Tʋma Labʋ 16

Timootee sɩɣ Pɔɔlɩ nɛ Silaasɩ

1Pɔɔlɩ nɛ Silaasɩ paatɩŋnɩ Dɛɛrbɩ nɛ powolo Listrɩ. Patalaa lɛ, pamaɣnɩ Krɩstʋ wayɩ tɩŋɩyʋ nɔɔyʋ, payaɣ-ɩ se Timootee. E-ɖoo kɛ Yuda tʋ, ɛ́lɛ́ wɛnɩ lidaʋ Krɩstʋ yɔɔ. Ɛ-caa ñɛkɛ Grɛɛkɩ tʋ. 2Listrɩ taabalaa nɛ Ikoniyɔm ñɩma palɩzaɣ aseɣɖe kɩbanɖɛ ɛ-yɔɔ. 3Pɔɔlɩ liu kɛwɛɛ se ɛkpɛndɩnɩ-ɩ. Pʋ-yɔɔ ɛkpaɣ-ɩ nɛ ɛpɛlɩ-ɩ, mbʋ́ pʋyɔɔ yɔ, Yuda ñɩma mbá paawɛ ageeta ana a-taa yɔ, pana patɩŋa se ɛ-caa kɛ Grɛɛkɩ tʋ. 4Pɛɖɛɣaɣ nɛ patɩŋnɩ tɛtʋ ndɩ ndɩ ndʋ́ tɩ-taa yɔ, peheyaɣ tɩ-taa ñɩma mbá pɛwɛnɩ lidaʋ Krɩstʋ yɔɔ yɔ tɔm ndʋ́ e-tiyiyaa nɛ Yeruusalɛm Krɩstʋ ŋgbɛyɛ taa sɔsaa paaɖʋwa yɔ. Paakam pa-ñʋŋ taa se pɔɖɔ tɩ-yɔɔ. 5Alɩwaatʋ ńdʋ́ lɛ, Krɩstʋ aŋgba taa ñɩma tɛzaɣ kpaʋ ɖoŋ pe-lidaʋ wɛnaʋ taa nɛ pɛtɛzɩɣ ɖɔʋ kɩyakɩŋ tɩŋa.

Paya Pɔɔlɩ Masedonii egeetiye taa

6Fezuu Kiɖeɖeu taaha Pɔɔlɩ nɛ ɛ-taabalaa nʋmɔʋ se posusi Ɛsɔtɔm Aazii egeetiye taa. Pʋ-yɔɔ pakpaɣ nʋmɔʋ nɛ patɩŋnɩ Frijii egeetiye nɛ Galaasii ɛjaɖɛ pa-taa se pɛɖɛɣ. 7Pɔñɔtɩnɩ Miisii egeetiye lɛ, pala ka ka se powoki Bitinii ñɩnɖɛ taa, ɛlɛ́, Yesu Fezuu taha-wɛ nʋmɔʋ. 8Peeɖe pɛtɛzɩ Miisii ñɩnɖɛ taa tɩŋnaʋ nɛ powolo Trowaasɩ. Tɛtʋ ńdʋ́ tɩ-taa mɛlɛnaa sɩŋɩɣ. 9Đoo yuwa lɛ, Pɔɔlɩ ɖozi se Masedonii tʋ nɔɔyʋ kɔm ɛsɩŋ ɛ-yɔɔ nɛ etendi-i se: «Kʋyɩ ŋtɛzɩ ɖɛ-tɛ nɛ ŋsɩnɩ-ɖʋ.» 10Pɔɔlɩ tɛm ɖozuu ḿbʋ́ lɛ, ɛ nɛ ɛ-taabalaa nɛ ma Luka ɖɩtɩkʋyɩ nɛ ɖɩpazɩ ñɩnʋʋ ɛzɩma mbʋ́ ɖɩɩla nɛ ɖiwolo Masedonii egeetiye taa yɔ. Mbʋ́ pʋyɔɔ yɔ, ɖɩtɛm naʋ se Ɛsɔ yaɣnɩ-ɖʋ se ɖiwolo peeɖe nɛ ɖisusi Laŋhɛzɩyɛ Tɔm.

