Gḭ-Néje 41
41
Jisəb ɔr gin ni lə Parao̰
1Aa oo, ləb joo gə́ gogo lé Parao̰ ni ndá yeḛ aar ta baa’g. 2Bèe ɓa ko̰ maŋgje siri gə́ bḭ dee ndoolé yḛd-yḛd ləm, gə́ d’ər ndɔl-ndɔl ləm tɔ lé d’ḭ mán baa’g teḛ raga ndá d’un kudu ko̰ mu mee mbo’g. 3Ko̰ maŋgje gə́ raŋg siri gə́ bḭ dee tel wagəsa ləm, d’əŋ kəŋ-kəŋ ləm tɔ lé d’ḭ mán baa’g goo dee’g teḛ raga ndá d’aar dɔ koŋgo baa’g mbɔr dee gə́ kédé’g lé. 4Ko̰ maŋgje gə́ bḭ dee tel wagəsa ləm, gə d’əŋ kəŋ-kəŋ ləm tɔ lé d’usɔ maŋgje gə́ bḭ dee ndoolé yḛd-yḛd ləm, gə d’ər ndɔl-ndɔl neelé ləm tɔ. Ndá Parao̰ teḛ kəmee dɔ ɓi’g yərərə.
5Yeḛ tel toɓi gogo tɔɓəi ndá yeḛ tel ni gə́ gɔl joo. Yeḛ oo dɔ koje siri gə́ kandə dee ər kəm gəsəsə ləm, maji péd-péd ləm tɔ lé d’uba kaar kó gə́ kára ba’g nee ya. 6Dɔ koje siri gə́ d’aar jəm ləm, lel gə́ ḭ bər tudu dee ləm tɔ lé d’uba goo dee’g. 7Jəm koje neelé tur dɔ koje gə́ d’ər kəm ləm, gə́ d’unda kəm ɗao-ɗao ləm tɔ. Ndá Parao̰ teḛ kəmee dɔ ɓi’g yərərə ndá oo to gə́ yeḛ ni gə́ ni ya.
8Teḛ gə ndɔ rad ndá mee Parao̰ to kəgəgə ndá yeḛ ula kula ɓar njémbeḛje lai gə njékəmkàrje lai gə́ Ejiptə rəa’g. Yeḛ ula dee ta ni ləa. Nɛ dəw kára kara askəm kɔr ginee kar Parao̰ el#LkD 2.2. 9Yen ŋga njekaa dɔ njékaree nékaije lé un ta ula Parao̰ pana: Ɓogənè m’a gə kar məəm olé dɔ némajel’g ləm gə́ m’ra lé. 10Mee Parao̰ ḭ səa pu dɔ kuraje’g ləa ndá yeḛ wam ilam daŋgai’g mee kəi’g lə njekaa dɔ njérɔje’g lé ma jeḛ gə njekaa dɔ njéra muruje lé na̰’d. 11Mee til gə́ kára ba ya jeḛ joo bɔr jeḛ nije, yeḛ ləm gə ma ləm tɔ, ndá nana kara iŋga ginee gə́ wɔji dɔ ni gə́ yeḛ ni lé ya. 12Basa Ǝbrə kára gə́ si sə sí keneŋ lé to ɓər lə njekaa dɔ njérɔje. Jeḛ j’ɔr sor ni lə sí j’aree ndá yeḛ tegginee ar sí tɔ. Nana kara yeḛ tegginee aree gə goo ni gə́ yeḛ ni lé ya.
13Néje lai teḛ lée’g gə goo ginee gə́ yeḛ ɔr ar sí ya. Parao̰ tel səm loo-kula’g ləm gogo ləm, tɔɓəi yeḛ tɔ njekaa dɔ njéra muruje lé kəm kag’d ləm tɔ.
