Geenesis 41

Faraoon maquiyojosanojiniji Josee pohuatasacari maatia

1Na nuhuaji querajaa marijiaari shocojoquiaari. Tamonu niucua, camarnu Faraoonri naa maquiyojoquiaaritij. Nojuajanaari na maquenujinia Nilo moo casaqueyaji nujuariquiaa. 2Naa moojinia na shootiasacaritij maniniuhuanaca siete querasapiriujua juyaca niquirii cuno moojiniji tacataanoori. Na niquiaraja miaquenuusee moo shuriuquioco morijia jiyasocuaari. 3Cuno maniniuhuanaca juyaca nuhuaji tacatamaajaariuhuaj siete sesaruhuanaca maseyoturujua juyaca. Moo casaqueyaji nujuatuseeri, querasapiriujua juyaca shuriucua. 4Jiyacarijiatej, cuno sesaruhuanaca maseyoturujua juyacaari maninia seraatiaree maniniuhuanaca juyaca mioonu. Naa na maquiyojosacaritij, Faraoonri ritia niucuaquee.

5Socua naa maquiyojorohuariuhua: Na maquenujinia niquirii niquiniaja maniniuniaja trigoori. Cuno trigo jiyonaari siete suhuamacaraca, pasacarunaja quiriquiaa. 6Canashiyaquiji mueratuuquiiri socua siete trigo suhuamaca. Na jaari cusejaaca quiriquiaa jiyareta tanatujuaaca, muerujuaaca jiyareta. 7Cuno siete sesarucuna trigoori, jiyacarijia cuno siete maniniuquiunia maniniujiaaca trigo miojoree puetunujuanaa.

Camarnu Faraoonri ritia niucuamaa. Tama nojuajaarijia naa niishiriojoriquiaa: “Janiyaqui maquiyojoriquiaani.”

8Jaara juhuaquequiaari, camarnu Faraoonri naa na maquiyojonuucua tacaaquiaari. Naacuatej camarnu Faraoonri puetunu Egipto jiyajinijinio shimiacuri, niishijiaca pueyajaajanio numootequiaari nocua nojori nijionura. Jaara nocua tiuquiijioquiaari, Faraoonri nojori niquiara pohuataquiaari na maquiyojosano. Cuno shimiacuri, niishijiaca pueyajaajanio, majaari quenaaja niquiriyatu nojorijinijinio na naata pohuatanu quiquiaari casaa na maquiyojosano niishitiniu paniriquiaa nojuajani. 9Jiyacaritij, camarnu Faraoon vino raatejonaa jiyaniijiaari naa camarnu Faraoon sequequiaari:

—Janiyaqui sesa miiriucuaani. Shusha niishiquiinijia. 10Cua camarnunaa, quiaa jaara cua cojiritiacanu juaaniu quiara pan majeetejonaa jiyaniijiatatej, quiaari canaa jiyarotacanu nujuatejosano cojuanaa Potifarcua. Cuno pueyanoori canaa nujuatejocanu nujuatejojuajinia. 11Tamonu niucua canaa maquetusacari, quiara pan majeetejonaa jiyaniijiaari maquiyojocanu. Janiyari cuno niucuaja maquiyojoreejaaniuhuaj. Cuno naa canaa maquiyojosanoni, cunoori canaa niishitiniu paniriquiaa taa canaa miishaanutaniyani. 12Cuno nujuatejojuajiniajani, tii nujuatesano quiriquiaajaariuhuaj Hebreo pueyajinijinio mashaja. Nojuajaari quia nujuatejosano nujuanuna Potifar serucuaja. Canaari canaa maquenujiniji cuno pueyano pohuatacanuni. Nojuajaari maatia canaara pohuatacanu canaa maquenujiniji taa canaa miishaanutaniyani. 13¡Cuno pueyano sequesanoori canaara tohuatecanu taa nojuaja sequecanu canaacuajani! Janiyari cua poonijiosano miiniuucua tacatosaarohuacuaani. Cuartucuana saniniuujia, nojuajaari na riquiajiniji jaasutesaacanu sohuaneyocuata.

14Jiyacaritij, camarnu Faraoonri na seya sequequiaari Josee cuaara nocua tohuatesaaria. Naacuatej, Joseeri ritia nujuatejojuajiniji tohuatesaaquiaari. Coteenu tuquesaareeri. Toque maniniuqui cushitishaareejaariuhuaj. Naa maninia na maniniushitishaanu nuhuajitij, camarnu Faraooncua tiuquinishaaquiaariiri. 15Camarnu Faraoon jaara Josee niquiquiaari, naa na maqueyojosano na pohuataquiaariiri:

—Janiyari naa maquiyojorucuaani, Joseenaa. Majaari quenaaja niquiriyatu pueyano na naata quiria pohuatanu, casaa cua maquiyojosano niishitiniu paniya janiyani. Janiya quiocuara tosaareeni. Quiaa cutarana maatia pohuatanu niishijia maquenujinia niquishano.