Liidii tisi Kɩpaɣlʋ yɔɔ Filiipu tɛtʋ taa

11Peeɖe ɖɩsʋ mɛlɛ Trowaasɩ nɛ ɖɩɖɛɛ Samootrasɩ ɛjaɖɛ nɖɩ́ lɩm cɔ-ɖɩ pɩta yɔ ɖɩ-hɔɔlʋʋ taa kpaagbaa. Tɛʋ fema lɛ, ɖiwolo Neyapoliisi. 12Đɩkʋyɩ Neyapoliisi lɛ, ɖiwolo Room ñɩma tɛtʋ taa Masedonii egeetiye taa, payaɣ-tʋ se Filiipu. Ńdʋ́ kakɩlɩnɩ wazaɣ. Tɩ-taa peeɖe ɖɩcaɣ kɩyakɩŋ cabɩ. 13Pɩtalɩ kɩyakʋ kɩhɛzʋʋ lɛ, ɖɩlɩɩnɩ tɩ-taa nɛ ɖiwolo pɔɔ nɔɔ ɖenɖe ɖɩmaɣzaɣ se Yuda ñɩma Ɛsɔ ɖɩsɛyɛ naɖɩyɛ wɛɛ yɔ. Đɩtalaa lɛ, ɖɩmaɣnɩ halaa kpeɣlaa, ɛlɛ́ ɖɩcaɣ pɔ-cɔlɔ nɛ ɖiheyiɣ-wɛ Ɛsɔtɔm. 14Halaa ḿbá, payaɣ pa-taa lɛlʋ se Liidii, ɛkɛ Tiyaatiiri tʋ nɛ ɛpɛdɩɣ pɩsaŋ kɩsɛmɩŋ. Ɛñaŋaɣ Ɛsɔ, Kɩpaɣlʋ kuli ɛ-lɩmaɣza yɔɔ se ɛnɩɩnɩ Pɔɔlɩ camɩyɛ. 15Peeɖe ɖɩlabɩ-ɩ lɩm sɔʋ sɔnzɩ nɛ pɩkpɛndɩnɩ ɛ-hɔʋ taa ñɩma tɩŋa. Pʋwayɩ lɛ, ɛ́yáa-ɖʋ nɛ eheyi-ɖʋ se: «Yee toovenim taa itisaa se mɛwɛnɩ lidaʋ Kɩpaɣlʋ Ɛsɔ yɔɔ yɔ, ɩkɔɔ ɩwɛɛ mɛn-tɛ.» Ɛlɛ́, ɛcɛyɩ-ɖʋ nɛ ɖitisi.

