Geenesis 7
7
Pajaa nucusacari jiya
1Na nahuaji Pueyasoori naa Noee sequequiaaritij:
—Noeenaa, quiarijia nio pa quishacari puetunu nio pueyajinijiniojuanaani, saa quiajaniyajaari maninia pueyano cutara. Quiaari cua panishano miiquiaa. Naacuatej, quia niquiocua, quia niquiohuajuhuaj, necohuatajuhuaj tama nojorijiaaja quia tacataare quia botejinia. 2Quiata cureeriquiano quiriano puecoosocoriquiano casamijinijinio quia tiuquinijiore siete canuu, siete maajinio. Cuaara quiiria saa caqueetacaja tama necocuatajaaja. Miaquesoo casamijinijinio saniniuujia, saaja quia tiuquinijiore niquiriyatu caya tama necocuatajaaja puetunu cuno casamijinijiniojuanaa. 3Jaacuatujuaca casamijinijinio naajuhuaj. Quia tiuquinijiore siete canuu tama necocuatajaaja. Puetunu cuno casamijianaari pajaa nuhuaji caneriquianohua nio jiyajinia. 4Quiarijiajiniji siete juucajinia, janiyari maru nitiniutianiya jiyanohuani. Maruuri cuarenta juuca cuarenta niucua niniutianiya. Janiyari puetunu nio jiyajiniajanaa cua shipinishano casaa shaajanutaniya tojetaarucuajanaani.
5Noeeri naa miiquiaari taa Pueyaso sequequiaari nojuacuajani.
6Naa pajaa nucusacari jiyatej, Noeeri jiyacari tariucua seisciento marijia shocotejonu quiriquiaa. 7Noeeri na jeecasano botejinia tacataquiaari necohuata, necocuajuhuaj, necohua niquiocohuajaajanio. Saa jiya tama nojorijiaarijia naa cureequiaari pajaajinijitij. 8Pueyasorano puecoosocoriquiano casaa, miaquesoo casaajuhuaj, jaacuatujuaca, roshiyocuatujuaca casaminio, 9puetunu cuno casaajanaari Noee jeecasano botejinia tacataquiaari. Puetunu cuno casamijianaari maninia cojitiajaca tiuquitiaquiaari puetunu tama necocuatajaaja. Naa tiuquitiaquiaariiri taa Pueyaso sequequiaari nojori tiuquitianuracuajani.
10Pueyaso sequesano siete juucajiniani, pajaari jiya coteequiaari nucunu. 11Cunoori quiquiaari abril racajinia diecisiete juucajinia. Noeeri tariucua seisciento marijia shocotejonu quiriquiaa jiyacaritij. Cuno juucajiniajanij, shoniniacu jiyaca moo cariquimiaari pojuarequetacoquiaari. Jiya cajiniocua Pueyaso paatuuri pojuaretaquiaarijuhuaj maru niniuria jiyanohua. 12Naacuatej, maruuri jiyanohua queraatia niquiaari mijiria, cuarenta juuca, cuarenta niucuanio.
13Maru niyaquishacarijia cuno juucajanij, Noeeri na botejinia tacataquiaari nio necohuata: Sem, Cam Jafetnio. Tacaquiaarijaariuhuaj necocua, necohua niquiocohuajaajanio. 14Nojoritia tiuquitiaquiaarijaariuhuaj puetunu casamijuhuanajaj, pueyano rupuesoo casaa, seesano casaajuhuaj. Tiuquitiaquiaarijaariuhuaj puetunu roshiyocuatujuaca casaajanaa, puetunu jaacuatujuaca casaajanaanio. 15Puetunu cuno casaajanaari maninia cojitiaca tiuquitiaquiaari tama necocuatajaaja Noeeta cuno botejinia. 16Naa tiuquitiaquiaariiri niquiriyatu caya, niquiriyatu maajinio puetunu cuno casamijinijiniojuanaa taa Pueyaso sequequiaari Noeecuajaani. Na nuhuaji Pueyasojuanaari nojoriicua tiootiu mishiquioquiaari. 17Maruuri cuarenta juuca niquiaari jiyanohua. Tari pajaa taqueejosacari, boteeri juhuacatecara coteequiaari cuatanu. Socua jeecanemaa maniniaari. 18Pajaari socua jiyacatequiaari socua pajaashiniuria. Bote saniniuujia saaja juhuajaniya cuatariquiaa pajaajiniaari. 19Naa jiyanohua pajaa nenuucuatej, puetunu socua jiyanohua jiyaconaja tuhuananuhuari mishiquiiquiaari. 20Naa pajaa nucunu nuhuaji socua jiyanohua jiyaconaja tuhuananuhua quiajatej, cuniquiji socua siete metro taqueejoquiaariiri. 21Naacuatej, puetunu mijiria quijia pueyajanaari cusonuuquiaari. Cusonuuquiaarijaariuhuaj puetunu jaacuatujuaca casaajanaa, puetunu seesano casaajuhuaj, puetunu pueyano rupuesoo casaajanaanio. Cusonuuquiaarijaariuhuaj puetunu roshiyocuatujuaca casaajanaa. 22Naa cusonuuquiaariiri puetunu nio jiyajinia saminio quijia casaajanaa. Naatej, puetunu na paratu rijiojua casaajanaa cusonuuquiaari. 23Noee, nata quiniaa botejiniani, saaja nojoriiri saminio quiriquiaa. Tamasaca saniniuujia puetunujuanaari pajaajinia cusonuuquiaari: pueyapue, seesano casaa, jaacuatujuaca casaajuhuaj, puetunu roshiyocuatujuaca casaajanaanio. 24Pajaari ciento cincuenta juuca tarishiquiaari nio jiya na nucusacari.
Currently Selected:
Geenesis 7: arl
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.