14Yen ŋga Parao̰ ula kula ɓar Jisəb ndá d’aree unda loo teḛ daŋgai’g gə ŋgwɔd. Yeḛ ndisa mbai təa ləm, ula kubuje gə́ raŋg rəa’g ləm tɔ, ɓa ɔd aw rɔ Parao̰’g ɓəi. 15Parao̰ ula Jisəb pana: Ma m’ni ndá dəw kára kara askəm kɔr gelee kam el. Nɛ m’oo ta gə́ wɔji dɔi pana: Loo gə́ d’ɔr sor ni d’ari ndá i askəm kɔr gelee.
16Jisəb ila Parao̰ keneŋ pana: To né gə́ ḭ rɔm-ma’g el. Nɛ Ala ɓa a kila Parao̰ keneŋ gə ta gə́ kul.
17Yen ŋga Parao̰ ula Jisəb pana: Loo gə́ ma m’ni lé ma m’aar ta baa’g. 18Ndá, aa oo, ko̰ maŋgje siri gə́ rɔ dee ər ndɔl-ndɔl ləm, bḭ dee ndoolé yḛd-yḛd ləm tɔ lé d’ḭ mán baa’g teḛ raga ndá d’un kudu ko̰ mu mee mbo’g. 19Ko̰ maŋgje gə́ raŋg siri gə́ teḛ goo dee’g lé to dee gə́ siŋga dee godo ləm, bḭ dee tel wagəsa ləma, d’əŋ kəŋ-kəŋ ləm tɔ. Ma m’oo gar maŋgje gə́ majel gə́ d’as sə dee bèe mee ɓee gə́ Ejiptə lai lé kédé el ɓəi. 20Ko̰ maŋgje gə́ d’əŋ kəŋ-kəŋ ləm, bḭ dee tel wagəsa ləm tɔ lé dee d’usɔ ko̰ maŋgje gə́ siri gə́ dɔtar gə́ rɔ dee ər ndɔl-ndɔl lé. 21Deḛ turu dee meḛ dee’g mag-mag lal kar dəw oo to gə́ né andə meḛ dee’g ndá bḭ dee tel wagəsa to gə́ kédé lé ya ɓəi. Ndá léegəneeya ma m’teḛ kəm yərərə tɔ. 22Ma m’ni ya tɔɓəi ndá m’oo dɔ koje siri gə́ d’unda kəm gəsəsə ləm, gə maji péd-péd ləm tɔ lé d’uba kaar kó gə́ kára ba nee ya. 23Dɔ koje gə́ siri gə́ to gə́ sumee ləm, aar jəm ləma, lel gə́ ḭ bər kara tudu dee ləm tɔ lé d’uba goo dee’g. 24Dɔ koje gə́ d’aar jəm lé tur dɔ koje gə́ siri gə́ maji péd-péd lé. Ma m’ɔr soree m’ar njémbeḛje ya nɛ dəw kára kara ɔr gelee am el.
25Jisəb ula Parao̰ pana: Gin ni gə́ Parao̰ ni lé to gə́ kára ba ya. Ala ɓa ar Parao̰ oo né gə́ yeḛ a gə ra lé. 26Ko̰ maŋgje gə́ maji péd-péd gə́ siri lé wɔji dɔ ləbje gə́ siri ləm, dɔ koje gə́ ər kəm gəsəsə gə́ siri lé wɔji dɔ ləbje gə́ siri ya ləm tɔ. Ni neelé to ni gə́ kára ba ya. 27Ko̰ maŋgje gə́ siri gə́ d’əŋ kəŋ-kəŋ ləm, bḭ dee tel wagəsa ləm tɔ gə́ teḛ goo dee gə́ dɔtar’g lé wɔji dɔ ləbje gə́ siri ndá dɔ koje gə́ siri gə́ d’aar jəm ləm, lel gə́ ḭ bər tudu dee ləm tɔ lé wɔji dɔ ləbje gə́ siri gə́ ɓoo-boo a gə ko̰ lé tɔ. 28Togə́bè ɓa to gə́ m’ula ne Parao̰ mba̰ lé Ala ar Parao̰ oo