Paɖʋ Pɔɔlɩ nɛ Silaasɩ salaka Filiipu tɛtʋ taa

16Nakʋyʋ wiye ɖa nɛ Pɔɔlɩ ɖiwokaɣ Ɛsɔ ɖɩsɛyɛ taa lɛ, pɛlɛ nɔɔyʋ katɩ-ɖʋ, ɛkɛ tʋmlaɖʋ. Ekem eleeu nɔɔyʋ nɛ ɛcɔʋ ɛtɩyɩɣ nɛ eheyiɣ ɛyáa mbʋ́ pʋkɔŋ labʋ yɔ nɛ ɛkɔŋnɩ ɛ-caanaa liidiye sakɩyɛ. 17Pɛlɛ ɛnʋ, ɛna-ɖʋ ḿbʋ́ lɛ, ɛtɩŋɩɣ-ɖʋ nɛ ɛmakɩ kubusi se: «Ɛyáa panɛ pɛkɛ Ɛsɔ Caabiyuu tʋmlaɖaa, posusuu-mɩ ñʋʋ yabʋ tɔm.» 18Ɛmakaɣ kubusi ḿbʋ́ kɩyakɩŋ sakɩyɛ. Pʋkɔma pɩɖɛɛ Pɔɔlɩ lɛ, ɛpɩsɩnɩ pɛlɛ ɛnʋ ɛ-yɔɔ nɛ eholini eleeu weyi ɛwɛ ɛ-wayɩ yɔ se: «Yesu Krɩstʋ ɖoŋ taa lɛ, meheyiɣ-ŋ se ŋse pɛlɛ ɛnʋ ɛ-wayɩ!» Kpaagbaa ḿbʋ́ lɛ, eleeu ɛnʋ ese. 19Pɛlɛ ɛnʋ ɛ-caanaa nawa se ɛɛtasɩɣ-wɛ liidiye cazʋʋ lɛ, pakpa Pɔɔlɩ nɛ ɛ-taabalʋ Silaasɩ nɛ pɔhɔm-wɛ nɛ powoni ɛyáa samaɣ ɖikpeɣliye, tɛtʋ ñʋndɩnaa cɔlɔ. 20Patanɩ-wɛ Room ñʋndɩnaa cɔlɔ lɛ, peheyi-wɛ se: «Ɛyáa panɛ, pɛwɛɛ nɛ pɛwɛɛkɩɣ ɖɛ-tɛtʋ. Pɛkɛ Yuda ñɩma 21nɛ pawɩlɩɣ-ɖʋ sɔnzɩ nzɩ́ pɩtaha ɖa Room ñɩma nʋmɔʋ se ɖitisi yaa ɖɩla yɔ.» 22Peeɖe ɛyáa samaɣ kʋyɩ pɔ-yɔɔ ɖɔɖɔ nɛ ñʋndɩnaa ha nɔɔ se pacɩyɩ pɔ-yɔɔ wondu nɛ piyele polu-wɛ agbazɛɛ. 23Pɛtɛm-wɛ luu siŋŋ lɛ, powoni-wɛ paɖʋ salaka nɛ peheyi weyi ɛɖaŋɩɣ kɔ-nɔnɔɔ yɔ se ɛɖaŋ-wɛ camɩyɛ kpam. 24Pʋ-yɔɔ ɛ́lɛ́ kpaɣ-wɛ nɛ ɛsʋnɩ ɖooo pɩ-taa kuduyuu taa nɛ ɛka pa-naŋgbanzɩ ɖaŋ pɔŋ taa.

