Geenesis 39

Josee Potifar niquiocuajiniji pohuatasano

1Ismaelcuajinio caneno pueya jaara Josee tiuquitiaseequiaari Egipto jiyajinia, Potifar jiyanishano tahueri na masequiaari na serura na tiaco poonijioriquiano. Cuno Potifarri Egipto jiya camarnu Faraoonra poonijiona quijia. Potifarri capitaan quijia, camarnu Faraoon cojuanaa soldadohua jiyaniijia quijia. 2Naajaa, Pueyasoori Josee cojiriquiaa. Naacuatej, puetunu Josee miishanojanaari maninia quiquiaari na masena na camarnu Egipcio tiajinia. 3Cuno tahue Josee masequiaari tama na cumaneecatajaajani, nojuajaari niishiquiaari Pueyasoori Josee naacuriquiaa puetunu na miishanojiniajanaa maninia na quiniuria. 4Na camarnuuri naacua Josee timitiajatej. Cunora Josee jiyateree na naacunaraari na tiaco poonijionaa nujuanuna na quiniuria. Naacuatej, na camarnuuri Josee seerataquiaari puetunu na tiaco na jiitiasano casaajanaa. 5Potifar seeratanu nuhuaji Josee na tiaco poonijionaa, puetunu na jiitiasanojuhuaj, cuno juucajiniji, Pueyasoori maninia miiquiaari Potifar, na tiaco, na cuhuariquiajiniajuhuaj. 6Josee miiniuucua puetunu Potifar poonijiosanojuanaa na tiaco, Potifarri maja tari na tacaaniu quijia. Naacuatej, Potifarri saaja juhuajaniya miaquenuucua tiuquijiohua na tiajinia.

Joseeri mashaja maniniu quijia. Puetunu na niquitiujiacajanaari na maniniucuatujua. 7Na nuhuaji, Josee camarnu Potifar niquiocuaari coteequiaari Josee maniniucuanu. Tamonu juuca, cuno maajiiri naa Josee sequequiaaritij:

—¿Taamueca mashajatequia? Cua canure.

8Joseeri saaja cuno maaji ruuretaree. Naa na sequereeri:

—Cua camarnuutijia puetunu niya na tiajinia na jiitiasanojuanaa cua seeratarucuaate. Niya nera cua poonijionuucua na tiajinianij, nojuajaari maja tari na tacaaniu. 9Nio tiajinia, majaari puetunu na tiajinia na jiitiasanojuanaa cua seeratarucuaani. Maja cutaraari na sequenu quirii janiya, cua cojuanura quiajaniya. Nojuacuajaari niishiya quiaari necocua. Naacuatej, ¿janiyatucua taa sacuaraatia miiriucuara cua camarnuni? Naajuhuaj, naa miiniuniquitij cunoori tojetaarucuajanaa sacuaraatia Pueyasora.

10Cuno maajiiri Joseecua shiiniuquiquiaari saaja. Josee sequejaari nojuaja na canunura. Joseeri saaja na shocoteja. 11Tamonu juuca saniniuujia, Joseeri juucua na camarnu tiaco tiuquiquiaari na poonijiosano na miiniuria. Jiyacaritij, majaari quenaaja niquiriyatu pueyano quiniu quiriquiaa tiaco. 12Cuno maajiiri Josee toquejiniji quiaree. Naa na sequereeri:

—Cua canurejaj.

Joseeri saaja netequee. Carijiniacuma tohuatamaari. Cuno maaji juaashiquiajinia tiujiaquee na toqueeri. 13Cuno maaji niquishacari Joseeri na toque tiujiaquee na juaashiquiajinia naa na netesacari na shuriucuajitij, 14tiaco poonijionaa na seya na sariyotareeri. Naa nojori sequereeri:

—¡Nia niquishuriniaja! Cua niyacaari juhua maninia miiriquiano nio Hebreo pueyano maserucuaa niya na tiajinia na niasocoriquiano. Quiarijiaariuhuaj, cuno pueyanoori pa rerequetereeni. Cua sohuacamara cucua tiuquimiaari. Cua canunu paniriquiaa juucuaari. Janiyari naacua jiyanohua na sariyotareeni. 15Jiyanohua marteyano na tojishacari janiya, cua sohuacamaji netequee ritiaari. Cunora cua sohuacamara tiujiaquee na toquejaariuhuaj.

16Naacuatej, cuno maajiiri Josee toque racataree cuniquijia neyaca na niquitishocoriquiano jaara tiuquiriohua. 17Potifar jaara tiuquiquiaariuhua na tiajinia, necocuaari puetunujuanaa na pohuataquiaari Joseejiniji. Naa sequeree neyacaari:

—Pa serurano quia masesano cuno Hebreo pueyanoni, cua sohuacamara cucua tiuquiriinio. Cua canunu paniriquiaari. 18Jiyanohua cua sariyotasacari nojuaja, ritia netequeeri. Na toque tiujiaquee cua shuriucuaari. 19Quia seruuri naa cua miiriiquij.

Naa Potifar tojishacari necocua pohuatasano nojuajatej, jiyanohua juaariiri. 20Na camarnuuri jiyacari Josee quiaree. Tamasaca na seya na seeratareeri cuaara Josee nujuatetuura nujuatejojuajinia, tee cuniqui camarnu Faraoon nujuatejosano pueya nujuaturiquiaacuaani. 21Naajaa Josee nujuasacari nujuatejojuajiniatej Pueyasoori tii na cojiriquiaajuhuaj. Maninia miijiojua Joseejaari. Naacuatej, nujuatejosano pueya cojuanaa jiyaniijiaari Josee maniniucuaquiaari. 22Naacuatej, cuno jiyaniijiaari Josee seerataquiaari nujuatejojuajinia na cojuanura puetunu narta nujuatejosano pueyajanaa. Joseeri narta nujuatejosano pueya saaneejojua nojori miiniuria puetunu nojori miishanojanaa nujuatejojuajinia. 23Naa Josee naacunuucua nujuatejojua jiyaniijiatej, cuno jiyaniijiaari maja tari na tacaaniu quijia nujuatejosano pueya na cojuanura. Joseecuajaari maninia miiriquiaa puetunujuanaa na niti. Pueyasojuanaacuajaari na naacuriquiaa. Naacuatej, na miishanoori puetunujuanaa maninia quiquiaari.

Currently Selected:

Geenesis 39: arl

Highlight

Copy