1 Tesalonicenses 5
5
1Onporosona oꞌmantacasoꞌ tahuëri nanicasoꞌ, co ina iyaroꞌsaꞌ aꞌchintaranquëmahuëꞌ. 2Iráca shaꞌhuitërinpoasoꞌ nani nitotëramaꞌ. Co nitotasoihuëꞌ, oꞌmantararin. Niꞌcoꞌ iyaroꞌsaꞌ. Yono tashiꞌ co nitotasëhuahuëꞌ, ihuatonaꞌpi pëinënpoaquë yaꞌconin. Inapochachin aꞌnanaya Quisocristo oꞌmantararin. 3Co imapisopitasohuëꞌ oꞌmantacasoꞌ tahuëri co yonquipihuëꞌ. “Noya yaꞌhuarëhuaꞌ, co mantaꞌ onpoarihuahuëꞌ,” topirinahuëꞌ. Aꞌnanaya chiníquën anaꞌintacasoꞌ naniarin, co chaꞌësapihuëꞌ. Sanapi yahuaihuachina, onporosona iquitacasoꞌ co nitotërinhuëꞌ. Aꞌnanaya iquitërin. Inapochachin aꞌnanaya Yosëri anaꞌintarin. 4Canpitaso nipirinhuëꞌ, co tashi pochin cancantëramahuëꞌ. Oꞌmantacasoꞌ tahuëri nanihuachin, co paꞌyanaramahuëꞌ. Ihuatonaꞌpi aꞌnanaya huëꞌpachina, apaꞌyaninpoꞌ. Inapochachin Quisocristosoꞌ aꞌnanaya oꞌmahuachin, naꞌa piyapiꞌsaꞌ paꞌyanaponaꞌ. Canpitaso nipirinhuëꞌ ina tahuëri ninaaramaꞌ. Nanihuachin, co paꞌyanaramahuëꞌ. 5Quisocristo imaramaꞌ niꞌton, tahuëri pochin cancantatomaꞌ, nitotaramaꞌ. Yaꞌipinpoaꞌ imarëhuasopita co tashi pochin cancantërëhuahuëꞌ. 6Napoaton oꞌmantacasoꞌ tahuëri yonquiatëhuaꞌ, noya ninahuaꞌ. Aꞌnaquënsoꞌ huëꞌërëso pochin cancantatonaꞌ, co ina tahuëri yonquipihuëꞌ. Canpoaso nipirinhuëꞌ noꞌtëquën yonquiatëhuaꞌ, sano cancantahuaꞌ. 7Yahuëꞌëpachinara, tashiꞌ huëꞌëpi. Yanoꞌpihuachinarantaꞌ, tashiꞌ noꞌpipi. 8Canpoaso nipirinhuëꞌ tahuëri pochin cancantacasoꞌ yaꞌhuërin. Napoaton noya yonquiatëhuaꞌ, Yosë imamiatahuaꞌ. Niꞌcoꞌ iyaroꞌsaꞌ. Inimicoroꞌsaꞌ huëꞌpachinara, sontaroꞌsaꞌ co topinan paꞌpihuëꞌ. Coton huaꞌna quëran nininsoꞌ aꞌmopi. Cascontaꞌ huaꞌna quëran nininsoꞌ yancopi ama inimicori ohuanacaso marëhuëꞌ. Noya nitapahuachinara, co inimicori minsërinhuëꞌ. Huaꞌna aꞌmopiso pochin canpoantaꞌ Yosë natëahuaꞌ catahuainpoaꞌ. Ina natëtëhuaꞌ, noya ninosoroaꞌahuaꞌ. “Yosë aꞌpaiarinpoaꞌ. Oꞌmahuachin, noyá nichaꞌësarinpoaꞌ,” taꞌtëhuaꞌ noya ninahuaꞌ. 9Co anaꞌintinpoaso marëꞌ Yosë acorinpoahuëꞌ. Sinioro Quisocristo imarëhuaꞌ niꞌton, nichaꞌësarinpoaꞌ. Ina nohuanton chaꞌësarëhuaꞌ. 10Canpoa marëꞌ inasoꞌ chiminin. Aꞌnaquënpoaꞌ nanpiarëhuaꞌ, aꞌnaquënpoaꞌ chiminarihuarahuëꞌ, oꞌmantahuachin, yaꞌipi imarëhuasopita quëpantarinpoaꞌ. Inarëꞌquënpoaꞌ yaꞌhuëmiatarihuaꞌ. 11Napoaton nani tahuëri nicatahuacoꞌ chiníquën cancantacamaso marëꞌ. Oꞌmantacasoꞌ tahuëri yonquiatomaꞌ, naꞌcon ninontocoꞌ noya noya imacamaso marëꞌ. Nani noya nicatahuaramaꞌ. Aquëtë chachin niachinicancancoꞌ.
