Gḭ-Néje 44
44
Ŋgo-kai-mán gə́ igi lé
1Jisəb un ndia ar njekaa dɔ kəi ləa pana: Ɔm nésɔje mee ɓɔlje’g lə dee aree as dɔ dee dɔ dee loo kɔdee’g ndá a tel gə lar lə nana kara kula ta ɓɔl’g ləa-ləa. 2I a kula ŋgo-kai-mán ləm gə́ ra gə larnda lé ta ɓɔl’g lə yeḛ gə́ ndɔḭ lé gə lar kó ləa na̰’d.
Njekaa dɔ kəi lé ra to gə́ Jisəb un ne ndia aree lé ya tɔ. 3Teḛ gə ndɔ, loo gə́ loo àr yərərə ndá d’ar dəwje neelé d’aw gə mulayḛ̀je-je lə dee na̰’d. 4Loo gə́ deḛ teḛ mee ɓee-boo gə́ raga d’aw əw el ya ɓəi ndá Jisəb ula njekaa dɔ kəi ləa lé pana: Ḭta tuba goo dəwje neelé. Loo gə́ i iŋga dee ndá dəji dee pana: See gelee ban ɓa seḭ raje majel ɓa godə maji’g wa. 5See seḭ awje gə ŋgo-kai-mán lə mbai ləm gə́ yeḛ aw ai ne né ləm, yeḛ aw ndo̰ ne ər ləm tɔ lé el wa. Néra sí gə́ togə́bè lé to lée’g el.
6Loo gə́ njekaa dɔ kəi lé iŋga dee ndá yeḛ ndaji taje neelé ar dee. 7Deḛ d’ilá keneŋ pana: See ban ɓa mbai lə sí pa gar ta gə́ togə́bè wa. Maji kar néra gə́ mina̰ gə́ togə́bè lé ɓar ri kuraje ləa mba kar dee ra el. 8Aa oo, lar gə́ jeḛ j’iŋga ta ɓɔlje’g lə sí kédé lé j’ḭ ne dɔ naŋg ɓee gə́ Kana̰ n’telje ne j’ari. See j’a tel ɓogo larnda əsé larlɔr mee kəi’g lə mbai ləi loo gə́ ra tɔɓəi wa. 9Mbuna kuraje’g ləi neelé yeḛ gə́ i a kiŋga ŋgo-kai-mán neelé rəa’g ndá a kwəi tɔɓəi jeḛ lai kara j’a toje gə́ ɓərje lə mbai lə sí ya.
10Yeḛ pana: Taree a to to gə́ seḭ paje lé ya! Yeḛ gə́ d’a kiŋga ŋgo-kai-mán rəa’g lé a to ɓər ləm ŋga seḭ ɓa yḛ̀ taree a kwa dɔ sí-seḭ el.
11Léegəneeya nana kara rəm gə ɓɔl ləa naŋg ndá wa ta ɓɔl ləa teḛ-teḛ tɔ. 12Njekaa dɔ kəi lé un kudu saŋg keneŋ un kudee dɔ ka̰ ŋgondər’g lé saar teḛ ne dɔ ka̰ ŋgon gə́ ndɔḭ’g tɔ ndá d’iŋga ŋgo-kai-mán lé mee ɓɔl’g lə Bḛjami tɔ. 13Deḛ t’wa kubuje lə dee gə́ rɔ dee’g hao̰-hao̰ til ndá nana kara tɔ néje ləa dɔ mulayḛ̀je’g ləa ndá deḛ tel d’aw ne ɓee-boo’g lé gogo.
Juda ra ndòo rɔ Jisəb’g gə mbata lə Bḛjami
14Juda gə ŋgakea̰je ree kəi lə Jisəb, loo gə́ yeḛ si keneŋ ɓəi ndá deḛ ti bəbərə-bəbərə d’oso naŋg nea̰’g. 15Jisəb dəji dee pana: See ɗi ɓa seḭ raje bèe wa. See seḭ gərje to gə́ dəw gə́ to gə́ ma bèe lé askəm saŋg né gə́ to loo-kiya’g el wa.
16Juda ndigi təa’g pana: See j’a pa ban-ban kar mbai lə sí wa. See ta ɗi ɓa j’a pa wa. See ɗi ɓa j’a ra mba kɔr ne ta dɔ sí’g wa. Ala iŋga meeyèr rɔ kuraje’g ləi mba̰. Aa oo, ɓasinè jeḛ lai jeḛ n’toje gə́ ɓərje lə mbai lə sí, jeḛ ləm, gə yeḛ gə́ d’iŋga ŋgo-kai-mán jia’g lé ləm tɔ.
