Génesis 24

Isaco marëꞌ sanapi yonípisoꞌ

1Apraan nani noyá mashotërin huachi. Nani maꞌsha nininquë Siniorori catahuamiatërin. 2-3Aꞌna tahuëri, piyapinën masho masho nininsoꞌ, përarin. Inari yaꞌipi maꞌshanënpita aꞌpairin. Huëꞌpachina itapon:

—Natëancoso nitotaꞌhuaso marëꞌ, tonaroana sëꞌhuatoco. Sëꞌhuatatonco: “Sinioroso Yosë niꞌton, inápaquë huaꞌanëntaton, isoroꞌpanta huaꞌanëntërin. Ina niꞌsárinco niꞌton, noꞌtëquën natëaranquën. Co isoporinquë Canaan sanapi nininsoꞌ, Isaco macacaso yaꞌhuërinhuëꞌ,” itoco. 4Quëma chachin huaꞌhuatërahuëso noꞌpaquë paquëꞌ. Inaquë paꞌsahuaton, quëmopinëhuëpita quëran sanapi yonítëquëꞌ, itërin.

5Napotohuachina, piyapinëniso itapon:

—Napopiranhuëꞌ, sanapi yonirahuëso co yaimaquintahuachincohuëꞌ: ¿Onpochita? ¿Huaꞌhuatëranso parti huiꞌnan quëpamantaꞌi ti? itërin. 6Napotohuachina, Apraani itapon:

—¡Ama napoquësohuëꞌ! ¡Co inaquë quëpamantacaso yaꞌhuërinhuëꞌ! 7Siniorosoꞌ Yosë niꞌton, inápaquë huaꞌanëntërin. Nani ina shaꞌhuitërinco iso noꞌpaꞌ shihuëpitari huaꞌnëntacasoꞌ. Iráca tatahuë yaꞌhuërin noꞌpa quëran ocoirinco. Quëmopinëhuëpita yaꞌhuërin parti quëran ocoirinco huachi. Ocoirahuatonco isëquë quëninco. Inari chachin anquëninën aꞌpararin catahuainquënso marëꞌ. Ina nohuanton, sanapi nohuantarin isëquë huëcacasoꞌ. 8Sanapi isëquë huëcacaso co nohuantohuachinhuëꞌ, naporo huarëꞌ Yoscoarëꞌ tënanso co naꞌintarinquënhuëꞌ. Nipirinhuëꞌ ama onporonta inatohua huiꞌnahuë quëpaquësohuëꞌ, itërin.

9Napotohuachina, piyapinëni Apraan tonaroananën sëꞌhuatërin. Sëꞌhuatahuaton: “Yoscoarëꞌ, shaꞌhuitërancoso chachin, nisarahuë,” itërin. 10Itahuaton, tapatarin huachi. Huaꞌanën maꞌshanënpita, paꞌton paꞌton nininsopita, huayonahuaton, nicanatacaso marëꞌ tapararin. Shonca camiyoquë apëꞌpëtahuatonaꞌ, Nacoro ninano itopiquë, paꞌpi huachi. Inaso ninanoꞌ, Misopotamia parti yaꞌhuërin.

11Paꞌsápatonaꞌ, canconpi huachi. Ninano aipiran, yatashirahuaso canconpi. Naporo oraquë nanoꞌsa iꞌsha macapona posoquë huëꞌsapi. Apraan piyapinënsoꞌ camiyoroꞌsa aꞌna poso pirayan achinotarin. 12Naporahuaton inaquë chachin Yosë nontërin: “Niꞌquë Sinioro, quëmaso Yosënquën. Huaꞌanëhuë Apraan, natërinquën. Huaꞌanëhuë nosoroaton catahuaco. 13Nanoꞌsa iꞌsha macapona huëcasoiꞌ, iso poso pirayan ninatapo. 14Insoso nanon: ‘Yonshanën chinohuaraquëꞌ, canta piꞌpiyan iꞌsha oꞌopainquën,’ itohuato: ‘Oꞌoquë api, camiyonënpitanta machi oꞌoinaꞌ,’ ichinco. Ina quëran piyapinën Isaco marëꞌ sanapi huayonansoꞌ, nohuitarahuë. Ina pochin nitohuachinco: Tëhuënchachin huaꞌanëhuë Yosëri nosoroaton catahuarin, tosarahuë,” itërin.

