1 Corintios 14
14
Ri quech'a't pa jujun chic ch'a'tem na quimajom taj
1Choca c'u alak il che cac'oji' ri rutzil c'u'xaj pa anima' alak, yey rayij alak urikic janipa ri uya'om ri Ruxlabixel ri Dios chike re 'anabal ruchac. Y che tak wa' wa ya'tal chike, ri lic cajawaxic e ri k'alajisanic re runa'oj ri Dios. 2Ma e ri jun ya'tal che ruma ri Ruxlabixel ri Dios cach'a't pa juna chic ch'a'tem na umajom taj y na camajtaj ta usuc', e ruc' ri Dios cach'a't wi, na e ta cuc' ri ticawex. Ma na jinta junok camajaw usuc' ri cubi'ij, ma wa' ewatal chiquiwach ri ticawex. 3No'j ri jun cuk'alajisaj runa'oj ri Dios, cubi'ij wa' chique ri ticawex re quiq'uiyibal chwach ri Dios, re pixabanic y re cunimarisaj quic'u'x.
4Ri jun ya'tal che cach'a't pa juna ch'a'tem na umajom taj, cu'an wa' re to'bal chiribil rib. No'j c'u ri jun ya'tal che cuk'alajisaj runa'oj ri Dios, ri' e quebuto' conoje ri quetaw re y jela' queq'uiy ri tinamit re ri Cristo.
5Chinuwach ri'in utz we ta caya'i' che onoje alak ri cach'a't alak pa jujun chic ch'a'tem na majom ta alak, pero ri lic utz e we ta caya'i' che alak cak'alajisaj alak runa'oj ri Dios pa ri ch'a'tem alak. Ma wa' más c'o cutikoj che riglesia chwa ri xa c'o cabi'x pa juna chic ch'a'tem na camajtaj ta usuc'. Yey wa' xew c'o cutikoj che riglesia we c'o junok cuk'alajisaj sa' que'elawi ri xbi'xic, y cubi'ij c'u wa' pa quich'a'tem ri quetaw re.
6Ma we e la' quinopon uc' alak hermanos y xew quinch'a't chiwach alak pa juna ch'a'tem na camaj ta alak usuc', ¿sa' cutikoj ri' che alak? Na jintaj. No'j we pa ri ch'a'tem alak cantzijoj ruc'utum ri Dios chwe, cantzijoj ri weta'am puwi ri K'ijsak, cantzijoj ruk'alajisam ri Dios chwe o juna c'utunic, ronoje tak c'u ri' wa' lic c'o cutikoj che alak.
7Ri jujun chic ch'a'tem na camajtaj ta usuc' canjunimaj ruc' jun su' o jun arpa; ma we na k'alaj ta uch'awisaxic ca'anic, na camajtaj ta usuc' ri cach'awisaxic. 8Y jela' ri trompeta cach'awisaxic cha' ri soldados caquiyijba' quib re quebec pa ch'a'oj. Pero we na k'alaj ta uch'awisaxic ca'anic, ri soldados na queboc ta il che. 9Jec'ula' ralak, we ri ch'a'tem quel lo pachi' alak na k'alaj taj, ¿su'anic c'u ri' camajtaj usuc' ri cabi'ij alak? Ma ri' xa e pacha' casach ri ch'a'tem alak pa ri tew.
10Katzij wi uq'uiyal ch'a'tem c'o che ruwachulew y chujujunal lic c'o tak ube chiquiwach ri quech'a'tiben re. 11Yey we ri'in na weta'am taj sa' que'elawi ruch'a'tem junok, ri' pacha' in juna aj naj chwach ri cach'a'tic yey rire e juna aj naj chinuwach ri'in.
12Ec'u ralak, ruma ri lic carayij alak ri cuya ri Dios re 'anabal ruchac, e lic tzucuj alak u'anic ri lic quebuto' riglesia cha' quetiqui' jusuc' chwach ri Dios. 13Ruma c'u la' we c'o junok ya'tal che ruma ri Ruxlabixel ri Dios cach'a't pa juna ch'a'tem na umajom taj, chutz'onoj c'u ri' che ri Dios cha' caya'taj che cuk'alajisaj wa' pa quich'a'tem ri quetaw re. 14Ma we e la' ri'in can'an orar pa juna ch'a'tem na canmaj ta usuc', e ri wanima' ri cach'a't ruc' ri Dios, pero ri nuna'oj na jinta c'o caresaj che.