né gə́ yeḛ a gə ra ya. 29Aa oo, mee ləbje gə́ siri lé kó a kunda kəm keneŋ yaa̰ mee ɓeeko̰ gə́ Ejiptə lai. 30Nɛ mee ləbje gə́ siri gə́ d’a gə korè gée lé ɓoo-boo a ko̰ ya. Yee ɓa meḛ dəwje lai a kwəi dɔ kó gə́ unda kəm yaa̰ mee ɓeeko̰ gə́ Ejiptə’g kédé lé ndá ɓoo-boo neelé a tuji dɔ naŋg neelé tɔ. 31D’a koo kəm kó gə́ unda yaa̰ kédé el ŋga mbata ɓoo-boo gə́ a korè gée lé a kunda dee naŋg rə̰dəŋ-rə̰dəŋ ya. 32Gelee gə́ nee ɓa Parao̰ oo ne ni neelé gɔl joo gə mbəa mbata to né gə́ Ala wɔji njaŋg mba ra ləm, nai lam ba Ala a gə ra ləm tɔ. 33Ɓasinè lé maji kar Parao̰ mbər dəw kára gə́ to njegoso gə njekəmkàr mba karee undá gə njekaa dɔ ɓee gə́ Ejiptə. 34Maji kar Parao̰ ra né togə́bè mba kunda njékaa dɔ naŋgje mba kar dɔ kó gə́ d’inja mee ɓee gə́ Ejiptə as ləb siri gə́ kó unda kəm yaa̰ keneŋ lé dee nja d’a kar dee kaiee loo mi ndá d’a taa təa kára mba kunda gə kəmee. 35Maji kar dee mbo̰ nésɔje lai gə́ mee ləbje’g siri gə́ maji gə́ a gə ree lé. Gə goo ndukun gə́ Parao̰ a kun kar dee ɓa d’a mbo̰ ne kó ləm, gə nésɔje ləm tɔ mee ɓee-booje’g ndá dee ɓa d’a kaa dəa tɔ. 36Nésɔje neelé d’a kunda kul mbata lə ɓeeko̰ neelé mba ŋgina ne ləbje gə́ siri gə́ ɓoo-boo a gə ko̰ mee ɓee gə́ Ejiptə’g mba kar ɓoo-boo neelé a tuji ne ɓee lé el.
Parao̰ unda Jisəb gə́ njekaa dɔ ɓee gə́ Ejiptə
37Ta néje neelé taa kəm Parao̰ gə kəm kuraje ləa lai rəgm ya. 38Parao̰ dəji kuraje ləa pana: See j’a kiŋga gar dəw gə́ togə́bè gə́ ndil Ala to mée’g to gə́ yeḛ neelé bèe ya wa.
39Yen ŋga Parao̰ ula Jisəb pana: To gə́ Ala ari gər néje neelé lai ndá dəw gə́ raŋg gə́ to njegoso gə njekəmkàr to gə́ i bèe lé godo. 40Ma m’undai gə́ njekaa dɔ kəi ləm ndá dəwje ləm lai lé d’a ra torndui. Nɛ kalimbai ya kára ba ɓa m’a kuru ne dɔi’g#NNk 7.10. 41Parao̰ ula Jisəb pana: Oo, ma m’undai gə́ njekaa dɔ ɓee gə́ Ejiptə lai.
42Parao̰ ɔr ŋgama ləa gə́ jia’g ula ji Jisəb’g ləm, yeḛ ula kubu gə́ ra gə kúla palégal rəa’g ləma, ila yeŋgəre larlɔr gwɔsee’g ləm tɔ#LkD 5.29. 43Yeḛ aree al si mee pusu gə́ orè goo kea̰ ndá d’ila mber nea̰’g pana: Ɔsje kəji sí naŋg! Yee gə́ bèe ɓa Parao̰ undá ne gə́ njekaa dɔ ɓee gə́ Ejiptə lai ya.