15Orarinsoꞌ co tiquiyátërasohuëꞌ, aꞌnara nanon yonsha pitënahuaton, huëꞌsarin niꞌnin. Inaso nanon, Pitoiro huiꞌnin. Nipica itopi. (Pitoirosoꞌ, shaꞌhuirahuëso chachin Nacoro huiꞌnin. Miricaquë huiꞌnahuaninsoꞌ. Nacoronta Apraan iyaꞌhuain.) 16Nipicasoꞌ, noyápiroyanchin. Naporahuaton nanon, co quëmapiri sëꞌhuayátërarinhuëꞌ. Canquirahuaton posoquë nohuaramarin. Yonshanën amëntaitërinso pitënahuaton, panantapirinhuëꞌ, 17Apraan piyapinëni taꞌarahuaton, icantonin. Icantahuaton, itapon:

—Canta apiaꞌhua, yonshanën quëran piꞌpian iꞌsha oꞌopainquën topirahuë, itërin.

18—Oꞌoquë api, itërin Nipicari. Napotahuaton, yonshanën chinohuararin. Inapoaton oꞌshitacaso marëꞌ sëꞌquëtërin. 19Nani oꞌopachina, Nipicari itapon:

—Iꞌsha maantarahuato, camiyonënpitanta oꞌopiquë taꞌpanchi nohuantopisoꞌ oꞌoinaꞌ, itërin. 20Itahuaton, aꞌnaromarëáchin pëꞌtahuaroꞌsa oꞌopiquë, taꞌpanarin. Yaꞌipi camiyoroꞌsaꞌ, oꞌocai huarëꞌ inaporin. 21Inapoasoꞌ, Apraan piyapinënsoꞌ co manta taponahuëꞌ, topinan niꞌsárin: “Tëhuënchachin Sinioro catahuarinco niꞌton, ¿co topinan iratomaracohuë ti?” tënin yonquiaton. 22Camiyoroꞌsa nani oꞌopachinara, Apraan piyapinënsoꞌ, oro quëran poꞌmoitëra pochin nipisoꞌ manin. Saota cramo pochin quëꞌninsoꞌ. Ina masahuaton, Nipica nitëananënquë aꞌtëntërin. Naporahuaton cato aꞌsontanpa oro quëran nipisoꞌ, quëtërin. Aꞌnaya aꞌnaya pasa naꞌcon cramo quëꞌninsoꞌ, quëtërin. 23-25Inapita quëtahuaton, natanin:

—¿Maꞌninta quëmasoꞌ tata?

—Caso tatahuë Pitoiro. Aꞌshinsoꞌ, Mirica itopi. Tata paꞌpinsoꞌ Nacoro itopi.

—¿Yaꞌhuërin canpita pëinëmaquë chinotaꞌhuaiso to?

—Yaꞌhuërin mini. Camiyoroꞌsanta capacaiso yaꞌhuërin, itërin Nipicari.

26-27Ina natanaton, Apraan piyapinënso isonin. Isonin quëran Yosë chinotaton itapon: “¡Ma noyacha Sinioroso paya! Inaso Yosë, huaꞌanëhuë Apraan natërinsoꞌ. Tëhuënchachin huaꞌanëhuë nosoroaton, noya catahuaantarin. ¡Quëmopinënpita pëinënquë huarëꞌ noꞌtëquën quëninco!” tënin.