15¿Sa' c'u ri' ri can'ano? C'o jutak laj can'an orar y cambixoj rubi' ri Dios pa juna ch'a'tem na canmaj ta usuc' tob xew ri wanima' cach'a't ruc' Rire, pero también ruc' ri nuna'oj can'an orar y cambixoj rubi' ri Dios pa ri ch'a'tem canmaj usuc'. 16Ma we rilal cayac la uk'ij ri Dios pa juna chic ch'a'tem na camajtaj ta usuc' yey wa' uya'om ri Ruxlabixel ri Dios che'la, y ri quetaw re na caquirik ta c'u ri ch'a'tem ya'tal che'la, ¿sa' c'u u'anic ri' caquibi'ij rique «Amén» che ri tioxibal x'an la we na xquimaj ta usuc' ri xbi'ij la? 17Y tob lic chom ri tioxibal ca'an rilal, wa' na jinta cutikoj che ri quibinic quisilabic ri quetaw re.
18Cantioxij che ri Dios ma ri'in más ya'tal chwe chiwach ralak quinch'a't pa jujun chic ch'a'tem na numajom taj. 19Na ruc' ta c'u ri', echiri' quimolom quib ri tinamit re ri Cristo, más cuaj cambi'ij tob queb oxib ch'a'tem lic camajtaj usuc' cha' jela' c'o caquimaj ri jujun chic che, chwa ri canwererej lajuj mil chi ch'a'tem pa juna ch'a'tem na k'alaj taj.
20Hermanos, ri na'oj alak chu'ana pacha' ri quina'oj ri e nima'k chic. Ma'an e alak pacha' alak ac'alab puwi ri cach'ob alak, tob utz we e ca'an alak pacha' ac'alab chwach ri mac, ma rac'alab c'amaja' caqueta'maj wa'. 21Ma chupa Rutzij Upixab ri Dios tz'ibital canok:
Pa tak ch'a'tem junwi y cuma tak ticawex e aj naj
quinch'a't cuc' wa tinamit.#14:21 Ri Dios xebutak e aj naj cha' quetakan paquiwi rutinamit yey wa e aj naj xech'a't cuc' pa jun ch'a'tem na caquimaj ta usuc' rique.
Yey tob c'u jewa' can'ano,
na caquicoj ta nutzij#Dt. 28:47-49 Is. 28:11-12
cacha ri Dios Kajawxel.
22Echiri' junok cach'a't pa juna ch'a'tem na camajtaj ta usuc', wa' e jun c'utubal chique ri na quicojom ta rubi' ri Cristo; no'j na je ta la' cuc' ri quicojom chi rubi'. Ec'u ri k'alajisanic re runa'oj ri Dios, na e ta que ri na quicojom ta rubi' ri Cristo, ma e que ri quicojom chi rubi'.
23Ma we e la' quimolom quib ri tinamit re ri Cristo y conoje c'ut quech'a't pa tak ch'a'tem na camajtaj ta usuc', yey coc c'u bi junok c'amaja' cumaj usuc' sa' wa' o junok c'amaja' cucoj rubi' ri Cristo, ¿sa' c'u ri cuch'ob che wa'? ¿Na cubi'ij ta nawi ch'u'jerinak alak? 24No'j we coc bi junok c'amaja' cucoj rubi' ri Cristo o c'amaja' cumaj usuc' sa' wa' yey cuto catajin alak che ubi'xiquil sa' ri uk'alajisam ri Dios che alak; ruc' c'u ronoje ri' ri cabi'ij alak, cuna' rib rire aj mac chwach ri Dios. 25Cak'alajin c'u ri' sa' ri c'o pa ranima' y jela' cakaj umejelem, culok'nimaj uk'ij ri Dios y cubi'ij pakatzij wi c'o ri Dios chixo'libal alak.