44Parao̰ ula Jisəb tɔɓəi pana: Ma nja ma m’to Parao̰! Ɓó lé i un ndui lé dəw kára kara a ra né gə jia əsé gɔlee mee ɓeeko̰ gə́ Ejiptə nee gə dɔrea el.
45Parao̰ unda ri Jisəb lə Sapnat-Paenea tɔɓəi yeḛ aree taa Asnat, ŋgolə Poti-Pera, njekinjanéməs gə́ Ɔn lé gə dené ləa. Ndá Jisəb ḭ keneŋ ɔd aw gə mba koo ɓee gə́ Ejiptə lé. 46Ndɔ gə́ Jisəb teḛ aar no̰ Parao̰, mbai gə́ Ejiptə’g lé ndá ləbee aḭ rɔ-munda.
Ndá yeḛ ḭ rɔ Parao̰’g aw njaa ŋgaŋ ɓee gə́ Ejiptə’g lai. 47Mee ləbje gə́ siri gə́ kó unda kəm yaa̰ lé naŋg kinja gə koje aree ur kugu ndil-ndil. 48Jisəb mbo̰ nésɔje lai gə́ d’iŋga dee mee ləbje gə́ siri’g neelé mee ɓeeko̰ gə́ Ejiptə. Yeḛ unda dee kul mee ɓee-booje’g ar loo gə́ dana mee ɓee-booje’g neelé to loo-mbo̰-dɔ-kó gə́ d’inja mee ndɔje gə́ gugu dɔ ɓee-booje’g neelé bèe-bèe ya. 49Jisəb daa koje dɔ na̰’g asəna gə nagəra gə́ ta baa’g bèe, to yaa̰ aree əw rəa tura goo dee mbata dum tura ya.
50Kédé ɓa gə mba kar ɓoo-boo un kudu ko̰ ɓəi ndá Asnat, ŋgolə Poti-Pera, njekinjanéməs gə́ Ɔn lé oji gə Jisəb ŋganje gə́ diŋgam joo. 51Jisəb unda ri ŋgondəree lə Manasə mbata yeḛ pana: Ala ar məəm wəi dɔ kula meekonje’g ləm lai ləm, gə dɔ kəi lə bɔmje’g lai ləm tɔ. 52Ŋgon gə́ njekɔm’g joo lé yeḛ unda ria lə Eprayim mbata yeḛ pana: Ala am m’oji ŋganje dɔ naŋg gə́ deḛ ra səm néurti keneŋ.
53Ləbje gə́ siri gə́ nésɔje to keneŋ yaa̰ mee ɓee gə́ Ejiptə lé dəs mba̰. 54Mee ləbje gə́ siri gə́ orè gée lé ɓoo-boo un kudu koso to gə́ Jisəb pa ne taree kédé lé. Ɓoo-boo neelé oso mee ɓeeko̰je gə́ raŋg lai ya. Nɛ mee ɓee gə́ Ejiptə ɓa nésɔ to keneŋ#NNk 7.11. 55Loo gə́ ɓó tɔl dee yaa̰ mee ɓee gə́ Ejiptə lai tɔ ndá dəwje lé no̰ gə́ rɔ Parao̰’g mba kiŋga nésɔ. Ndá Parao̰ ula Ejiptəje lai pana: Awje rɔ Jisəb’g ndá raje né gə́ yeḛ a kula sí#Ja̰ 2.5. 56Ɓoo-boo neelé o̰ ɓee dɔ naŋgje’g lai. Jisəb ɔr takəi ŋgəm koje lé ar Ejiptəje ndogo səa. Ɓoo-boo neelé ḭ dɔ maree’g gə́ kédé-kédé mee ɓeeko̰ gə́ Ejiptə. 57Tɔɓəi d’ḭ mee ɓeeko̰je gə́ raŋg lai ree Ejiptə mba ndogo kó rɔ Jisəb’g to mbata ɓoo-boo neelé to ɓəl kədm-kədm gə dɔ naŋgje lai ya.
Currently Selected:
Gḭ-Néje 41: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