28Nipicasoꞌ taꞌarëꞌnachin aꞌshin pëinënquë paꞌnin. Inaquë yaꞌipi naporinso shaꞌhuiontarin. 29-30Nipicasoꞌ aꞌna yoꞌin mashonën yaꞌhuëtërin. Inasoꞌ, Napano itopi. Poꞌmoitëra pochin nininsoꞌ oshin quëtopisoꞌ nicaparin. Aꞌsontanparinsopitantaꞌ, nicaparin. Shaꞌhuirinsonta natanahuaton, Apraan piyapinën yonicaso marëꞌ posoquë taꞌamarin. Ina pirayan, camiyonënpitarë chachin huaniárin quënamarin. 31Inaquë nontaton itapon:

—Huëquë api. Quëmasoꞌ Sinioro noya catahuarinquën. ¡Co aipiran quëparitamaso yaꞌhuërinhuëꞌ! Nani pëi taparahuë canpita marëꞌ. Camiyoroꞌsanta huëꞌëcaisoꞌ, nani taparahuë, itërin.

32Napotohuachina, pëiquë pantapi huachi. Inaquë Napanori pëꞌpëtoroꞌsa chinohuararahuaton, camiyoroꞌsa aꞌcarin. Apraan piyapinën, caꞌtaninsopitarë chachin nipaꞌmorantëcaiso marëntaꞌ, iꞌsha quëshirin. 33Cosharo acotohuachinara, Apraan piyapinënsoꞌ tapon:

—Coꞌhuara coshachátërapohuëꞌ, maꞌmarësona huëꞌnahuësoꞌton, shaꞌhuitaꞌhuanquëmaso yaꞌhuërin, tënin.

—Inaꞌton nipachin shaꞌhuitocoi, itërin Napanori.

34—Caso Apraan piyapinënco. 35Siniorori huaꞌanëhuë catahuamiatërin niꞌton, paꞌpi notohuaroꞌ maꞌsha yaꞌhuëtërin: Ohuacaroꞌsaꞌ, ohuicaroꞌsaꞌ, inapita notohuaroꞌ pëꞌtahuarin. Naporahuaton oro, prata inapita yaꞌhuëtërin. Piyapinënpitanta quëmapiꞌsaꞌ, sanapiꞌsaꞌ, inapita yaꞌhuëtërin. Camiyoroꞌsaꞌ, moraroꞌsaꞌ, inapitanta naꞌa pëꞌtahuarin. 36Naporahuaton saꞌin Sara itopisontaꞌ, aꞌnaíchin huaꞌhuanin. Paiya nicaponahuëꞌ, quëmapi huaꞌhuanin. Inari iporasoꞌ, yaꞌipi huaꞌanëhuë maꞌshanënpita, huaꞌanëntapon huachi. 37Huaꞌanëhuë camairincosoꞌ, natëcaꞌhuaso marëꞌ nani Yoscoarëꞌ taꞌto shaꞌhuitërahuë. Naporoꞌ napotërinco: “Co isoporinquë Canaan sanapi nininsoꞌ, Isaco macacaso yaꞌhuërinhuëꞌ. 38Tatahuëi quëran quëmopi ninaisopita yaꞌhuëpiso parti tëhuënchinsoꞌ paquëꞌ. Inaquë paꞌsahuaton, huëntonëhuë quëran chachin sanapi huiꞌnahuë marëꞌ matomaquëꞌ,” itërinco. 39Napotohuachincora, cari itërahuë: “Quëmasoꞌ huaꞌanëhuënquën nipiranhuëꞌ nonchinquën: Paꞌpato, coꞌsoꞌ sanapi yaimaquintahuachincohuëꞌ ¿Maꞌta onpoꞌi?” itërahuë. 40Napotohuatora, shaꞌhuitërinco: “Niꞌquëꞌ, caso Sinioro iranën noꞌtëquën paꞌtërahuë niꞌton, anquëninën aꞌpararin catahuainquënso marëꞌ. Ina nohuanton, noya paꞌsahuaton sanapi quënamaran. Tatahuëi quëran quëmopinëhuë huiꞌnin chachin, huiꞌnahuë marëꞌ matomaran. 41Quëmopinëhuë co huiꞌnin yaaꞌpantihuachinquënhuëꞌ, naporo huarëáchin Yoscoarëꞌ tënansoꞌ, co naꞌintarinquënhuëꞌ,” itërinco.