Piquëran huarëꞌ pënëninsoꞌ
12Ansianoꞌsaꞌ iyaroꞌsaꞌ noya niꞌcoꞌ, tënahuë. Sinioro nohuanton, ansiano yaꞌconpi pënënainquëmaso marëꞌ. Co chirotonahuëꞌ, aꞌchintarinënquëmaꞌ. Pëshonpatamaꞌ, otërarinënquëmaꞌ niꞌton, noya niꞌcoꞌ. 13Naꞌcon catahuarinënquëmaꞌ noya noya Yosë imacamaso marëꞌ. Napoaton nosoroatomaꞌ, noya yonquirapicoꞌ. Yaꞌipinquëmaꞌ noya niniꞌtomaꞌ, yaꞌhuëcoꞌ.
14Canpita capini iyaroꞌsaꞌ nipënëncoꞌ. Aꞌnaquën co yasacatopihuëꞌ. Inapita pënëncoꞌ ama chiroinasohuëꞌ. Aꞌnaquën maꞌsha onpohuachinara, Yosë yananiantopi. Inapitantaꞌ noya nontocoꞌ chiníquën cancanchinaꞌ. Aꞌnaquëontaꞌ cancanëna quëran co chinipihuëꞌ. Catahuacoꞌ ama Yosë nanianchinasohuëꞌ. Inapohuatamaꞌ, ama insontaꞌ noꞌhuicosohuëꞌ. Sanoanan quëran pënëncoꞌ.
15Aꞌnapita maꞌsha onpotohuachinënquëmaꞌ, ama yaiꞌhuërëtocosohuëꞌ. Nani tahuëri noya nontocoꞌ. Noꞌhuipirinënquëmaontaꞌ, nosoroatomaꞌ, catahuacoꞌ. Canpita capini ninosoroatomaꞌ, aꞌnapita piyapiꞌsantaꞌ catahuacoꞌ.
16Ama sëtocosohuëꞌ. Yosë yonquiatomaꞌ, nani tahuëri noya cancantocoꞌ. 17Apira apira Yosë nontocoꞌ. Ama aꞌna tahuëri tërantaꞌ pahuancosohuëꞌ. 18Maꞌsha onpotopirinënquëmahuëꞌ, ama sëtocosohuëꞌ. Nani tahuëri “Yosparinquën Sinioro,” itocoꞌ. Maꞌsha onpoapomarahuëntaꞌ, noya cancantocoꞌ. “Inantaꞌ Sinioro noya,” itocoꞌ. Quisocristo imarëhuaꞌ niꞌton, ina pochin cancantacasoꞌ Yosë nohuantërin.
19Ispirito Santo yaꞌcoancantërinquëmaꞌ. Cancanëmaquë nontohuachinquëmaꞌ, aꞌnaroáchin natëcoꞌ. Niꞌcoꞌ. Pën noya orotohuachina, noya napëntërëꞌ. Inapochachin Ispirito Santo yacatahuarinpoaꞌ noya cancantacaso marëꞌ. Ama pën atacopitërëso pochin nitocosohuëꞌ. 20“Yosë anitotërincoso shaꞌhuichinquëma,” itohuachinënquëmaꞌ, noya natancoꞌ. 21Napoaponahuëꞌ, niꞌcona nonpintochinënquëmaꞌ. Aꞌnaquën “Noꞌtëquën aꞌchintaranquëmaꞌ,” itohuachinënquëmaꞌ, ama aꞌnaroáchin natëtocosohuëꞌ. Yaꞌipi napopisoꞌ Yosë quiricanën quëran tantiacoꞌ. “Inaora yonquinën quëran aꞌchinamara,” taꞌtomaꞌ, tantiacoꞌ. Yosë nanamënsáchin natëcasoꞌ yaꞌhuërin. 22Yaꞌipi aoshahuaninquëmasopita aꞌpocoꞌ.
23Yosëíchin asanocancaninpoaꞌ. Canpita marëꞌ ina nontarahuë noyásha anoyacancanchinquëmaꞌ. “Catahuaquëꞌ Sinioro, yaꞌipi cancanëna quëran noyápiachin yonquiꞌinaꞌ. Naporahuaton, yaꞌipi yonquinëna quëran noya nininsopitaráchin nohuanchinaꞌ. Quëma nohuanton, yaꞌipi nonëna quëran huarë noyasáchin niinaꞌ,” itërahuë. Ina quëran Sinioro Quisocristo oꞌmantahuachin, nóya niꞌsarinquëmaꞌ. 24Yosë nani nontërinpoaꞌ imacaso marëꞌ. Huëntonënquë chachin ayaꞌconinpoaꞌ. Noꞌtëquën shaꞌhuitërinpoaꞌ. Co onporontaꞌ nonpintarinpoahuëꞌ niꞌton, noya catahuarinpoaꞌ.
25Quiya marëntaꞌ iyaroꞌsaꞌ Yosë nontocoꞌ.
26Imaramasopita capini noya ninosoroatomaꞌ, nisëꞌquëcoꞌ.
27Niyontonpatamaꞌ, iso quirica nontocoꞌ imapisopita natainaꞌ. Sinioro nanan quëtërinco niꞌton, nontocoꞌ yaꞌipiya natainaꞌ, tënahuë.
28Inaora nohuanton, Sinioro Quisocristo nosoroatënquëmaꞌ, catahuainquëmaꞌ. Nani ninshitëranquëma huachi.
Paono
Currently Selected:
1 Tesalonicenses 5: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
