɔpɔzɩ-ɩ se: «Tɔm kɩfatʋ ndʋ́ ŋwɩlɩɣ ɛyáa ɛzʋnɔ yɔ, tʋtʋ lɛ ndʋ́ kpem? 20Mbʋ́ pʋyɔɔ yɔ, tɔm ndʋ́ ŋheyiɣ-ɖʋ yɔ, ɖɩtanɩdɩ-tʋ kaʋ, pʋ-yɔɔ ɖɩcaɣ se ɖɩnɩɩ tɩ-tɔbʋʋ.» 21Toovenim lɛ, Atɛɛnɩ ñɩma tɩŋa payɩ nɛ agɔmaa mbá pɛwɛ peeɖe yɔ, pa-tʋmɩyɛ lɛ se tɛʋ efema lɛ, pɛwɛɛ tɔm taa tazʋʋ nɛ tɩ-susuu yɔɔ.

22Ḿbʋ́ hanɩ Pɔɔlɩ waɖɛ nɛ ewolo ɛsɩŋ Areyoopajɩ hɛkʋ taa nɛ eheyi-wɛ se: «Atɛɛnɩ ñɩma mɩ! Manawa se ɩkɛ agɔlɩma tɛɛ luŋiyaa siŋŋ. 23Mbʋ́ pʋyɔɔ yɔ, mɔncɔwaɣ mɩ-tɛtʋ taa lɛ, mana agɔlɩma wena a-tɛɛ iluŋaɣ yɔ a-coka. Halɩ mana ɖoli nɔɔyʋ cokiye naɖɩyɛ, pama ɖɩ-yɔɔ se: ‹Ɛgɔlɩmɩyɛ nɖɩ́ ɖɩtasɩm-ɖɩ yɔ ɖi-cokiye yɔ.› Tɔɔ! Pʋwɛ ɖeu. Ɛlɛ́, mbʋ́ iluŋuu pɩ-tɛɛ nɛ ɩtasɩm-pʋ yɔ, pʋ-tɔm ma Pɔɔlɩ mɔnkɔm-mɩ heyuu: ḿbʋ́ lɛ 24Ɛsɔ. Ɛnʋ labɩnɩ kedeŋa kpeekpe nɛ mbʋ́ pɩtɩŋa pʋwɛ kɔ-yɔɔ yɔ, ɛnʋ lɛ Kɩpaɣlʋ ɛsɔdaa nɛ tataa. Ɛɛcakɩ coka wena ɛyáa manɩ pe-nesi yɔ a-tɛɛ. 25Ɛfɛyɩ kɛtɛɖaɣ taa nɛ pʋpɔzʋʋ se ɛyáa ɛlabɩ-ɩ pʋyʋ. Mbʋ́ pʋyɔɔ yɔ, ɛnʋ hanɩ patɩŋa payɩ wezuu nɛ mbʋ́ pɩtɩŋa pʋwɛ kedeŋa yɔɔ yɔ. 26Ɛtɩŋnɩ ɛyʋ kʋɖʋm weyi ɛlayɩ labʋ yɔ ɛ-yɔɔ nɛ ɛla ɛyáa kpeekpe kedeŋa yɔɔ. Ɛɖʋ-wɛ alɩwaatʋ ndɩ ndɩ nɛ ɛtayɩ-wɛ ajɛya. 27Ɛlabɩ ḿbʋ́ se ɛyáa ɛñɩnɩ-ɩ kpeɣu taa kpeɣu taa nɛ pʋtɔmaɣ yɔ, pana-ɩ. Ŋgʋ́, Ɛsɔ toposini ɖa-taa nɔɔyʋ. 28Mbʋ́ pʋyɔɔ yɔ, ɛ-yɔɔ ɖɩwɛ wezuu nɛ ɖɩlakɩ pɩtɩŋa. Ḿbʋ́ ɖɔɖɔ mɩ-tɛ hendu teyaa nabɛyɛ kɔyɔɔdaa. Pɔyɔɔdaa se: ‹Đa ɖɔɖɔ ɖɩkɛ e-liɖe taa ñɩma.›

29Yee ḿbʋ́ pɩfɛyɩ se ɖɩmaɣzɩ se papɩzɩɣ pakpaɣ-ɩ nɛ pɛkɛdɩnɩ sɩʋ kpelaɣ ŋgá ɛyáa maɣzaa nɛ polubini sika yaa liidiye yaa pɩyɛ nɛ pacanɩ-kɛ yɔ. 30Ɛsɔ ɛɛtasɩɣ kpaɣʋ mbʋ́ ɛyáa kalabɩ ɖooo lɔŋ nɛ patatɩlɩ yɔ nɛ ɛlabɩnɩ tʋmɩyɛ. Ɛlɛ́, lɛɛlɛɛyɔ eheyiɣ patɩŋa payɩ paa le se pɛlɛɣzɩ wɛtʋ. 31Mbʋ́ pʋyɔɔ yɔ, ɛtɛm ɖʋʋ kɩyakʋ ŋgʋ́ ɛkɔŋ hʋnaʋ kedeŋa kpeekpe yɔɔ ɛyáa nɛ toovenim yɔ. Ɛyʋ weyi ɛlɩzaa yɔ, ɛ-yɔɔ ɛtɩŋɩɣna nɛ ɛhʋʋnɩ-wɛ tɔm. Mbʋ́ ɛwɩlɩnɩ paa weyi se ɛkɔŋ-pʋ labʋ yɔ lɛ se efezi-i nɛ sɩɖaa taa.»

32Mbá pɛwɛ peeɖe yɔ, panɩ Pɔɔlɩ yɔɔdaɣ sɩɖaa fem tɔm ḿbʋ́ lɛ, pa-taa lɛlaa woŋ-i nɛ lɛlaa ñɔtɔŋ se: «Wiɖiyi lɛ, ŋŋtasɩ kɔm nɛ ŋheyi-ɖʋ-tʋ.»

33Peeɖe ɛkʋyɩ pɛ-hɛkʋ taa nɛ ɛɖɛɛ. 34Paa ḿbʋ́ yɔ, nabɛyɛ kanɩnɩ-ɩ nɛ petisi ɛ-tɔm nɛ pɛwɛnɩ lidaʋ Krɩstʋ yɔɔ. Pa-taa yɔ: Denisi weyi ɛkɛ Areyoopajɩ tɔm hʋyaa taa lɛlʋ yɔ nɛ halʋ weyi payaɣ se Damaari yɔ nɛ lɛlaa ɖɔɖɔ.

Currently Selected:

Tʋma Labʋ 17: KABI

Highlight

Copy