42Napoaton huëꞌsápatoi, ipora tahuëri posoquë canquirai. Inaquë Yosë nontato napotërahuë: “Sinioro quëmaso Yosënquën. Huaꞌanëhuë Apraan chinotërinquën. Niꞌquë Sinioro. Tëhuënchachin quëma catahuararanco noya huëꞌnahuë nipachinsoꞌ, 43-44iso poso pirayan nontaranquënsoꞌ natanco. Apira shaꞌhuitohuatënquën inachachin niin tënahuë. Inso nanonsona, iꞌsha macapon oꞌmarinsoꞌ, cari natanpato: ‘Canta piꞌpiyan yonshanën quëran iꞌsha oꞌopainquën,’ ichi. Napotohuato: ‘Oꞌoquë api. Camiyonënpitanta machi oꞌoinaꞌ,’ ichinco. Ina quëran huaꞌanëhuë huiꞌnin marëꞌ sanapi huayonansoꞌ, nohuitarahuë,” itërahuë. 45Orarahuësoꞌ, co tiquiyátërasocohuëꞌ, Nipica oꞌmarin niꞌnahuë. Iꞌsha macacaso marëꞌ yonshanën pitënahuaton, posoquë oꞌmarin. Paaparahuato: “Canta api iꞌsha quëtoco topirahuë,” itërahuë. 46Napotohuatora, yonshanën aꞌnaroáchin chinohuararahuaton, itaponco: “Oꞌoquë api, camiyonënpitanta machi oꞌoinaꞌ,” itahuatonco, oꞌshitërinco. Camiyoroꞌsantaꞌ, oꞌshitërin. 47Ina quëran cari natanahuë: “¿Maꞌninta quëmasoꞌ tata?” itërahuë.

“Caso tatahuë, Pitoiro. Inasoꞌ, Nacoro huiꞌnin. Miricaquëya huiꞌnahuaninsoꞌ,” itërinco. Itohuachincora, aꞌnara poꞌmoitëra pochin nininsoꞌ nitëananënquë aꞌtëntërahuë. Naporahuaton cato aꞌsontanpacaso quëtërahuë. 48Ina quëran isonahuato, Sinioro chinotërahuë: “¡Ma noyanquëncha quëmasoꞌ Sinioro paya! Quëmaso Yosënquën, huaꞌanëhuë Apraan natërinquën. Noya quënanco niꞌton, noꞌtëquën canquirahuë. Huaꞌanëhuë huiꞌnin acoantacaso marëꞌ quëmopinën huiꞌnin chachin quëpatarahuë,” itërahuë, Sinioro chinotato. 49Iporaso huachi, shaꞌhuitoco nitochi. ¿Tëhuënchachin huaꞌanëhuë nosoroapoma ti? Coꞌsoꞌ nohuantohuatamahuëꞌ, shaꞌhuitoco inanta nitochi. Nani nitotohuato maꞌsona nicaꞌhuasoꞌ yonquiarahuë huachi, itërin.

50Napotohuachina, Napano, Pitoiro, inapitari itopi:

—Yaꞌipi naporansopita Sinioro nohuanton naporin tënai. Napoaton, soꞌyachin nipachin. 51Maꞌtana Nipica yaꞌhuëarin. Siniorori ina pochin nohuantërin niꞌquëhuarëꞌ, quëpaquëꞌ. Huaꞌanën huiꞌnin soꞌyachin, itopi.

52Napopiso natanahuaton, Apraan piyapinënso isonin. Isonahuaton, noꞌpaquë huarëꞌ monshomarin: “Yosparinquën Sinioro,” itërin. 53Ina quëran notohuaroꞌ maꞌsha quëninsopita oꞌquirin. Oro quëran, prata quëran, ina quëranpita nipisoꞌ, Nipica nicanarin. Aꞌmocasontaꞌ, paꞌton nininsopita quëtërin. Aꞌshin, yoꞌin, inapitanta notohuaroꞌ maꞌsha paꞌton nininsopita quëtërin. 54Naporo huarëꞌ Apraan piyapinën, caꞌtaninsopitarë chachin, coshatopi, oꞌopi, napopi. Naporahuatona naporo tashi inaquë chinotopi huachi.

