El Apocalipsis 18

Attho allowen ekhllayoretheneshaꞌpaꞌ yaꞌnaꞌteretchaꞌ ñeñth anetser Babilonia oꞌ awaporeꞌtarethterra

1Allempoña oꞌ alla nenterrerr poꞌpsheñeñ mellañotheñ ñeñth sowaꞌnetsa entoth, ñeñthñapaꞌ atarr awamenkath. Oꞌ eꞌñe xhap patsopaꞌ aꞌpoetarsamphsosan pats eꞌñe ña poꞌpopteñoth. 2Ñañapaꞌ rranosa womenk, ñeñthpaꞌ ateth otos:

—Theꞌñapaꞌ oꞌ aꞌypoꞌñarethterra añ anetser ñeñth atmaꞌntatareth Babilonia ñeñth atarr añekmoen anets. Theꞌpaꞌ añekpach sherberr allchaꞌ shonterra paꞌnamen oneñethexhno ñeñth atarr apoxhenareꞌ ñamha allchaꞌ shonterra paꞌnamen othexhno ñeñth atarr yetsenaꞌtyen. 3Tharroꞌmar añ koyaneshaꞌ ñeñth tomaꞌntenaya anets Babilonia, ñapaꞌ awañmoꞌcha eꞌñe poꞌkañoreshakma peteꞌth allowenet ñeñth amhchaꞌtarethetyetsa añe patsro. Allowen ñeñth añe patsroꞌtsen acheñeneshaꞌ eꞌñe aꞌposaꞌtwaneteꞌth tharroꞌmar ñeñth attho kañoreshaꞌtaneteꞌth ñeñthpaꞌ xhoch aꞌposaꞌtaneteꞌth. Ñamha allowen ñeñth allpon pomatsreꞌtyestseꞌth, ñaña atarr ekhllayorethtataweteꞌth tharroꞌmar ñapaꞌ shonteꞌ esokmañen moenatseꞌtyeseꞌth.

4Allempoña oꞌ alla neꞌmoerrerr poꞌpoñ ñoñets ñeñth eꞌmorrtetsa entoth, ñeñthpaꞌ ateth oten:

—Ñeñthes neyochreshaꞌ nepen, theꞌpaꞌ oꞌch sesaꞌnemh añ anets ñeñth atmaꞌntatareth koyaneshaꞌ. Amach sokshapretatsche ña poꞌchñar theꞌt saꞌna moeroxhtapretenaya. 5Tharroꞌmar ña poꞌchñarpaꞌ alloꞌna sen atonetnomtsa nanak. Yomporpaꞌ eꞌñe eñoteññañ poꞌchñar ñeñth allpon phaꞌyeseꞌth. 6Theꞌpaꞌ atsaꞌtatarethterrepaꞌch allpon ñeñth attho erroth phaꞌyesaneꞌth poꞌpotantañ. Ñewa, amaꞌt epocheꞌtats atsaꞌtatarethterrepaꞌch allpon ñeñth attho es phatseꞌtyeseꞌth. Ñeñth attho allpon llekatyesaneꞌth poꞌpotantañ, ñapaꞌ epocheꞌtatsepaꞌch atsaꞌtatarethterra llekëñtso. 7Ñeñth allpon koshatseꞌtyeseꞌth, theꞌñapaꞌ ñeñthepaꞌchña allpon llekaterrayerr. Ñeñth allpon echyeseꞌth, theꞌñapaꞌ ñeñthepaꞌchña allpon moeroxhtaterreꞌ. Tharroꞌmar ña awañmoꞌchpaꞌ pommoꞌcheñoth ateth oteꞌth poeyoxhro: “Napaꞌ attho nanen na nekonañopaꞌ atarr naꞌmhchaꞌtarethtena. Napaꞌ ama añeyayno ñeñth rrethorrnaneshaꞌ. Na amaꞌt awathapaꞌ amach nellkërro tharroꞌmar amach es nemoeroxhtaterraye.” 8Tharraña amaꞌt ateth ommoꞌchenañpaꞌ mamerrerrpaꞌ oꞌch xhapoña ñeñthchaꞌ moeroxhtaterreꞌ paꞌnamen moeroxhteñets —rromoeñets, llekëñets ñamha moexheñets. Ñapaꞌ aꞌpoyatatweretchaꞌ tso. Tharroꞌmar Yompor ñeñth Yepartseshar yepen ñapaꞌ ñeñth atarr Parets ñachña koñchaterreꞌ.

9Ñeñth amhchaꞌtarethexhno ora errapharen añe patsro, ñetña eꞌñe poellkëñothetpaꞌ yaꞌnaꞌteretchaꞌ ñerraꞌm esempo enterrñañet pamosoñ ñeñth attho poyen. Ñeñthara amhchaꞌtarethneshaꞌ ñeñth eꞌñe poꞌkañoreshakma peꞌth awañmoꞌcha ñeñth parrokma epoet atarr kosheteꞌth. 10Ñetpaꞌ poeyorñothetpaꞌ kowanrrorteretchaꞌ aꞌyoth tharroꞌmar atarrchaꞌ yorenet ñeñth attho oꞌ aꞌkoñchatarethterra. Ñet poellkëñothetpaꞌ atethchaꞌ otet:

—Atarr llekëñets-bee, amaꞌt ñeñth atarr añekmoen anetser ñeñth atarr awamenkath, machayotha oꞌ xherrñaña ñeñthchaꞌ koñchaterreꞌ.

