Santiago 4

Maꞌsharáchin yonquipisopita

1¿Onpoatomataꞌ ninoꞌhuitomaꞌ, yaniahuëramaꞌ? tënahuë, yonquiato. Canpitaora cancanëma quëran nisha nisha maꞌsha nohuantëramaꞌ niꞌton, co noyahuëꞌ cancantëramaꞌ. Nipaꞌyatacasoáchin yonquiramaꞌ. Napoaton ninoꞌhuiramaꞌ. 2Nani maꞌsha nohuantopiramahuëꞌ, co yaꞌhuëtërinquëmahuëꞌ niꞌton, yatëpatopiso pochin cancantëramaꞌ. Aꞌna piyapi maꞌshanënpitantaꞌ nohuantaparamaꞌ. Co yaꞌhuëtohuachinquëmarahuëꞌ, ninoꞌhuiramaꞌ, yaniahuëramaꞌ. Co Yosë nontëramahuëꞌ niꞌton, noya nininsopita co yaꞌhuëtërinquëmahuëꞌ. 3Aꞌnaquëmaꞌ Yosë nontohuatamara, maꞌsha nipiramahuëꞌ, co quëtërinquëmahuëꞌ. Canpitaora nipaꞌyatacamaso marëꞌ maꞌsha nohuantëramaꞌ niꞌton, co quëtërinquëmahuëꞌ. 4Canpitasoꞌ co huachi Yosëíchin yonquiramahuëꞌ. Yosë yonquipiramahuëꞌ, nani maꞌsha naꞌcon naꞌcon nohuantatomaꞌ, yamonshihuaninso pochin cancantëramaꞌ. Capa cancantacasoáchin paꞌyatëramaꞌ. Maꞌsharáchin yonquiatomaꞌ, Yosë inimiconën pochin cancantëramaꞌ. 5Yosë quiricanën quëran shaꞌhuitërinpoaꞌ. “Ispirito Santo ayaꞌcoancantërinpoaꞌ. Yaꞌcoancantohuachinpoaꞌ, apirarinpoaꞌ Yosëíchin paꞌyatacaso marëꞌ,” tënin. Co topinan quëran naporinhuëꞌ. 6Sacaiꞌ Yosëíchin yonquicaso nipirinhuëꞌ, inari chachin inaora nohuanton catahuarinpoaꞌ ina pochin cancantacasoꞌ. “Caora noya ninahuë,” topatëhuaꞌ, co Yosë noya niꞌsarinpoahuëꞌ. Nipirinhuëꞌ, “Co caora nanitërahuëꞌ noya nicaꞌhuasoꞌ. Catahuaco Sinioro,” topatëhuaꞌ, Yosë catahuarinpoaꞌ. Nosoroatonpoaꞌ, catahuarinpoaꞌ, tënin Yosë quiricanënquë.

7Napoaton Yosëíchin natëcoꞌ. Ama piꞌpian tërantaꞌ sopai nohuantocosohuëꞌ. Chiníquën cancantocoꞌ. Yosë nontatomaꞌ, sopai aꞌpacoꞌ paꞌin. Co ina natëhuatamahuëꞌ, patarinquëmaꞌ. 8Nani tahuëri Yosë yonquihuatamaꞌ, inantaꞌ yonquiarinquëmaꞌ, naꞌcon catahuarinquëmaꞌ. Yaꞌipi co noyahuëꞌ yonquiramasopita naniantatomaꞌ, noya nicoꞌ. Ama huachi nisha nisha yonquicosohuëꞌ. Noyápiachin cancantocoꞌ. 9Oshanëmaꞌ yonquiatomaꞌ, sëtocoꞌ. Ina yonquiatomaꞌ, ama huachi capa cancantamasoachin yonquicosohuëꞌ. Ama narinamasoachin yonquicosohuëꞌ. Yaꞌipi cancanëma quëran oshanëma marëꞌ sëtatomaꞌ, naꞌnëcoꞌ. 10Yaꞌipinquëmaꞌ, aꞌnaya aꞌnayanquëmaꞌ, Yosë chachin niꞌsárinquëmaꞌ. “Caora Sinioro co nanitërahuëꞌ noya nicaꞌhuasoꞌ. Catahuaco,” topatamaꞌ, anoyacancantarinquëmaꞌ. Ina pochin cancantohuatëhuaꞌ, noya noya acoarinpoaꞌ.

Pinotonaꞌpiroꞌsaꞌ anaꞌintacasoꞌ yaꞌhuërinsoꞌ

11Ama iyaroꞌsaꞌ nipinocosohuëꞌ. Ama coisë pochin cancantatomaꞌ, aꞌnapita noꞌhuicosohuëꞌ. Piꞌpisha tërantaꞌ nanan yaꞌhuëhuachin, ama apancatahuatomaꞌ, nishaꞌhuirapicosohuëꞌ. Quisocristo imaramaꞌ niꞌton, iyaparin pochachin ninosorocasoꞌ yaꞌhuërin. Pinopatamaꞌ, co nosoroaramahuëꞌ. Yosë pënënpirinpoahuëꞌ. “Yaꞌipi piyapiꞌsaꞌ nosorocoꞌ,” itopirinpoahuëꞌ, “Co nosorocasoꞌ yaꞌhuërinhuëꞌ,” taꞌtomaꞌ, pinoramaꞌ. Canpitaora yonquinëma quëran pinotatomaꞌ, co Yosë natëramahuëꞌ. 12Yosëíchin coisë pochin nicaton, noꞌtëquën shaꞌhuitarinpoaꞌ. Inasáchin anaꞌintarinpoaꞌ. Noya cancantohuatëhuaꞌ, nichaꞌësarinpoaꞌ. Coꞌsoꞌ natëhuatëhuahuëꞌ, parisitopiquë aꞌpararinpoaꞌ. Canpoa capiniso nipirinhuëꞌ, co nishaꞌhuirapicaso yaꞌhuërinhuëꞌ.

Aꞌnanaya chiminacasoꞌ yaꞌhuërinsoꞌ

13Natanco iyaroꞌsaꞌ. Aꞌnaquëmaꞌ co Yosë yonquiatomahuëꞌ, nisha nisha yonquiconamaꞌ. “Iporahuë nipon, tashirayahuë nipon, sacatapoi aꞌna ninanoquë paꞌsarai. Inaquë aꞌna piꞌipi pochin sacatohuatoi, naꞌcon canaarai,” topiramahuëꞌ. 14Co tashiraya tërantaꞌ nanitaramahuëꞌ ninocamasoꞌ. Maꞌsona onpocamasoꞌ co nitotëramahuëꞌ. Co canpitaora nohuanton nanpiramahuëꞌ. Chitoroꞌ aꞌnaroáchin sacorinso pochachin aꞌnanaya aꞌnaquën chiminin. 15“Yosë nohuantohuachin nanpihuatoi, maꞌsha nisarai,” taꞌcaso nipirinhuëꞌ. 16“Quiyaora nohuanton, nani maꞌsha nisarai,” toconamaꞌ. Co Yosë yonquihuatamahuëꞌ, co noyahuëꞌ cancantaramaꞌ. 17Yosë yonquicamasoꞌ nitotapomarahuëꞌ, co yonquihuatamahuëꞌ, oshahuanaramaꞌ. Maꞌsona tërantaꞌ noya nicacasoꞌ nitotapomarahuëꞌ, co ina nipatamahuëꞌ, ina marëntaꞌ oshahuanaramaꞌ.

Currently Selected:

Santiago 4: cbt

Highlight

Copy