16Joseeri camarnu Faraoon riucuaree naatej:

—Cuno niishiniuuri maja tama janiyajinijijaaja. Pueyasojuanaacuajaari quiarijia quia niishitiniutianiya quia maquiyojosanojiniji maninia quia miiniuria.

17Jiyacaritij, camarnu Faraoonri naa Josee coteeree na maqueyojosanojiniji na pohuatanura. Naa sequereeri:

—Janiyari cua maquenujinia Nilo moo casaqueyaji nujuariquiaani. 18Jiyacaritij, janiyari siete juyaca niquirii moojiniji tacataanoni. Tojetaarucuajanaa maniniuhuanacaari quiriquiaa, querasapiriujuatej. Tacataanoori moo shuriuquioco moriquiojua jiyasocua miaquenuuriquiaa. 19Cuno querasapiriujua juyaca nuhuajini, tacatamaajaariuhuaj socua siete juyaca. Cuno siete juyacaari tojetaarucuajanaa sesaruhuanaca jiyareta nucuhua paraca quiriquiaa, sesa niquishano. Tarijiajiniji, majaari jiyano juyaca cua niquiniu quiquiaari niya cua Egipto jiyajiniani. 20Cuno sesaruhuanaca maseyoturujua juyaca sequeeri maninia seraatiaree mioonu cuno siete maniniuhuanaca juyaca. 21Naa cuno sesaruhuanaca mioonu nuhuaji maniniuhuanaca juyacatej, na quiniu quiquioriquiaajaari. Maseyoturujuatej, jiyareta nucuhua paraca. Naa cua maquiyojosacaritij, janiyari niucuamaani.

22Janiyaquiiri maquecuhuaniuhuaj. Jiyacaritij janiyari socua naa maquiyojorohuani. Niquiniaja trigoori siete suhuamacaraca quiriquiaa. Na jaari jatiqui shiiriquiaa na suhuamaacua, maniniujuaaca, querasapijiaacajuhuaj. 23Naa cua shootiasacari cua maquenujiniatej, socua niquiniaja trigoori cua niquiaraja moritiamaa. Siete suhuamacaracaari quiriquiaajuhuaj. Sesarucunaari quiriquiaa, cuseetucuna. Na jaari cuseetujuaaca quiriquiaajuhuaj. Jiyareta muerujuaaca quiriquiaari pananu muetasamaji naseeca paratu piyarojonuucua. 24Cuno, cuseetucuna trigoori cuno siete maniniuquiunia trigo miojoree. Janiyari tari nio pohuataree niishijiaca pueyani. Majaari quenaaja niquiriyatu nojorijinijinio na naata pohuatanu quirii quiria, casaa cua maquenu niishitiniu paniya janiyani.

25Joseeri jiyacari naa riucuaree camarnu Faraoontej:

—Cua camarnunaa, cuno querajaa casaa quia maquiyojosanoni, seetanujuanaa majaari querajaa casaa. Quiaari saaja niquiriyatu casaa maquiyojorucuaa. Cua tojiri. Pueyasojuanaacuajaari tari quia numooterucuaa quia maquenujinia casaa nojuaja miiniutianiyani. 26Cuno quia maquiyojosano siete maniniuhuanaca juyacani, naajuhua cuno siete maniniuquiunia trigojaniuhuaj, cunoori siete marijia. 27Saniniuujia, cuno siete sesaruhuanaca jiyareta maseyoturujua juyaca quia niquishano quia maquenujiniani, naajuhuaj, cuno siete cuseetucuna sesarujuaaca trigo, pananu muetasamaji naseeca paratu piyarojonuucuani, cunoori siete marijia quiniutianiya pueya miaajesacari. 28Seetanujuanaa naa quiniutianiyari taa cua sequeya quiajaniyacuajani. Pueyasocuajaari tari quia toree, cua camarnunaa, casaa nojuaja miiniutianiyani. 29Naacuatej, quiarijiajiniji siete marijia cuaara shocojoorajaatijia, puetunu nio Egipto jiyajiniajanaa pueyapueeri jiyanohua queraatia trigo tamuetoriquiano carojotanu. 30Cuno marijia shocojonu nuhuaji saniniuujia, quiniutianiyajaariuhuaj jiyanohua miaajesacari siete marijia cuaara shocojoorajaatijia. Jiyacaritij quera nojori titiacosacari na miaajaara, pueyari jiyanohua queraatia nojori carojotasacari trigo nojori mianu niyajetanutaniya. 31Cuno miaajenuuri tojetaarucuajanaa rejeretasoo quiniutianiya. Jiyacaritij, siete marijia miaajenu quishacarini, majaari jiyacari nataacuaca moritianu quiniutianiya miasocoriquiano quenaaja. 32Cua camarnunaa, Pueyasoori quia niishitiya seetanujuanaa naa miiniutianiyari. Naarate quiaari cunojua caminiujiuriucuaa maquiyojonu. Majaari Pueyaso tarishiniu quiniutianiya. Quia maquenujinia quia niquishano tohuatenutaniya quera quiaraari.