11Ñamha allpon ñeñth pomatsreꞌtyetsa errapharen añe patsro, ñetpaꞌxhoꞌña eꞌñe poellkëñothet yaꞌnaꞌteñet, tharroꞌmar theꞌpaꞌ ama eñalle ñeñthchaꞌ rañthaꞌyesawet ñeñth pomyenet. 12Tharroꞌmar ñet ñeñth poꞌchekom penetpaꞌ shonteꞌ esokmañen paꞌnamen —oro, ñamha asrexhno ñamha mapyetholleshaꞌ ñeñth poptameꞌteꞌ nanak tsaꞌteꞌ, ñamha serets ñeñth otenet perla, ñamha shetamtsoxhno ñeñth atarr koxhnesharer— yetsñorromamoenareꞌ, tsamamoenarer, sedamamoen. Shonteꞌ ñamha paꞌnamen tsachexhno ñeñth atarr eñmosathexhno, ñamha marfil ñeñth elefantas ñeñth alloth yexhkatyenet paꞌnamen, ñamha paꞌnamen ñeñth yexhkatyenet tsachoth ñeñth atarr nanak tsaꞌteꞌ, ñamha ñeñth yexhkatyenet bronsoth ñamha hierroth ñamha mapyoth ñeñth otenet mármol. 13Ñamha ñeñth paꞌnamen poꞌchekom penet ateth ñerraꞌm ñeñth otenet canela ñamha paꞌnamen aspanatholleshaꞌ ñeñth eñmosathareꞌ ñamha tsacheseꞌ ñeñthpaꞌxhoꞌña eñmosathareꞌ ñerraꞌm esempo aꞌkrrateñet eꞌñe ateth ñerraꞌm ñeñth otenet mirra ñamha incienso. Allothpaꞌ poꞌpoñexhno chekmañatsoxhno ñeñthpaꞌ añ vinos, olivoseꞌ, harina ñeñth atarr kowen ñamha trigo. Ñamha poꞌpoñexhno ñeñth pomyenet ñeñthpaꞌ añ wakshexhno, carneroxhno, kawallexhno ñamha carrotholleshaꞌ ñeñth matatyen kawallexhno. Ñamha allpaꞌ amaꞌt acheñ pomoeñet ñeñthchaꞌ tarwasatenet eꞌñe attha. Ñeñth acheñerpaꞌ allña pomoeññañet pokrreña ñeñth attho korrena arr patsro. 14Ñeñth pomatsreꞌtyetsa allpaꞌ ñetñapaꞌ serrpareꞌtenet, xha ottenet ñerraꞌmrratheꞌ xho es oteñet ñeñth anetser, ñeñthpaꞌ ateth oteñet:

—Ñeñth allpon atarr phayomhaꞌyeseꞌth ateth ñerraꞌm poetsarr ñeñth atarr ayomhaꞌpoꞌ theꞌñapaꞌ ama eñalle oꞌ wañerr. Ñamha ñeñth allpon nanak kowen pentyeseꞌth ñeñth nanak koxhneshaꞌtatseꞌth, theꞌpaꞌ oꞌ chenkaꞌwerra. Theꞌñapaꞌ amaꞌt awathapaꞌ amach alla pentereꞌthe. Arrpaꞌ allowa ñeñth ateth oteñet ñeñth anetser.

15Ñeñth allpon pomyenet allpaꞌ ñetñapaꞌ epayeꞌ ganatanet nanak aton kelle. Tharraña ñet theꞌpaꞌ poꞌyorñothet atthach thomxhaꞌtet aꞌyoth allothchaꞌ kowerret ñeñth ateth oꞌ aꞌkoñchatarethterra. Ñetñapaꞌ epayeꞌ yaꞌnaꞌteñet eꞌñe poellkëñothetpaꞌ 16ateth otenet:

—Llekëñtsa-bee añ atarr anets tharroꞌmar ñapaꞌ oꞌ ateth perratheꞌ ñeñth atarr añekmoen anetser ñeñth ateth ñerraꞌmrratheꞌ poesheñarr koyaneshaꞌ ñeñth nanak kowen aññoꞌtetsa. Añchaꞌ chorrena ñeñth atarr koxhneshaꞌ yetsñorromamoen epoet ñamha tsamamoen ñamha ñapaꞌ nenan oro, ñamha mapyetholleshmaꞌth ñeñth atarr koxhneshaꞌ poptallmeꞌchyetsa ñamha nenan koxhneshaꞌ seretsoxhno. 17Theꞌñapaꞌ eꞌñe mamekmapaꞌ oꞌ eꞌñe wañerr ñeñth attho atarr nanak esokmañen echyeseꞌth. Arrpaꞌ allowa ñeñth ateth ot ñeñth pomatsreꞌtetsa all.

