Efesios 5

Chojb'ina jusuk' jela' pacha' ri taqal chiqe ri oj ralk'o'al ri Dios

1Ruma k'u alaq ralk'o'al ri Dios y Rire k'ax kuna' alaq, lik chirajawaxik 'ana alaq jela' pacha' ku'an Rire. 2Ronoje k'u ri ka'an alaq, 'ana alaq ruk' rutzil k'u'xaj, jela' pacha' ri rutzil uk'u'x ri Cristo uk'utum chiqawach. Ma Rire lik k'ax xojuna'o y xuya rib' pa kamik paqak'axel re tojb'al ri qamak. Ri xu'ano e pacha' jun qasa'n lik ki' ruxlab' chwach ri Dios.

3Ralaq ri alaq chi re ri Dios, lik na ub'e ta k'enoq we chixo'lib'al alaq k'a k'o ri karetz'ab'ej uwa uq'ij ruk' junoq na uk'ulel taj o ku'an taq ch'ulilaj mak o na kaki'kot ta ruk' taq ri k'o ruk' ma xaqi kurayij más. 4Mach'a'tib'ej ne alaq ch'a'tem k'ixb'al uwach, ch'a'tem na jinta kutiqoj, ch'a'tem na chom ta k'enoq tob' ne tze'b'al uwach. Ma ronoje wa' lik na taqal ta che ralaq. Ri 'ana alaq e tioxin alaq chwach ri Dios ruk' ri ch'a'tem alaq. 5Ma lik eta'am chi alaq wa': Ri karetz'ab'ej uwa uq'ij ruk' junoq na uk'ulel taj, ri ku'an taq ch'ulilaj mak, ri na kaki'kot ta ruk' taq ri k'o ruk' ma xaqi kurayij más, ri ka'anaw wa' e pacha' juna aj tiox ma e ku'an “udios” che janipa ri kurayij; konoje k'u ri kaki'an taq wa', na kakik'ul ta ri b'i'tisim lo chike ri kiya'om kib' puq'ab' ri Cristo y e k'o chupa rutaqanik ri Dios. 6Masokotaj alaq kuma ri kakimin alaq chupa ri mak ruk' ch'a'tem lik chakojo' qatzij pero xa raq'ub'al. Ma ri q'atb'al tzij re ri Dios kape pakiwi ri e aj palajiy tzij, wa' e ri kaki'an taq wa' wa mak.

7Ma'an k'u e alaq kuk' taq wa winaq kaki'an ri na utz taj. 8Ma ralaq ojertan sachinaq alaq chupa ri q'equ'm, no'j wo'ora k'o chi alaq pa ri Q'ijsaq ruma ri Cristo. B'ina k'u alaq pa ri Q'ijsaq jela' pacha' ri taqal che alaq. 9Ma e junoq k'o pa ri Q'ijsaq, ri' che rub'inik usilab'ik kilitaj wi ri relej uk'u'x, lik jusuk' ri ku'ano y lik qatzij ronoje ri kub'i'ij. 10E lik ch'ob'o alaq sa' ri kuk'ul uk'u'x ri Qaqaw y e 'ana k'u alaq ri'. 11Ma'an e alaq pacha' ri kaki'an ri e k'o pa q'equ'm, ma ri kaki'an rike na jinta k'ana uchak. Ri 'ana alaq e q'alajisaj alaq chike ri na utz taj kaki'ano cha' na kaki'an ta chik, 12tob' ne lik k'ixb'al ub'i'xikil ri kaki'an rike xa xe'laq'ay. 13Yey echiri' kel chi saq ri ka'anik, kaq'alajin k'u ri' we utz o na utz taj, ma ronoje kilitaj chi utz ruma ri Q'ijsaq. 14E pacha' ri kab'i'xik:

E ri'at ri katwarik, ¡k'una k'u saq chawach!