33Naacuatej camarnunaa, maninia juhuari quiarijia quia pajere niishijia pueyano, poonijiojuajuhuaj. Nojuaja cuaara queraatia trigo rerateera racatasocoriquiano. 34Camarnunaa, naa quia miiri: Pueya quia saquiriojore jiyaniijianucuara nojori quia jiyatesocoriquiano. Nojori cuaara quia niti quiojoora puetunu Egipto jiyajiniajanaa, trigo reratenuucua. Nojori cuaara naa rerateera puetunu cuno siete marijiarajanaa. Trigo camaruhua cuaara puetunu cinco saco na miishinijiosanojinijijanaa niquitiojoora niquiriu. 35Quiocua naa reratere puetunu cuno siete marijiarajanaa trigo maniniushishacaritij. Reratesano trigo cuaara racatasaaria, quia pueya quia cojuatesocoriquiano maninia. Trigo cuaara racatasaaria puetunu tiacacajiniajanaa, pueya miaajesacari nojori masenura nojori miasocoriquiano quenaaja. 36Naacuatej trigoori juhuacarijia racatasano quiriquiano maja pueya titiaconura na miaajaara miaajesacari cuno siete marijia shocojosacari.

Josee quishacari camarnu

37Camarnu Faraoonri Josee sequesano maniniucuaree. Naajuhuaj, jiyaniijianucuarano camarnuo Faraoon jiyatesano na pueyari na maniniucuareejuhuaj. 38Jiyacaritij, camarn Faraoonri naa sequeree tii quiniaa na pueyatej:

—¿Pa naatateeri socua tamonu niishijia pueyano riuriatanu Pueyaso sohuanuraca pueyano juhua nio pueyanojua?

39Jiyacaritij camarnu Faraoonjanaari naa Josee sequeree:

—Pueyasojuanaacuajaari quia toree naa maatia quia pohuatanura puetunujuanaa. Naacuatej, majaari socua tamonu pueyano quiniu juhua quiajaniyaja, niishijia cutara. 40Naacuatej quiarijiani janiyari nio cua quiquio camarnura quia jiyatenutaniyani. Naajuhuaj, puetunu nio cua Egipto jiyajinia cua jiitiasano pueyajanaari quia tojijiaca quiniutianiya. Saa janiyajanaari socua pueresano quiriquiano quiajaniyajiniji cutarani, camarnujuanaa cua quiniuucua. 41Quiarijiani, janiyari puetunu cua Egipto jiya camarnurajanaa quia jiyatenutaniyani.

42Naa Josee na sequenu nuhuajitij, camarnu Faraoonri na juaashiquiajiniji tama na jaaniishojaaja jocuaree. Josee na cushitiriiri. Cuno na jaaniishoni, cunoori puetunu na naajio puequeetujiniajanaa na jiriojotaja quijia. Naa na miiniu nuhuajitij, camarnu Faraoonri na seya sequeree cuaara Josee cushititiuuria cohuajaque maniniuqui linojiniji toque. Naajuhuaj, cuaara na riquiajinia cushiritiasaaria orojiniji tiujiau. 43Na seya sequereejaariuhuaj Josee cuaara caballohua jayotasano rucuanejotaru tacojinia tacanishaaria. Cuno rucuanejotaruuri pueyaracaanu camarnu Faraoon rucuanejotaru nuhuaji sacuaja quijia. Jiyacaritij, camarnu Faraoonri na seya sequeree nojori puetanura Josee naa nojori nacanuta nojori numootenura pueya: “¡Canaacuaji nia queretere cunoco!” Cuno juucajiniji, Joseeri puetunu Egipto jiyajinia quiniaa pueya camarnura quiquiaari.

