Gḭ-Néje 42
42
Ŋgako̰ Jisepje ree Ejiptə mba ndogo kó
1Jakob oo sor kó gə́ to Ejiptə ndá yeḛ ula ŋganeeje pana: See gelee ban ɓa seḭ aaje kəm na̰ togə́bè wa. 2Yeḛ pana: Aa ooje, ma m’oo sor kó gə́ to Ejiptə. Ḭje awje nu mba ndogoje kó keneŋ kar sí mba kar sí j’isije ne kəmba ɓó gə mba kar sí j’wəije el#NNk 7.12.
3Ŋgako̰ Jisepje gə́ dɔg lé d’ḭ d’aw Ejiptə gə mba ndogo kó lé tɔ. 4Nɛ Jakob ar Bḛjami, ŋgoko̰ Jisəb lé aw sə dee el nà banelə né gə́ majel a teḛ dəa’g. 5Ŋgalə Israɛl ree mba ndogo kó mbuna njé gə́ raŋg gə́ ree lé to mbata ɓoo-boo o̰ ɓee gə́ Kana̰ tɔ.
6Jisəb ɓa to njeguburu ɓee gə́ dɔ naŋg’d neelé. Yeḛ nja ɓa dəwje lai mee ɓeeko̰’g ndogo kó rəa’g. Ŋgako̰ Jisepje ree d’unda barmba nea̰’g dəb kəm dee naŋg nea̰’g tɔ. 7Jisəb oo ŋgakea̰je lé ndá yeḛ gər dee. Nɛ yeḛ tel rəa to gə́ dəw-dɔ-ɓee bèe kəm dee’g. Yeḛ pa sə dee ta gə́ kədərə dəji dee pana: Seḭ lé see ḭje ra wa.
Deḛ d’ilá keneŋ pana: J’ḭ dɔ naŋg gə́ Kana̰ ɓa jeḛ n’ree gə mba ndogo nésɔ.
8Jisəb lé gər ŋgakea̰je ya nɛ deḛ ɓa gəree el. 9Jisəb lé mée olé dɔ nije gə́ yeḛ ni dɔ dee’g ndá yeḛ ula dee pana: Seḭ toje njétənlookooje ɓa. Seḭ reeje mba koo dəb looje gə́ mee ɓeeko̰’g neelé gə́ siŋga deḛ godo ɓa mba tel kaw kula deeje ɓəi, yee ɓa seḭ reeje ne gə mbəa#Gn 37.5-10.
10Deḛ tel d’ilá keneŋ pana: Wah! mbai lə sí, kuraje ləi ree mba ndogo nésɔ ya. 11Jeḛ lai lé n’toje ŋgan mee dəw gə́ kára ba ya. Jeḛ n’toje dəwje gə́ gəd ya ɓó kuraje ləi to njétə̰lookooje el.
12Yeḛ ula dee pana: Wah! togə́bè el! Seḭ reeje gə mba kooje dəb looje mee ɓeeko̰’g neelé gə́ siŋga dee godo ya, yee ɓa seḭ reeje ne gə mbəa.
13Deḛ d’ilá keneŋ pana: Jeḛ, kuraje ləi lé n’toje ŋgako̰ na̰je ya dɔg-gir-sí-joo, jeḛ n’toje ŋgan mee dəw gə́ kára ba gə́ si ɓee gə́ Kana̰! Aa oo, yeḛ gə́ ndɔḭ lé nai rɔ bɔbeeje’g ɓee’n ya, tɔɓəi yeḛ gə́ kára lé godo tɔ.
14Jisəb tel ula dee pana: Ta gə́ tɔgərɔ ya ma m’ula sí nee. Seḭ toje njétə̰lookooje ya. 15Aa ooje né gə́ a gə naa sí ɓa to nee: Ɓó lé Parao̰ si kəmba tɔgərɔ ya ndá, ɓó lé ŋgoko̰ sí gə́ ndɔḭ lé a ree loo gə́ nee’g el ndá seḭ a kḭje loo gə́ nee’g kawje el tɔ. 16Ɔrje dəw kára mbuna sí’g mba karee aw ree gə ŋgoko̰ sí ndá seḭ ɓa a naije daŋgai’g. Yee ɓa m’a naa ne tapa sí mba gər see tapa sí to ta gə́ tɔgərɔ wa. Ɓó lé bèe el ndá gə goo kisi kəmba lə Parao̰ lé seḭ toje njétə̰lookooje ya.
17Togə́bè ɓa yeḛ ɓugu dee ne daŋgai’g as ndɔ dee munda. 18Ndɔ gə́ njekɔm’g munda lé ndá Jisəb ula dee pana: Gə́ raje né neelé ndá seḭ a síje ne kəmba. Mbata ma lé m’ɓəl Ala. 19Ɓó lé seḭ toje dəwje gə́ gəd tɔgərɔ ya ndá maji kar ŋgoko̰ sí kára nai kəi daŋgai’g lə sí. Nɛ seḭ lé a kodoje kó kawje ne mba laje ne gə njémeekəije lə sí gə́ ɓó ra dee lé. 20Bèe ɓa seḭ a reeje ne gə ŋgoko̰ sí gə́ ndɔḭ neelé rɔm’g nee. Bèe ɓa tapa sí a to tɔgərɔ ya ndá seḭ a kwəije ne el.