17Jisəb pana: Ala ɔgm loo ra togə́bè! Dəw gə́ d’iŋga ŋgo-kai-mán jia’g lé ɓa a to ɓər ləm. Nɛ seḭ lé telje awje rɔ bɔ síje’g gə meelɔm ya.
18Yen ŋga Juda rəm pər gə́ rɔ Jisəb’g ulá pana: Ǝi Mbai ləm, m’ra ndòo rɔi’g mba kari ya̰ loo ar kura ləi pata ari oo ɓó ar oŋg ləi ḭ dɔ kura’g ləi el! Mbata i lé to asəna gə Parao̰ ya. 19Mbai ləm dəji sí pana: See bɔ síje əsé ŋgoko̰ sí si keneŋ wa. 20Jeḛ j’ila mbai lə sí keneŋ m’pana: Bɔ síje gə́ ɓuga lé si gən ləm, ŋgoko̰ sí gə́ ndɔḭ gə́ yeḛ ojee dɔ tɔgee’g lé kara si gən ləm tɔ. Ŋgon neelé ŋgokea̰ gə́ ko̰ dee kára ba lé wəi, aree yeḛ nja nai gə karee ba ndá bɔbeeje undá dan kəmee’g. 21I ula kuraje ləi pana: J’aree ree sə sí kari ée gə kəmi. 22Jeḛ lé j’ilaje mbai lə sí keneŋ m’pana: Ŋgon neelé askəm kya̰ bɔbeeje el. Ɓó lé yeḛ ya̰ bɔbeeje ndá bɔbeeje a kwəi. 23I tel ula kuraje ləi pana: Ɓó lé ŋgoko̰ sí gə́ ndɔḭ a tel ree sə sí el ndá j’a koo kəmi gogo el tɔ. 24Togə́bè ɓa loo gə́ jeḛ n’tel j’awje rɔ kura’g ləi gə́ to bɔm lé jeḛ ndajije ndu mbai lə sí lé j’aree oo. 25Ndá bɔ síje ula sí pana: J’a telje kaw ndogo ne nésɔ lam ɓəi. 26Jeḛ j’ulá m’pana: J’askəm kaw el. Ɓó lé ŋgoko̰ sí gə́ ndɔḭ lé aw sə sí ndá j’a kaw ya nɛ ɓó lé ŋgoko̰ sí gə́ ndɔḭ lé godo rɔ sí’g ndá j’a kaskəm koo kəm dəw neelé el tɔ. 27Kura ləi gə́ bɔm lé ula sí pana: Jeḛ n’gərje gao to gə́ dené lə neḛ oji sə neḛ ŋganje gə́ diŋgam joo ba. 28Yeḛ gə́ kára ḭ rɔ neḛ’g aw raga ar neḛ m’pana: Da gə́ wala ɓa wá tiee mbidi-mbidi mbata neḛ n’tel n’ée gogo el saar. 29Ɓó lé j’a taaje yeḛ gə́ nai ji neḛ’g tɔɓəi ɓa némajel a teḛ dəa’g ndá j’a kar yiŋga dɔ neḛ gə́ pudu lé andə mee ɓee’g lə njé gə́ d’wəi’g lé gə meeko̰.
30Ɓasinè lé ɓó lé m’a tel kaw rɔ kura’g ləi gə́ to bɔmje lé lal kar ŋgon lé aw sə sí mbata to ŋgon gə́ mee bɔbeeje ɔr dəa’g el lé ndá 31loo gə́ yeḛ oo ŋgon neelé sə sí na̰’d el ndá yeḛ a kwəi ya. Bèe ɓa kuraje ləi d’a kar yiŋga dɔ bɔ síje gə́ to kura ləi gə́ pudu lé andə mee ɓee’g lə njé gə́ d’wəi’g lé gə meeko̰ ya. 32Mbata kura ləi taa ta gə́ wɔji dɔ ŋgon lé ɔm dəa’g am m’ula bɔm lé m’pana: Ɓó lé m’a tel ree səa rəa’g el ndá taree gə́ rɔ bɔm’g lé a kwa dɔm saar gə no̰ ya. 33Ɓasinè ma m’ra ndòo rɔi’g mba kari ya̰ kura ləi aree nai gə́ ɓər lə mbai ləm tor ŋgon’g lé. Ndá maji kar ŋgon lé tel aw gə ŋgakea̰je na̰’d ya. 34See m’a tel kaw rɔ bɔm’g lal kar ŋgon lé aw səm na̰’d to gə́ ban wa. Ǝi! Maji kam m’oo meeko̰ lə bɔm bèe el ŋga.
Currently Selected:
Gḭ-Néje 44: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