Tahuëririnquë capayatahuaton, Apraan piyapinënso Nipica paꞌpin, yoꞌin inapita itapon:

—Ipora tahuëri huaꞌanëhuë yaꞌhuërinquë yapaantarahuë taꞌa, tënin. 55Napopirinhuëꞌ, Nipica yoꞌinso aꞌshinë chachin, itaponaꞌ:

—Shonca tahuëri tëranta nanon quëparichin. Ina piquëran noya imasarinquën huachi topiraihuëꞌ, itopi. 56Itopirinahuëꞌ, Apraan piyapinënso napoantarin:

—Ama aquëtë huarëꞌ ahuaꞌquicosohuëꞌ. Yosë nohuanton, noya huëcato, co topinan iratërahuëꞌ. Napoaton huaꞌanëhuë yaꞌhuërinquë panantaꞌhuaso yaꞌhuërin tënahuë, itërin. 57Napohuachina, itaantapi:

—Paꞌahua nipachin nanon përahuaꞌ. ¿Maꞌtama ichinpoa paꞌ? topi. 58Nipica përasahuatonaꞌ, natanpi:

—¿Ipora tahuëri chachin nohuantëran iso quëmapi imacaso to? itopi.

—Nohuantërahuë mini, tënin.

59Napohuachina, Nipica pacacaso nohuantopi huachi. Ina asoꞌsorinso sanapintaꞌ, aꞌpantopi. Naporahuaton aꞌnapitanta piyapinënpita, sanapiꞌsa nininsoꞌ aꞌpantopi. Apraan piyapinën, caꞌtaninsopita, inapitanta noya aꞌpapi huachi. 60Nani yapaꞌpachina, yoꞌini nóya yonquirapiton iso pochin shaꞌhuitërin:

“Oshira, Yosë catahuainquën.

Paꞌpi nohuantërai, noya huaꞌhuanaton,

notohuaroꞌ amiparinpita yaꞌhuëtiinquënsoꞌ.

Naporahuaton amiparinpitantaꞌ,

Yosëri catahuain inimiconënapita minsëraꞌpiainaꞌ,” itërin.

61Nani nontohuachinara, Nipicaso piyapinënpitarë chachin, camiyoroꞌsaquë yaꞌmitëahuatonaꞌ, Apraan piyapinën imapi. Ina pochin Apraan piyapinën, Nipica matomarahuaton, huënantarin huachi.

62-63Naporoꞌ Isacosoꞌ, Niquipi parti yaꞌhuëarin. “Nanpiton niꞌsárincosoꞌ poso,” itopiquë Yosë yonquiapon paꞌnin quëran, huënantárin. Nani yatashirapasoꞌ, aꞌnanaya niꞌpirinhuëꞌ, niꞌtoroꞌsa camiyonënapitarë chachin canquirapi niꞌnin. 64Nipicantaꞌ, Isaco niꞌsahuaton, camiyonën quëran nohuararin. 65Nohuararahuaton Apraan piyapinën natanin:

—¿Inta pasosoꞌ quëmapi canpoataquëchin huëꞌsarin? itërin.

—Ina mini Isaco. Huaꞌanëhuë Apraan huiꞌnin, itërin. Ina natanahuaton, Nipicaso niimomototërinsoꞌ nëꞌmëtëquë, nipaꞌshinayatërin. 66Canconpachinara, piyapinëni yaꞌipi naporinso Isaco shaꞌhuitërin. 67Ina quëran Isacosoꞌ, aꞌshinco nëꞌmëtë pëinënquë Nipica quëparin. Co huaꞌquiya quëranhuëꞌ macaton, noya cancantërin. Paꞌpi nosoromiatërin. Aꞌshin marëꞌ sëtápirinhuëꞌ, inapoaton noya cancantërin huachi.

Currently Selected:

Génesis 24: cbt

Highlight

Copy