25Pɩkɛdɩ ɖoó hɛkʋ taa lɛ, Pɔɔlɩ nɛ Silaasɩ pɛsɛɣ Ɛsɔ nɛ pasaŋ-ɩ nɛ hendu nɛ salaka tɩnaa lɛlaa welesiɣ. 26Pɩkɛdaa lɛ, tɛtʋ tɩñamsɩ siŋŋ nɛ pɩkpɛndɩnɩ salaka kuduyuu nɛ kʋ-nɔnɔsɩ tɩŋa tɩtʋlɩ yem nɛ yoŋgbasɩ nzɩ́ paaɖɩ salaka tɩnaa tɩŋa yɔ sɩtɩcɛbʋ. 27Peeɖe kɔ-yɔɔ ɖaŋɩyʋ fema nɛ ɛnaɣ kɔ-nɔnɔsɩ tɩŋa tʋlɩ yem haaa. Pʋ-yɔɔ ɛlɩzɩ ɛ-sɩɣa se ɛtɛzɩɣ ɛ-tɩ kʋʋ nɛ ɛhɛzɩ. Mbʋ́ pʋyɔɔ yɔ, ɛmaɣzaɣ se paa pɩɩla ɛzɩma yɔ, salaka tɩnaa tɩŋa lɩwa pese. 28Ɛlɛ́, Pɔɔlɩ ma kubuka leɣ leɣ se: «Đatɩŋa ɖɩwɛɛ yooo, taakʋ ña-tɩ!» 29Peeɖe ɖaŋɩyʋ ɛnʋ ɛtɔm se pɔkɔnɩ-ɩ miŋ. Pɔkɔnɩ-ɩ lɛ, ɛtɩsʋʋ ɖooo pɩ-taa ɖenɖe ɛɖɩɣ Pɔɔlɩ nɛ Silaasɩ yɔ nɛ eluŋ pɛ-tɛɛ. Sɔɔndʋ kakpa-ɩ nɛ ɛ-nandʋ paɣ́. 30Ɛlɛ́, ɛlɩzɩ-wɛ nɛ awayɩ nɛ ɛpɔzɩ-wɛ se: «Caawaa! Ɛbɛ pʋwɛɛ se mala nɛ mehiɣ ñʋʋ yabʋ?» 31Paba cosi-i se: «Wɛnɩ lidaʋ Kɩpaɣlʋ Yesu yɔɔ nɛ ɛya ña-ñʋʋ nɛ pɩkpɛndɩnɩ ñɔ-hɔʋ taa ñɩma.» 32Peeɖe ɛkpaɣ-wɛ nɛ ɖoó ana nɛ ewoni ɛ-tɛ nɛ peheyi ɛ nɛ ɛ-hɔʋ taa ñɩma tɩŋa Kɩpaɣlʋ tɔm. 33Pɛtɛm-wɛ heyuu lɛ, ɛñalɩ pa-kɩcɩkpɩŋ taa. Pʋwayɩ lɛ, Pɔɔlɩ nɛ Silaasɩ pala ɛ nɛ ɛ-ñɩma ḿbá patɩŋa lɩm sɔʋ sɔnzɩ. 34Ɛlɛ́, ewoni-wɛ e-kuduyuu tɛɛ nɛ ɛha-wɛ tɔɔnaɣ nɛ pɔtɔɔ nɛ ɛ nɛ ɛ-hɔʋ taa ñɩma tɩŋa payɩ pa-taa hʋlʋmɩ pɩtɩɩfɛyɩ, mbʋ́ pʋyɔɔ yɔ, pɛwɛnɩ lidaʋ Ɛsɔ yɔɔ. 35Tɛʋ fema lɛ, Room ñʋndɩnaa tiyi karɩsɩ nasɩyɩ se siwolo siheyi salaka yɔɔ ɖaŋɩyʋ ɛnʋ se ɛlɩzɩ Pɔɔlɩ nɛ Silaasɩ salaka taa. 36Peeɖe ɛkʋyɩ hɛɛɛ nɛ ewolo eheyi Pɔɔlɩ se: «Ñʋndɩnaa tiyaa nɛ peheyi-m se malɩzɩ-mɩ salaka taa. Pʋ-yɔɔ lɛ, ɩlɩɩ ikpemni laŋhɛzɩyɛ.» 37Ɛlɛ́, pɩtamaɣ Pɔɔlɩ nɛ eheyi karɩsɩ ńzɩ́ se: «Mɩ-ñʋndɩnaa yeba nɛ pamabɩ-ɖʋ ɛyáa tɩŋa hɛkʋ taa nɛ patahʋʋ ɖɔ-tɔm natʋyʋ kaʋ nɛ powoni-ɖʋ paɖʋ salaka. Ŋgʋ́ ɖa ɖɔɖɔ ɖɩkɛ Room ñɩma#16.37 Room ñɩma: Room ñɩma paɣtʋ taa lɛ, pɩtaha nʋmɔʋ se poluu Room tʋ agbazɛɛ. Ɩcɔnɩ Tʋma 22.23-29.. Lɛɛlɛɛyɔ petiyiɣ mɛsaɣ tɛɛ se peyebi-ɖʋ yaa we? Pɩɩlakɩ ḿbʋ́ kpem! Iwolo iheyi-wɛ se pɔkɔɔ pa-maɣmaɣ nɛ palɩzɩ-ɖʋ.»

38Paba pɩsaa peheyi-wɛ se Pɔɔlɩ nɛ Silaasɩ pɛkɛ Room ñɩma ɖɔɖɔ lɛ, sɔɔndʋ kpa-wɛ. 39Peeɖe pakʋyɩ pa-maɣmaɣ nɛ powolo pɛhɛzɩ pa-laŋa nɛ palɩzɩ-wɛ salaka taa nɛ petendi-wɛ se pakʋyɩ tɛtʋ ńdʋ́ tɩ-taa. 40Pɔɔlɩ nɛ Silaasɩ palɩ salaka taa peeɖe lɛ, powolo Liidii tɛ. Peeɖe pana taabalaa nɛ peyele pɩla paba hʋnʋm. Pʋwayɩ lɛ, pɛɖɛɛ.

Currently Selected:

Tʋma Labʋ 16: KABI

Highlight

Copy