44Na nuhuaji, Faraoonri naa Josee sequequiaari:

—Quiaacuajaari niishiya janiyacuajaari camarnujuanaani. Naajaa pueya cuaara quia tojitiuuria taa na tojitiuquiaa janiyacuaani. Naacuatej, puetunu nio Egipto jiyajinia quiniaa pueyajanaa cuaara quenaaja casaa miyaquiiria quia cuaara nojori sequerejaatijiaj.

45Camarnu Faraoonri naa Josee jiyaniquiquiaari tama na egipcio rupaajiniajaajatej, Safenat-paneeah. Jiyacaritij, camarnu Faraoonri Potifera niyatu na camitirii, Asenat jiyanishano niyacoo. Potiferaari On tiacajinia narta taucuacaara secojona quijia. Cuno juucajiniji, Joseeri puetunu Egipto jiyajinia quiniaa pueya camarnu quiquiaari. 46Josee jaara shushajanaa camarnu Faraooncua tiuquinishaaquiaari, Joseeri jiyacari tariucua treinta marijia shocotejonu quiriquiaa. Josee tohuatasacariuhua camarnu Faraoon tiajiniji, naa na nuhuajiria na sequeyarohuari:

—Quiaareenijia.

Joseeri jiyacari coteequiaari puetunu Egipto jiyajiniajanaa rucuanejonura. 47Cuno siete marijia shocojosacari, trigoori jiyanohua maniniushiquiaari jiyacari. Jiyanohua muetuquiaariiri. 48Naacuatej, Joseeri cuno siete marijiara trigo maniniushishacari puetunu Egipto jiyajinia quiniaa pueyajinijiniojuanaa nojori carajotasano trigojiniji secaja reratequiaari. Puetunu na reratesano trigojanaa racataquiaari puetunu cuhuariquiaca shuriucua tiacacajiniajanaari. 49Josee reratesano trigoori jiyanohua paaquioquiaari juhua shoniniacu caminia shuriuquioco paaquiojua jaaquiaja. Jiyanohua queraatia trigo quiniuucua, Joseeri jiyanohua na riunitijioquiaari. Naacuatej majaari tari Josee shanacunu quiquiaari na shanacujutajajinia. Na naajiojotanu tarinitiaquiaarijaariuhuaj. Naa miiquiaariiri puera jiyanohua trigo quiniuucua.

50Juhuanojuaja cuno miaajesacari coteyaquishacarijia, Joseeri querajaa canuu muetutequiaari necocua Asenat. 51Nojuajaari na jiyapueranu jiyaniquiquiaari Manasees. Naa neyanu jiyaniquiquiaariiri tama naa na sequenuucuajaaja: “Pueyasoori puetunu naquiya cua miiniujianaa cua niyajetaniricuaani, puetunu cua tapueyocuajanaa cua niyajetaniricuaajaariuhuaj.” 52Na nuhuajishana jiyaniquiriiri Efraiin. Naa neyanu jiyaniquiquiaariiri tama naa na sequenuucuajaaja: “Pueyasoori querajaa canuu cua muetureeni, nio jiyajiniaja tii naquiya cua miiquiaaricuajani.”

53Jiyacari tari shocojoquiaariiri cuno siete marijia jiyanohua queraatia trigo muetusacari. 54Saniniuujia coteequiaariiri cuno siete marijia pueya miaajesacariria. Seetanujuanaa naa quiquiaariiri taa Josee sequequiaaricuajani. Puetunu tamonu jiyacajinia pueyajanaari miaajequiaari. Egipto jiya tiacacajiniajanaani, cuniqui cutaraari maja pueya miaajenu quiquiaari. 55Naacuatej, Egipto jiyajinia quijia pueya jaara nojori miaquesocoriquiano pueetacoquiaari, puetunu nojorijianaari camarnu Faraooncua quiojoquiaari trigo nojori masenura nojuajiniji. Camarnu Faraoonri saaja naa sequequiaari cuno pojori:

—Josee nia niquishii. Niocua na sequesano miiri.

56Puetunu cuno Egipto jiyajinia quiniaa pueyajanaa jaara coteequiaari miaajenura, Joseeri puetunu tiacacajinia na racatasano trigo quiquiocuajanaa riataquetuquiaari. Jiyacaritij, puetunu Egipcio pueyajanaari tama nojori jiitiasano cumaneecatajaaja masejoquiaari trigo na miaajaara. Miaajenuuri socua jiyacatequiaari. 57Jiyacaritij, tamonu jiyacajinijinio pueyari Egipto jiyajinia nijioquiaarijuhuaj, Joseejiniji nojori masenura trigo. Majaari quenaaja tamonu jiyacajinia miaquesano quiniu quijia.

Currently Selected:

Geenesis 41: arl

Highlight

Copy