Hebreos 5

1Ri cajawal raj chacunel pa Rocho Dios cha'tal chiquixo'l rachijab. Rire cojotalic re cach'aw paquiwi ri ticawex chwach ri Dios y re cuya chwach ri Dios ri kasa'n y rawaj ecamisam paquic'axel ri ticawex ruma ri quimac. 2Ec'u rire, utz cuc'ut ri c'axna'bal uc'u'x chique ri quetzak pa mac tob na u'aniquil taj quemacunic, ma rire na cuch'ij tane u'anic janipa ri cubi'ij Rutzij ri Dios. 3Ruma c'u wa', chirajawaxic che rire cuya chwach ri Dios rawaj ecamisam ruma rumac rire y na xew ta ruma ri quimac ri tinamit.#Lv. 9:7 4Na jinta c'u junok cu'an che rib cajawal que raj chacunel pa Rocho Dios we na cojotal ta ruma ri Dios, jela' pacha' ri xu'an ruc' ri Aarón. 5Jec'ula' ri Cristo na xutac'aba' ta uwach uk'ij chiribil rib y na xa ta pa re xu'an Kajawal cach'aw pakawi' chwach ri Dios, ma e ri Dios jewa' xubi'ij che:

Ri'at at Nuc'ajol yey Ri'in in Akaw;

wak'ij c'u ri' cank'alajisaj wa'. Sal. 2:7

6Yey je tanchi wa' xubi'ij:

Ri'at na jinta utakexic catc'oji'ic at waj chac,

ri catch'aw paquiwi ri ticawex chinuwach Ri'in

jela' pacha' ri Melquisedec#Gn. 14:17-20; Heb. 7:2 Sal. 110:4

xcha'.

7Ri Cristo echiri' xjeki' wara che ruwachulew lic xu'an orar, ruc' ok'ej y ruc' sic' lic xelaj chwach ri Dios,#Mt. 26:36-46 ri c'o puk'ab cucolobej chwa ri camic; y ri Dios lic xuta re ruma ri lic uya'om rib puk'ab. 8Ec'u ri Cristo, tob e Uc'ajol ri Dios, xumaj ucojic utzij ri Dios ruma ri c'axc'obic xric'owibej. 9Ruma c'u xutz'akatisaj uwach ronoje ri xraj ri Dios che, xu'ana aj ya'l colobetajic na jinta utakexic chique janipa ri quecojow utzij Rire. 10Ec'u ri Dios xcojow re cha' cu'an Kajawal cach'aw pakawi' jela' pacha' ri Melquisedec.

Pixabanic chwi ri kaq'uiyibal chwach ri Dios

11Lic c'o cuaj cambi'ij puwi wa', pero lic c'ayew uk'alajisaxic che alak ma c'ayew che alak camaj alak usuc'. 12Lic c'o tan k'ij lo ri' xtzijox ri Utzilaj Tzij che alak; ec'u ri lic ube e tane e la' alak chi aj c'utunel re wa'. Na ruc' ta c'u ri', lic ne cajawaxic cac'ut tanchi che alak ronoje ri nabe xmaj lo alak puwi ri Utzilaj Tzij re ri Dios. E pacha' cajawax tanchi che alak catij alak tz'um ma c'amaja' camaj alak utijic ri cowilaj wa'im. 13Ma e junok c'amaja' umajom usuc' ri cubi'ij Rutzij Upixab ri Dios puwi sa' ri usuc' y sa' ri na usuc' taj, ri' e pacha' juna ne' c'a cutij utz'um. 14Ri cowilaj wa'im xew takal chique ri e nima'k chic; jec'ula' c'o c'utunic chupa Rutzij Upixab ri Dios xew quemajaw usuc' ri queta'am sa' ri utz y sa' ri na utz taj chwach ri Dios yey lic quitakem c'u u'anic ri utz.

Currently Selected:

Hebreos 5: acrT

Highlight

Copy