Allempoña allowen ñeñth poꞌtarwas peneꞌ bote ñeñth anmatseteneꞌ chekmañats all ñeñth anetsro, ñetpaꞌxhoꞌña oꞌ alla thomxhaꞌtet aꞌyoth —ateth ñerraꞌm ñeñth pamoꞌmteꞌ pen bote ñamha ñeñth achopeñathneshaꞌ ñamha marineroneshaꞌ ñeñth tarwasets all boto. 18Ñetpaꞌxhoꞌña allowenet all thomxhenetpaꞌ rrannartenet allempo enterrñañet pamosoñ ñeñth attho poyen ñeñth anetser. Eꞌñe poellkëñothetpaꞌ ateth otenet:

—Ama eñalle poꞌpoñ anetser ñeñth atarr kowen ateth ñerraꞌm añ anetser.

19Allñapaꞌ atarr yawanrrortenet. Poellkëñothetpaꞌ pampatoꞌtyeset patso. Rrannaretyesetpaꞌ ateth otyeset:

—Llekëñtsa-bee añ atarr anetser tharroꞌmar alloweney ñeñthey echyeneꞌ yebote ñeñth xhokma yaneneꞌ oñopaꞌ shonteꞌ kelle ganatyeꞌth tharroꞌmar ñeñth anetserpaꞌ shonteꞌ echaneꞌth kelle nanak aton. Tharraña amaꞌt ateth peꞌthpaꞌ theꞌñapaꞌ eꞌñe mamekmapaꞌ oꞌ eꞌñe wañerr.

Atarrchaꞌ kosheñtsoꞌtsaꞌyen allowen ñeñth poeyochreshaꞌ pen Parets

20Theꞌña sapaꞌ sokshepaꞌch ñeñthes poeꞌntañoꞌtsenes ñamha allowen ñeñthes poeyochreshaꞌ pen Parets ñamha allowenes ñeñthes allsensarethes Yomporekop ñamha allowenes ñeñthes aꞌmhteneꞌ Yompor poꞌñoñ tharroꞌmar ñeñth attho Yompor oꞌ koñchaterran ñeñth anetser, ñeñthpaꞌ atthoña oꞌ chemnaterrsa sa.

21Allempoña mellañotheñ ñeñth atarr awamenkathpaꞌ ñañapaꞌ chetan mapoeꞌ ñeñth atarr añekmoenmen ateth ñerraꞌmrratheꞌ ñeñth allokma es poetseꞌtenet ñeñthñapaꞌ waporeꞌch saꞌpo xha chenkostsa poktakma. Allempoña ñeñth mellañotheñpaꞌ ateth ot:

—Atthekmach awaporeꞌtarethterra añ atarr anetser ñeñthara ñeñth atmaꞌntatareth Babilonia. Amach orrterreꞌthe amaꞌt awatha. 22Theꞌña allpaꞌ amach es eꞌmorrterrtseꞌthe ñeñth attho tokënet arpa ñamha attho penkllaꞌtenet ñamha ñeñth attho poktorareꞌtyenet poꞌpoktoro. Ñamha ñeñth poꞌtarwas phayeꞌth ñeñth es yexhkatyesayeꞌth paꞌnamen esokmañen all, theꞌña amaꞌt awatha amach orrterreꞌthe. Ñamha attho eꞌmorrteꞌth allempo es poetseꞌteteꞌth allpaꞌ theꞌñapaꞌ amach alla eꞌmorrterreꞌthe. Eꞌñe moetsoñeñtwerra. 23Ñamha ñeñth allo xhoyoꞌtamphseteꞌth, theꞌñapaꞌ amach alla xhoyoꞌtamperraneteꞌthe. Ñamha ñeñth koshameꞌtamphsayeꞌth ñeñth senaꞌtetsa ñamha koyaneshaꞌ, theꞌñapaꞌ amach alla eꞌmorrtaterreteꞌthe pokshamhña. Ñamha allpon ñeñth pomatsreꞌtyesatseꞌth all ñeñth atarr anetsro, ñetpaꞌ atarr asherben enteteꞌth. Ora errapharen añe patsropaꞌ ama eñalle ñeñth ateth sherbets. Amaꞌt atarr asherben entyesetañeꞌth tharraña xhokma shekareꞌtyeseteꞌth allowen paꞌnamen acheñeneshaꞌ ora errapharen añ patsro. Eꞌñe ateth es ameꞌñatena amaseꞌñethpaꞌ eꞌñe atthekma shekareꞌtenanet ñeñth anetser.

24Ñamha all anetsro, ñeñthpaꞌ all amtsanatarethteꞌth ñeñth aꞌmhtayeꞌth Yompor poꞌñoñ ñamha allowen ñeñth poeyochreshaꞌ pen Parets. Allña ashatarethteteꞌth poꞌrras ñamha amaꞌt allowen ñeñth amtsanatarethtatseꞌth ora errapharen añe patsro, ñeñthara anetsroth allothña amtsanatarethteteꞌth.

Currently Selected:

El Apocalipsis 18: ame

Highlight

Copy