1 Kɔrɛntɩ 3
3
Krɩstʋ tɩnɩ ɛ-ñɩma
1Taabalaa, mantaapɩzɩɣ se mɔyɔɔdɩnɩ-mɩ ɛzɩ mbá Ɛsɔ ha-wɛ e-Fezuu Kiɖeɖeu yɔ. Ɛlɛ́, mɔyɔɔdɩnɩ-mɩ ɛzɩ mbá palakɩ ɛzɩ ɖooo paalakʋʋ yɔ yaa ɛzɩ mbá pɛkɛ piya pɩcɩɩcɩyɩmwaa Krɩstʋ nʋmɔʋ taa yɔ. 2Tɔm ndʋ́ mɛnkɛdɩ-mɩ yɔ, tɩwɛ ɛzɩ naalɩm maha-mɩ yɔ, tɩfɛyɩ ɛzɩ tɔɔnaɣ yuŋ ñɩŋga yɔ. Mbʋ́ pʋyɔɔ yɔ, ɩtaapɩzɩɣ se ɩtɔɔ-kɛ. Halɩ nɛ sɔnɔ ɩɩpɩzɩɣ ɩtɔɔ-kɛ ɖɔɖɔ. 3Mbʋ́ pʋyɔɔ yɔ, mi-wezuu caɣʋ taa lɛ, ɩlakɩ ɛzɩ ɩɩwɛʋ yɔ. Alɩwaatʋ ndʋ́ ɛsɩsɛmɩyɛ nɛ you pɛwɛ mɩ-hɛkʋ taa yɔ, ɩfɛyɩ ɛzɩ ɩɩwɛʋ yɔ yaa we? Yaa mi-wezuu caɣʋ ñɛfɛyɩ ɖɔɖɔ ɛzɩ ɛyáa lɛlaa yɔ? 4Alɩwaatʋ ndʋ́ mɩ-taa nɔɔyʋ yɔɔdʋʋ se ɛwɛ Pɔɔlɩ yɔɔ nɛ lɛlʋ se ɛ́lɛ́ ñɛwɛ Apoloosi yɔɔ yɔ, paalakɩ ɛzɩ kedeŋa ñɩma lakʋʋ yɔ yaa we?
5Yee ḿbʋ́ anɩ lɛ Apoloosi? Ma Pɔɔlɩ, ma lɛ anɩ? Đɩkɛ Ɛsɔ tʋmlaɖaa yem. Ɖɔ-yɔɔ pɩtɩŋnaa nɛ ɩwɛnɩ lidaʋ Krɩstʋ yɔɔ. Paa ɖa-taa weyi ɛlakɩ tʋmɩyɛ nɖɩ́ Kɩpaɣlʋ ɖʋ-ɩ yɔ. 6Pʋwɛ ɛzɩ mɔsɔnɩ tɩʋ nɛ Apoloosi mɩzɩ kʋ-yɔɔ lɩm yɔ. Ɛlɛ́, Ɛsɔ lakɩna nɛ kɩpaɣlɩɣ. 7Pɩtɛkɛ weyi ɛsɔʋ tɩʋ yaa weyi ɛmɩzɩɣ kʋ-yɔɔ lɩm yɔ, ɛkɩlɩnɩ wazaɣ. Ɛlɛ́, Ɛsɔ weyi ɛlakɩ nɛ kɩpaɣlɩɣ yɔ, e-ɖeke koŋ ɛkɩlɩnɩ wazaɣ. 8Weyi ɛsɔʋ tɩʋ yɔ nɛ weyi ɛmɩzɩɣ kʋ-yɔɔ lɩm yɔ, pɛwɛ kɩmaŋ. Paa pa-taa weyi lɛ, tʋmɩyɛ nɖɩ́ ɛlaba yɔ, ɖɩ-yɔɔ Ɛsɔ kɔŋ-ɩ hɛyʋʋ. 9Mbʋ́ pʋyɔɔ yɔ, ɖatɩŋa ɖɩkpɛndaa nɛ ɖɩlakɩ Ɛsɔ tʋmɩyɛ nɛ mɩ mɩwɛɛ ɛzɩ ɛ-hayɩm yɔ.