Echiri' cakamol kib, ka'ana ronoje chuchola'j
26¿Sa' c'u ri' rusuc' ca'an alak hermanos echiri' camol ib alak? Utz we e c'o ri caquibixoj rubi' ri Dios, e c'o ri caquiya c'utunic, e c'o ri quek'alajisan juna tzij re ri Dios. Utz we e c'o ri quech'a't pa juna chic ch'a'tem na quimajom taj yey e c'o ri quek'alajisan re wa ch'a'tem. 'Ana c'u alak ronoje wa' re uq'uiyibal ri quibinic quisilabic rutinamit ri Dios.
27Y echiri' molom ib alak, utz we xa e ca'ib o e oxibok quech'a't pa ch'a'tem na camajtaj ta usuc'; y qui'ana c'u wa' pa jujun, na xa ta jumul. Yey cajawaxic c'o junok cak'alajisan re wa'. 28Pero we chiquixo'l ri hermanos quimolom quib chiri' na jinta junok carikow uk'alajisaxic ri caquibi'ij, mech'aw c'u ri'; xew chech'a'ta ruc' ri Dios pa canima'. 29Jec'ula', utz we xa e ca'ib o e oxibok caquitzijoj sa' ri uk'alajisam ri Dios chique. Yey ri quetaw re lic quich'obo chi utz, we wa' e utzij ri Dios che rutinamit.
30We c'o junok catzijonic yey c'o cuk'alajisaj ri Dios che junok chic tz'ulic, ri catzijonic e chutanaba' ri cubi'ij; tec'uchiri', ri jun chic utz cujek ubi'xiquil ri tzij xuk'alajisaj ri Dios che. 31Ma e tak ri ya'tal juna tzij re ri Dios chique, utz we chiquijujunal caquik'alajisaj wa', pero qui'ana c'u wa' pa jujun, na xa ta jumul, cha' jela' conoje c'o caquimaj che y quepixabax ruma.
32E junok ya'tal che cuk'alajisaj juna tzij re ri Dios, c'o puk'ab ruchapabexic wa'.#14:32 Ri que'elawi e chirajawaxic cuch'ob rakan chi utz jampala' y su'anic cuk'alajisaj ri tzij uya'om ri Dios che. 33Ma ri Dios e Dios re utzil chomal, na re ta sachibal na'oj.
Ec'u takej alak ri caqui'an tak rutinamit ri Dios echiri' caquimol quib. 34Rixokib mech'a'tic echiri' camol ib alak pa rubi' ri Cristo. Ma ri takal chique rique e caquicoj tzij jela' pacha' ri cubi'ij Rutzij Upixab ri Dios. 35Rixokib we c'o cacaj caqueta'maj, quitz'onoj c'u ri' chique ri cachijil chicocho, ma na ube taj quech'a't piglesia.#14:34-35 Wa' na e ta que'elawi rixok na utz taj cach'a't q'uenok piglesia. Ma ri Pablo cubi'ij utz we rixok cu'an k'alajisanic o cu'an orar echiri' quimolom quib rutinamit ri Dios. 1 Co. 11:5
36C'una chic'u'x alak, na uc' ta alak petinak wi ri Tzij Pixab re ri Dios y na xew ta uc' ralak oponinak wi. 37We c'o c'u junok che alak cuch'obo curik uk'alajisaxic Rutzij ri Dios o lic cumaj usuc' runa'oj ri Dios, ri' chirajawaxic careta'maj wa': Ri cantz'ibaj che alak, ronoje e Utzij Upixab lo ri Kanimajawal. 38Pero we c'o junok na caraj ta cucoj wa nubi'im lok, ruc' c'u rire c'o wi. 39E uwari'che hermanos, ya'a ib alak che uk'alajisaxic ri tzij ya'om che alak ruma ri Dios. Yey mek'atej alak ri quech'a't pa jujun chic ch'a'tem ya'tal chique ruma ri Ruxlabixel ri Dios. 40Xew c'u lic 'ana alak ronoje chi utz y chuchola'j e chirij ri takalic ca'anic.
Currently Selected:
1 Corintios 14: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.