Chatwa'lij lo chikixo'l ri ekaminaq pa mak,

y ri Cristo katuya pa ri Q'ijsaq.#Is. 60:1-2

15Lik chajij k'u ib' alaq che ri b'inik silab'ik alaq. Ma'an e alaq pacha' ri kaki'an ri na jinta kina'oj; e lik ch'ob'o alaq ruk' saqil na'oj sa' taq ri ka'an alaq. 16Lik ya'a ib' alaq che u'anik taq ri utz, ma waq'ij ora lik katajin uk'iyarik ri mak che ruwachulew. 17Ma'an k'u alaq ri na kach'ob' ta alaq chi utz ri ka'an alaq; e lik k'ola na'oj alaq puwi sa' ri karaj ri Qanimajawal che alaq. 18Maya ib' alaq che q'ab'arik, ma wa' xa kuyojij rub'inik junoq. E ya'a ib' alaq puq'ab' ri Ruxlab'ixel ri Dios cha' e Rire kataqan pa anima' alaq. 19Ma we k'o ri Ruxlab'ixel ri Dios quk', jewa' kaqa'ano: Kaqanimarisaj qak'u'x chiqawach ruk' taq salmos, ruk' taq b'ix tz'ib'ital kanoq y ruk' k'ak' b'ixob'al ya'om chiqe ruma ri Ruxlab'ixel ri Dios. Kaqayak k'u uq'ij ri Qaqaw ruk' b'ix kalax lo pa qanima'. 20Yey xaqi kojtioxin chwach ri Qaqaw Dios ruma ronoje, y kaqa'an k'u wa' chupa rub'i' ri Qanimajawal Jesucristo.

Pixab'anik chike ri e k'ulanik

21Nimaj ib' alaq chiwach alaq ruk' xi'in ib' chwach ri Cristo, ma e karaj ri' Rire chiqe. 22E uwari'che, rixoq k'ulanik taqal che kutaqej ri rachijil jela' pacha' ri lik taqal che kutaqej ri Cristo. 23Ma rachi e k'amal uwach ri rixoqil jela' pacha' ri Cristo e k'amal uwach riglesia y na xew tane k'amal uwach ma e Kolob'enel re. Jek'ula' ri Cristo e ujolom riglesia yey riglesia e ucuerpo Rire. 24Jek'ula' pacha' riglesia k'o puq'ab' ri Cristo, jela' chu'ana rixoq ruk' ri rachijil; che ronoje taq ri ku'ano, e lik chutaqej ri rachijil.

25Ek'u rachi k'ulanik taqal che k'ax kuna' ri rixoqil jela' pacha' ri Cristo lik k'ax xojuna' ri oj u iglesia y xuya rib' pa kamik paqak'axel. 26Xu'an k'u wa' cha' e ku'an chom y jusuk' che ri qab'inik. Xresaj k'u ri qamak ruma Ruch'a'tem; ri xu'ano e pacha' ka'an che ri ch'ul echiri' kach'aj ruk' ya'. 27Xu'an k'u wa' cha' echiri' ri'oj oj u iglesia kojopon chwach, oj jun chomilaj iglesia lik jusuk' y na jinta k'ana mak kariqitaj che. 28Jek'ula' lik chirajawaxik che rachi e kuk'ut ri rutzil uk'u'x che ri rixoqil. Jela' pacha' junoq lik kuchajij rucuerpo, jek'uri'la' taqal che rachi kuchajij ri rixoqil. Ma we juna achi k'ax kuna' ri rixoqil, e ke'elawi k'ax kuna' rib', ma rachi ruk' rixoq, xa jun ki'anom. 29Na jinta junoq tzel karil rucuerpo; ri ku'ano e kawa' chi utz y lik kuchajij chi utz. Jela' ri ku'an ri Cristo che riglesia, lik kuchajij chi utz. 30Ku'an wa' chiqe ma ri'oj oj ucuerpo.#Gn. 2:23 31Jek'uwa' ri kub'i'ij Ruch'a'tem ri Dios:

Ruma k'u ri', rachi echiri' kak'uli'ik,

karesaj rib' chikij ruchu-uqaw

cha' kajeqi' ruk' ri rixoqil

y kikab'ichal k'u ri' keb'u'ana xa e jun chwach ri Dios Gn. 2:24

kacha'. 32Lik naj kumaj wa' wa k'utub'al q'alajisam chiqe; pero kamb'i'ij k'u ri'in, wa' e jun k'amb'al na'oj puwi ri Cristo ruk' riglesia. 33Yey e ne jun pixab'anik che onoje alaq ri alaq k'ulanik. Rachi lik k'ax chuna'a ri rixoqil jela' pacha' k'ax kuna' rib' rire, yey ek'u rixoq e lik chutaqej ri rachijil.

Currently Selected:

Efesios 5: acrN

Highlight

Copy