Ɩwɛ ɖɔɖɔ ɛzɩ ɛ-ɖɩɣa yɔ. 10Ma lɛ, Ɛsɔ labɩ-m lootiye nɛ mɛwɛɛ ɛzɩ kuduyiŋ mayʋ kɩbanʋ weyi ɛsɩ tigiɖe nɛ lɛlʋ tɩnɩɣ ɖɩ-yɔɔ yɔ. Ɛlɛ́, pʋwɛɛ se paa weyi ɛtɩlɩ ɛzɩma mbʋ́ ɛtɩnɩɣ ɖɩ-yɔɔ yɔ. 11Mbʋ́ pʋyɔɔ yɔ, nɔɔyʋ ɛɛpɩzɩɣ ɛtasɩ tigiɖe naɖɩyɛ sɩʋ nɛ pɩtasɩnɩ nɖɩ́ pɛtɛm sɩʋ yɔ. Ńɖɩ́ lɛ Yesu Krɩstʋ. 12Paa nɔɔyʋ ɛtɩnɩ ɖɩ-yɔɔ nɛ sika yaa ñɩɣlɩ́m yaa pɛɛ kɩñɩlɩzɛɛ yaa ɖasɩ yaa kesi yaa ñɩtʋ yɔ, 13pɔkɔŋ ɛ-tʋmɩyɛ naʋ. Mbʋ́ pʋyɔɔ yɔ, tɔm hʋʋ kɩyakʋ wiye lɛ, Ɛsɔ ɖʋʋ paa weyi ɛ-tʋmɩyɛ miŋ taa. Miŋ ɛnʋ ɛwɩlɩɣna se ɖɩwɛ ɖeu naa ɖɩfɛyɩ ɖeu nɛ pasɩm-ɖɩ. 14Weyi paɖʋʋ ɛ-tʋmɩyɛ miŋ taa nɛ ɖɩtañaɣ yɔ, pɔkɔŋ-ɩ hɛyʋʋ. 15Ɛlɛ́, yee paɖʋ nɔɔyʋ tʋmɩyɛ miŋ taa nɛ ɖɩñaɣ yɔ, pʋdʋ lesiɣ ɛ-kɩhɛyʋʋ. Ehikiɣ ñʋʋ yabʋ, ɛlɛ́, pʋwɛɣ ɛzɩ ɛyʋ seɣu ɛtɩŋɩɣnɩ miŋ taa nɛ ɛtʋlɩ yɔ.
16Ɩtatɩlɩ se ɩwɛ ɛzɩ Ɛsɔ ɖɩɣa ŋgá e-Fezuu Kiɖeɖeu wɛ ka-taa yɔ yaa we? 17Yee nɔɔyʋ ɛyɔkɩ-kɛ yɔ, Ɛsɔ tɔyɩtʋʋ-ɩ. Mbʋ́ pʋyɔɔ yɔ, kɛkɛ ɛ-maɣmaɣ ɛ-pʋyʋ. Mɩ lɛ ɖɩɣa ŋ́gá.
18Nɔɔyʋ ɛtaacɛtɩ ɛ-tɩ yem. Yee mɩ-taa nɔɔyʋ ɛmaɣzɩɣ se ɛwɛnɩ kedeŋa lɔŋsɩnɖɛ yɔ, pʋdʋ ɛpɩsɩ ɛzɩ kɩmɛlɛŋ yɔ. Peeɖe ɛkɛɣ lɔŋsɩnɖʋ toovenim taa. 19Mbʋ́ pʋyɔɔ yɔ, kedeŋa lɔŋsɩnɖɛ kɛ kɩmɛlɛndʋ Ɛsɔ ɛsɩndaa. Pʋwɛ ɛzɩ pamaʋ Ɛsɔtɔm Takayaɣ taa se: «Ɛsɔ kpaɣ lɔŋsɩnɖaa nɛ pa-maɣmaɣ pɛ-cɛtɩm» yɔ. 20Patasɩ maʋ ɖɔɖɔ se: «Kɩpaɣlʋ sɩm lɔŋsɩnɖaa lɩmaɣza. Ɛnawa se aawazɩɣ pʋyʋ.» 21Pʋ-yɔɔ lɛ, nɔɔyʋ ɛtaakʋndɩ se ɛkɛ lɛlʋ ñɩnʋ. Mbʋ́ pʋyɔɔ yɔ, paa weyi ɛkɛ mɩ-ñɩnʋ: 22paa ma Pɔɔlɩ yaa Apoloosi yaa Pɩyɛ. Paa kedeŋa yaa wezuu yaa sɩm yaa mbʋ́ pʋwɛ sɔnɔ yaa mbʋ́ pʋkɔŋ yɔ yɔ, pɩtɩŋa payɩ pɩkɛ mɩ-ñɩm ɖɔɖɔ. 23Ɛlɛ́, mɩ mɩkɛ Krɩstʋ ñɩma nɛ Krɩstʋ ñɛkɛ Ɛsɔ ñɩnʋ.
Currently Selected:
1 Kɔrɛntɩ 3: KABI
Highlight
Share
Copy
Want to have your highlights saved across all your devices? Sign up or sign in
