ǂKhoamîdi 17
17
1ǂKhîb ǃnâ ǀhuru pere-e ūhâs ge ǃgâi, kai ǁgan-i ǂkhabasib ǀkha ra ǃûhe-i xa.
2Gā-ai ǀgaub ai ra ûi ǃgā-i ge taotaosase ra ûi ǀgôa-i ǂamai gao, tsî ǁî-i ǃgâsa-i khami ǀumisa ǁî-i ǀkha nî ǀgoragu.
3Tsunitsunixūs ge ǀhaiǀurib ǃaroma hâ tsî ǁganomsa ǃhuniǀurib ǃaroma, ǁkhā ǀgaub aib ge ǃKhūba ǂgaoga ra ǃâitsâ.
4ǂKhabadī-ao-i ge ǂkhaba ǀapedi ǀguide ra ǃgâ tsî ǂhumi-ao-i ge ǂhumi ǃhoaxūn ǀguina ra ǃgâ.
5ǀGâsa khoe-e ra ǃhō khoen ge ǁî-i Kuru-aoba ra ǃhō; ǀnî khoe-i ǂōǂōsib ǃnâ ra ǃgâiaǂgao khoe-i ge nî ǁkharahe.
6ǁNuriǀgôan ge kaira khoena krons ase ība tsî ǁgûn ge ǁîn ǀgôan di ǂnīsasi.
7ǃGâi mîdi ge gâre khoe-i tawa anu tama hâ; ǂgaeǂgui-ao-i tawab ge ǂhumiba anu tama hâ.
8ǀHôagaosib ge ǀhôagao khoe-i tawa buruxa dī-i ase ī; dītsâ i ra xū-i hoa-i ǃnâ i ge ra ǃgâiǃgâxa.
9Nau khoe-e ra dīsade ǀûba khoe-i ge ǀnamma ra ôa, xawe ǂkhabab ǀguiba ra ôa khoe-i ge hâǁareba ra ǀgaruǀgaru.
10ǁNâuǃāxa khoe-i ge ǀgui ǃnās di ǃkhâikhomsa xu ra ǁkhāǁkhāsen, gâre khoe-i ǀguikaidisi ǃnādi ǂgōǀaus xas tsîna tsâǀkhāhe tama hîa.
11ǂKhabadī-ao-i ge khâikhâisens ǀguisa ra ôa, ǁnā-amagab ge tsūǀkhāba ǁîn ai nî sîǁnâhe.
12ǁÎs ôarona ǀhanahe hâ bērsa ǀhao-ūs ge ǃgâi, gâre khoe-i ǁî-i ǁnâuǃāba ǀhanahe hâ-e ǀhao-ūs xa.
13ǂKhabab ǀkha ǃgâiba ra matare-oa-i hoa-i omsa xub ge ǂkhababa bē tide.
14ǂKhababa tsoatsoas ge ǁgam-e ǁhōxūs khami ī; ǂkhababa tsoatsoab nîs aiǃâ ǁkhae.
15ǀHapixa khoe-e ga ǀhapio kai-i tsî ǂhanu-ai khoe-e ga ǀgoraǃgâ-i tsîn hoan ge ǃKhūba a ui-uisaba.
16Gâre khoe-i ǃaroma i ge a harebeoǃnâ mari-i ǀkha gā-aisiba hōbasensa, ǁnâuǃāb di ǃnubusiba i ūhâ hîa.
17Hoa ǁaen ge ǀhōsana ǀnamma ra ǁgau tsî sa ǃgâsan ge ǂhâb ǃnân nî hui ga ge ǃnae.
18ǁNâuǃāoǃnâ khoe-i ge supuse mā-e ra mîmâi, tsî ǁî-i ǀgūkhoe-e marisi ǁaposasiba ra mā.
19ǂKhababa ǀnam khoe-i ge ǁoreba ǀnam; ǀgapiǂâixasib ǀkha ra ǃhoa-i ge ǁî-i ǁnāsa ra ǃaroma.
20ǀHôagao khoe-i ge ǂkhî-e hō ǁoa, tsî ǂgaeǂhapuxa mîde ra ǃhoan ge tsūǀkhāb xa nî hāǂamhe.
21Gâre ǀgôaba ūhâs ge ǁgûb di tsûaǂgao, gâre khoe-i îb ge ǃgâiaǂgao-i xare-e ūhâ tama hâ.
22ǂKhî ǂgaob ge ǃgâi sōǀôa-i khami ī, xawe ǂkhîo gagas ge sorosa ra dītoa.
23ǂKhabadī-ao-i ge ǀhôagao hōǂgāsa ra ǃkhōǃoa, ǂhanu-aisiba mâǃoas ǃaroma.
24ǁNâuǃāxa khoe-i ge gā-aisiba ra ôa, xawe gâre khoe-i mûra ge ǃhūbaib ǀams kōse ra sī.
25Gâre ǀgôaba ūhâs ge ǁgûb di tsûaǂgao, tsî ǁîba ge ǁora ǁgûs di tsûb ase ī.
26ǂHanu-ai khoe-e ǁkharas ge a tsū tsî ǃgôasiba ūhâ khoe-e tsūdīs ge ǃgâi tama hâ.
27ǁÎ-i mîde ra ǃgôa khoe-i ge ǂansa ūhâ, ǃnomsase ra hâ khoe-i ge a ǁnâuǃāxa.
28ǃNōsa gâre khoe-i ǂû-i ge gā-aise ra ǃgapaǀîhe; amǁgaukha â-e-i ga ǂganam, o-i ge ǁnâuǃāxa-i ase ra ǃgôahe.
Currently Selected:
ǂKhoamîdi 17: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