Yen ŋga deḛ ra togə́bè ya tɔ. 21Deḛ d’ula na̰ ta mbuna na̰’d pana: Tɔgərɔ ya, ta wa dɔ sí mbata lə ŋgoko̰ sí lé. Mbata jeḛ j’oo mée gə́ tɔsee mbigi-mbigi loo gə́ yeḛ ra ndòo rɔ sí’g lé nɛ jeḛ j’un mbi sí dɔ’g rəw! Togə́bè ɓa némeeko̰ neelé teḛ ne dɔ síjeḛ’g gə mbəa.
22Rubḛ un ta ula dee pana: See ma m’ula sí el wa, m’pana: Raje meeyèr gə ŋgon neelé el. Nɛ seḭ mbad kooje. Togə́bè ɓa aa ooje məsee ɓa deḛ dəji sí gée nee ya#Gn 37.21-22.
23Deḛ gər to gə́ Jisəb oo tapa dee el mbata Jisəb lé ar njetelta aar keneŋ tel ta ləa ula dee. 24Yeḛ tel giree ɔd lam aw no̰.
Ŋgako̰ Jisepje tel d’aw Kana̰ gogo
Yeḛ tel ree rɔ dee’g wɔji sə dee ta ndá yeḛ ɔr Simeo̰ mbuna dee’g təa gə kúla lar kəm dee’g. 25Jisəb un ndia mba kar dee d’ɔm koje mee ɓɔlje’g lə dee ləm, kar dee tel gə lar lə nana kara d’ula mee ɓɔl’g ləa-ləa ləma, ar dee d’ar dee nésɔ gə mba njaa ne rəbə ləm tɔ. Ndá deḛ ra togə́bè ya tɔ. 26Deḛ tɔ koje lə dee dɔ mulayḛ̀je-je’g lə dee ndá d’ɔd d’aw tɔ.
27Yeḛ gə́ kára mbuna dee’g ɔr ta ɓɔl ləa loo-to dee’g gə mba kar mulayḛ̀je ləa sɔ né ndá yeḛ oo lar gə́ to ta ɓɔl’g ləa. 28Yeḛ ula ŋgakea̰je pana: Deḛ tel gə lar ləm d’am gogo, yee ɓa to mee ɓɔl’g ləm nee. Yen ŋga meḛ dee pélé wəs-wəs ar dee d’unda bala tigi-tigi ndá d’ula na̰ pana: See ɗi ɓa Ala ra sə sí bèe wa.
29Deḛ tel ree rɔ bɔ deeje’g Jakob mee ɓee gə́ Kana̰ ndá d’un ta néje lai gə́ teḛ dɔ dee’g ndaji d’aree oo. Deḛ pana: 30Dəw gə́ to mbai dɔ naŋg neelé yeḛ pa see sí ta gə́ kədərə ya ləm, oo sí gə́ njétə̰lookooje ləm tɔ. 31Jeḛ j’ulá m’pana: Jeḛ n’toje dəwje gə́ gəd ɓó n’toje njétə̰lookooje el. 32Jeḛ n’toje ŋgako̰ na̰je gə́ bɔ síje to gə́ kára ba ya. Yeḛ gə́ kára godo ləm, tɔɓəi yeḛ gə́ ndɔḭ nai rɔ bɔ síje’g mee ɓee gə́ Kana̰ ləm tɔ. 33Tɔɓəi dəw gə́ to mbai dɔ naŋg neelé ula sí pana: Aa ooje né gə́ a kar neḛ n’oo sí ne gə́ dəwje gə́ gəd ɓa to nee: J’a kya̰ ŋgoko̰ sí gə́ kára rɔ neḛ’g ndá j’a kḭ kodo nésɔje mbata lə njémeekəije lə sí gə́ ɓó tɔl dee kaw ne ndá j’a tel ree gə ŋgoko̰ sí gə́ ndɔḭ lé rɔ neḛ’g ɓəi. 34Yee gə́ bèe ɓa n’a gər sí ne gə́ njétə̰lookooje el nɛ n’a koo sí ne gə́ dəwje gə́ gəd ya. N’a kya̰ ŋgoko̰ sí kar sí ndá j’a kaskəm njaa mee ɓee’g to gə́ meḛ sí ndigi.
35Loo gə́ deḛ budu kó gə́ to mee ɓɔlje’g lə dee ndá aa oo, nana kara iŋga lar ləa gə́ ɓiri mee ɓɔl’g ləa-ləa. Loo gə́ deḛ gə bɔ deeje d’oo lar lə dee gə́ ɓiri lé ndá ɓəl unda dee badə gaŋg dee. 36Bɔ deeje gə́ Jakob lé ula dee pana: Seḭ amje lal ŋganəmje! Jisəb godo ləm, Simeo̰ godo ləm tɔ ndá seḭ ndigije taaje Bḛjami kawje səa tɔ. Néje neelé dum dɔm.
37Rubḛ ula bɔbeeje pana: Ɓó lé m’tel m’ree gə Bḛjami rɔi’g el ndá i a tɔl ŋganəmje gə́ diŋgam gə́ joo lé. Yá̰ jim-ma’g ya ndá m’a tel ree səa rɔi’g ya.
38Jakob pana: Ŋgonəm lé a kaw sə sí nda̰ el mbata ŋgokea̰ gə́ kédé wəi ndá yeḛ nja nai gə karee ba. Ɓó lé né gə́ majel a teḛ dəa’g loo kaw rəbə gə́ a gə kawje lé ndá seḭ a karje dɔm gə́ pudu lé andə mbuna njé gə́ d’wəi’g lé gə meeko̰ ya.
Currently Selected:
Gḭ-Néje 42: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
