Gḭ-Néje 40

Jisəb ɔr gin nije lə daŋgaije

1Gée gə́ gogo kuraje lə mbai gə́ Ejiptə joo ra né gə́ taa kəm ɓée deeje el. Yeḛ gə́ kára to njekaa dɔ njékaree nékaije ləm, maree to njekaa dɔ njéra muru kaareeje ləm tɔ. 2Mee Parao̰ ea̰ dɔ kuraje’g ləa gə́ joo lé yeḛ gə́ to njekaa dɔ njékaree nékaije ləm, gə njekaa dɔ njéra muru kaareeje ləm tɔ. 3Yeḛ ar dee d’ɔm dee kəi lə njekaa dɔ njérɔje lé mee kəi-daŋgai’g loo gə́ deḛ ŋgəm Jisəb keneŋ lé. 4Njekaa dɔ njérɔje lé ɔm dee ji Jisəb’g mba karee aa dɔ dee ndá yeḛ ra né ar dee tɔ. Bèe ɓa deḛ d’isi daŋgai’g kur dee əw lam.

Jisəb ɔr gin nije lə daŋgaije

5Mee til gə́ kára ba ya njekar mbai gə́ Ejiptə nékai ləm, gə njera muru karee ləm tɔ gə́ d’isi daŋgai’g lé deḛ joo bɔr ni, nana kara ni ni ləa gə́ d’askəm kɔr gelee ɓəd-ɓəd ya. 6Teḛ gə ndɔ rad lé Jisəb aw rɔ dee’g ndá aa loo oo dee. Nɛ aa oo, kəm dee mi mbidi-mbidi. 7Yen ɓa yeḛ dəji njékaa dɔ kuraje lə Parao̰ gə́ d’isi səa na̰’d kəi-daŋgai’g lə ɓéeje lé pana: See ban ɓa kəm sí mi mbidi-mbidi ɓogənè bèe wa.

8Deḛ d’ilá keneŋ pana: Jeḛ nije nɛ j’oo dəw kára mba karee ɔr ginee ar sí el.

Yen ŋga Jisəb ula dee pana: Kəmkàr mba kɔr gin ni lé see ḭ rɔ Ala’g lé el wa. Ɔrje sor ni lé amje m’oo.

9Njekaa dɔ njékar-mbaije nékaije lé ɔr sor ni ləa ar Jisəb pana: Ni ləm-ma lé m’ni wɔji dɔ kag-nduú gə́ to nɔm’g. 10Kag-nduú lé barkəmeeje munda. Loo gə́ yee ḭ ndá pudee teḛ ləm, ka̰dee wul gə kulee do̰-do̰ bèe ləma, ka̰dee kara kas ləm tɔ. 11Ŋgo-kai-né lə Parao̰ to jim’g. Ma m’ti kandə nduú m’orè manee mee ŋgo-kai-né’g lé m’ar Parao̰ jia’g tɔ.

12Jisəb ulá pana: Aa oo, ginee ɓa nee: Barkəm nduúje gə́ munda neelé wɔji dɔ ndɔje gə́ munda. 13Nai ndɔ munda ndá Parao̰ a kari ɔr dɔi gə́ tar ləm, a kari kula ləi gogo ləm tɔ. Bèe ɓa i a kunda ŋgo-kai-né lə Parao̰ jia’g to gə́ i ra ne ta-ta loo gə́ i to ne njekaree nékai ləa kédé lé. 14Nɛ loo gə́ i a si dan rɔlel’g ndá maji kari ar məəi olé dɔm’g ləm, ra səm meemaji ləm tɔ ar Parao̰ oo ta ləm ɓó gə mba kam m’teḛ ne kəi neelé gə́ raga. 15Mbata d’ɔrm ɓee’g lə Ǝbrəje gə ɓogo. Tɔɓəi loo gə́ nee kara m’ra né kára kara gə́ askəm kar dee d’ilam daŋgai’g el tɔ.

16Loo gə́ njekaa dɔ njéra muruje lé oo to gə́ Jisəb ɔr gin ni lé gə́ majee ndá yeḛ pana: Aa oo, ni ləm-ma kara to nee: Kéeje munda gə́ muru gə́ ndá to keneŋ lé to dɔm’g. 17Mee kée’g to dɔ maree gə́ tar lé nésɔje ɓəd-ɓəd gə́ d’ula mee pil’g mbata lə Parao̰ to keneŋ. Ndá yelje ɓa ree d’usɔ né mee kée gə́ to dɔm’g lé.

18Jisəb ulá pana: Aa oo, ginee ɓa nee: Kéeje gə́ munda lé wɔji dɔ ndɔje gə́ munda tɔ. 19Nai ndɔ munda ndá Parao̰ a gaŋg dɔi ləm, a tɔi kəm kag’d gə́ tar ləm tɔ ndá yelje ɓa d’a ree mba sɔ darɔi.

20Ndɔ gə́ njekɔm’g munda gə́ gogo lé to naḭ gə́ wɔji dɔ ndɔ koji Parao̰ ndá yeḛ ra muru gad ar kuraje ləa lai. Ndá yeḛ unda dɔ njekaree nékai gə njera muru gə́ tar mbuna kuraje’g ləa. 21Yeḛ tel gə kura ləa gə́ njekaa dɔ njékaree nékaije lé loo-kula karee nékaije’g lé gogo mba karee unda ŋgo-kai-né ji Parao̰’g ya 22nɛ yeḛ tɔ njekaa dɔ muru kəm kag’d gə́ tar gə goo gel ni gə́ Jisəb ɔr ar dee lé. 23Nɛ lé togə́bè kara njekaa dɔ njékaree nékaije lé mée olé dɔ Jisəb’g el. Mée wəi dəa’g.

Currently Selected:

Gḭ-Néje 40: SBA2015

Highlight

Copy